Тюрлю-тюрлю милли маданият байрамларыбызгъа милли гийимлерибизни гийип гелмекни чакъыра, гьатта буюрагъан йимик де гёрюне. Милли гийимлени маданият чаралагъа гийип гелегенликге де тюрлю-тюрлю янашывлар бар, бирлерини кепине геле, бирлери милли гийим гийген булан адамны ич культурасы, тарбиясы артмай деп, ушатмайгъанлар да бар.

Озокъда, милли ругьну уятмакъ учун, адатларыбызны, мердешлерибизни сакъламакъ, янгы оьсюп гелеген наслулагъа етишдирмек учун, маданият чараларда сама да милли гийимлени гиегенликни заралы ёкъ.

Маданиятны йылы дей туруп, оьтгерилеген гьар тюрлю чараланы, фестивалланы, конкурсланы айланасында бир гьавур уьстюнлюклеге етишсек де, алда йимик гьали де бу тармакъда ишлейгенлени яшавлукъ масъалаларына тергев этегенлер ёкъ.

Мени булангъы лакъырында А-П. Салаватовну атындагъы Къумукъ театрны чебер ёлбашчысы Айгум Айгумов Маданиятны йылы оьтгерилип турагъанда театргъа не йимик кёмек этиле деген соравума булай жавап берди: «Гьалива, гьалива деген булан авзубуз татли боламы!? Маданият йылы болгъан булан маданият тармакъда ишлейген бир касбучуну сама яшавлукъ масъалаларына тергев береми? Бермей! Алапаларын артдырамы? Артистлер яшавлукъ этмек, агьлюсюн сакъламакъ учун  къазанмагъа дагъы да башгъа ерлерде ишлеме борчлу. Маданиятны йылында шолай яшавлукъ масъалалагъа тергев этилген буса, шо заман, гертилей де, Маданиятны йылы деп билдирилгенини пайдасы да болар эди».

Гертилей де, маданият, инчесаният тармакъда чалышагъан касбучуланы алапалары кёп аз, артистлер гьар ерде оьзлени имканлыкъларын къоллап къазанмагъа борчлу бола.

Маданият тармакъда чалышагъан яшланы уьйретеген гьар тюрлю школаланы алып къарасакъ да, кёплерини кёп йылланы узагъында чечилмей турагъан масъалалары бар. Мисал учун, яшланы бийиме уьйретеген «Ватан» деген школа гетген йыл 25 йыллыкъ юбилейин оьтгерди. Савлай Дагъыстангъа да, ондан тышда да аты айтылгъан школа. Тек нетерсен, дарсланы оьтгерме оьзлени бинасы ёкъ. Школаны бинасын къурма ер гёрсетилгенли, он йылдан артыкъ оьтсе де, гьали де  кюрчюсю де салынмагъан.

Шолай да, оьзбашына иш гёреген яратывчулукъ коллективлер гьукуматны янындан якълав тапмай, спонсорланы кёмеклиги булан оьзлени ишин узата.

Айтылгъан яратывчулукъ коллективлерибиз миллетлерибизни, маданиятыбызны тыш пачалыкъланы халкъларына да малим этип, гёрсетип, оьр даражадагъы савгъатлар да алып къайтагъанлыкъ, пачалыкъ янындан тергев, харж гёрсетилегенликден тюгюл, айры-айры яшлагъа, коллективлеге жаны авруйгъан, имканлыгъы булангъы адамланы ва къурумланы яхшылыгъындан бажарыла.

Маданиятны йылы тамамланма 3 айдан аз къалгъан, бу йыл 100 йыллыкъ юбилейи рас гелген пагьмулу, белгили бизин оьктемлигибиз саналагъан адамларыбызны юбилейлерине де герекли кюйде тергев этилмегенлери де бар.

Бираз алдын Дагъыстанны халкъ шаири  Анвар Гьажиев тувгъанлы 100  йыл битегенликге байлавлу юбилей чара республика оьлчевде ДР-ни Башчысыны ортакъчылыгъы булан оьтгерилди. Мундан уллу тергев боламы деп ойлашмакъ бар. Тек, эсгерилген эсделик ахшамда ортакъчылыкъ этгенлер эс этген кюйде, эсделик ахшамны программасы тийишли даражада тюгюл эди. Йиберилген кемчиликлер, тындырыкълы кюйде уьстюнде ишлеп онгарылмагъанлыгъы гёрюнюп тура эди.

СССР-ни халкъ артисткасы Барият Муратова тувгъанлы 100 йыл битегенликге байлавлу эсделик ахшам узакъ къалмай оьтгерилме гёз алгъа тутулгъан. Аты савлай СССР-ге айтылгъан артисткабызны эсделик ахшамы нечик оьтгерилер экен?…