Уллу муаллимибиз, къумукъ тилни теренден билеген алим дюньядан гетген деген хабар мени юрегиме окъ болуп тийди. Ол юрютген дарслар, шолардагъы чеберлик, савлай тюрк дюньясын къуршап дарс юрютегенлик гёз алдыма гелип токътады. Кёп аврумайлы бу дюньяны къоюп гетген, мен абур-сый этип гелген алимибиз Нураммат Хайруллаевич Оьлмесовну аты бир заманда да унутулмас. Ол дарслардан таба бизге берген тил хазнаны биз, муаллимлер, касбу сынавубузда къолламагъа ва охувчулагъа етишдирмеге борчлубуз.

Илмугъа сав яшавун багъышлап, тилни ахтарылмагъан къатлавларына тюшюп, илмуда оьз ёлун салып гетген Нураммат Хайруллаевични ярыкъ келпети ону таныгъанланы ва уллу яшавгъа дарс алып гетген студентлени юреклеринде туражагъына инанаман.

Ону гьар дарсы студентлер учун янгылыкъ эди. Неге тюгюл, ол дарсны темасын яшав булан байлап, мисаллар гелтирип, шону булан бирге студентлени эсинде къалагъан кюйде хабарлап билеген адам эди. Сонг да, ол тамаша сёз тагъымланы уста кюйде къоллап, суратлавну даражасын артдырып, охувчуну теренден ойлашдырып, тергевюн тартып бажара эди. Дарсны вакътисинде ол яшавну бары да янларына тергев берип биле эди. Айтагъаным, ол сёзлени инче маъналарын табып, сёзлеге янгы формалар къошуп, аз сёз булан генг маъна береген сёзлеге, жумлалагъа тергевюбюзню бакъдырып, къумукъ тилни бай этип гёрсетип бажарагъан муаллим гьисапда бизин эсибизде къалды. Дарсны барышында ол халкъ авуз яратывчулугъундагъы чебер асарлагъа аслу тергев бере эди. Шолардан жумлалар алып, тилин ва чеберлигин ахтарып, студентлер булан къужурлу ишлеп болагъан ону йимик муаллимлени бир-эки деп санап боласан.

Оьзюнден сонг илму китаплар къоюп гетген Нураммат Хайруллаевич – школалардагъы муаллимлер, охувчулар, студентлер, аспирантлар учун уллу хазна. Ону бирдагъы бир хасиятын эсгермей болмайман. Миллетин сюегенлик, халкъыны масъалаларына жаны авруйгъанлыкъ огъар тувмадан хас эди. Шо гьислени ол студентлеге де сингдирип бажарды.

 Оьзю арабыздан гетсе де, Нураммат Хайруллаевични аты да оьр макътавгъа тийишли. Савлугъуну осаллыгъына да къарамайлы, къумукъ тилни ахтарыв булан къысматын байлагъан адамны эсделиги ону таныгъан ва билеген гьар адамны эсинде къалажагъы гьакъ. Ону гьар дарсы мени учун да уллу байлыкъ экенни бирдагъы керен де айтмагъа сюемен. Нураммат Хайруллаевич, арабыздан гетсегиз де, сиз къоюп гетген бай варислик бизге ёл гёрсетеген къыблама йимик болуп туражакъ.

 

 

 

Умукюсюм АЛИЕВА,

ДГУ-ну аспиранты.