Ана тиллерден – олимпиаданы натижасы

    Республика олимпиада Дагъыстан Республиканы муаллимлени билимлерин камиллешдиреген институтунда оьтдю. Олимпиадада 9–11-нчи класланы 297 охувчусу билимин сынады. Адатлы гьалда сынавлар Дагъыстанда яшайгъан миллетлени тиллерине гёре оьтгериле. Бу йылда да олимпиада 8 тюрлю: авар, дарги, къумукъ, къазикъумукъ, лезги, мычыгъыш, табасаран, азербайжан тиллерден оьтгерилди.

       Бу агьамиятлы ишни Дагъыстан Республикасыны муаллимлени билимлерин камиллешдиреген институтуну филология билимлерини кафедрасы (ёлбашчысы Мадина Минатуллаева) ва пагьмулу яшлар булан иш юрютеген центр (ёлбашчысы Разият Идрисова) бойнуна алып уьс­тюнлю кюйде кютдюлер.

              Ортакъчылагъа регистрация этилип битген сонг, бары да охувчу яшланы институтну актовый залында ерлешдирди. Филология илмуланы кандидаты Мадина Минатуллаева билимлерин сынама гелген яшланы алдында сёйлей туруп, оьз районларында, шагьарларында алдынлы болуп гелген олимпиаданы ортакъчыларына уьстюнлюк­лер ёрады. Ол охувчуланы оьтгерилежек олимпиаданы гезиги булан таныш этди ва яшланы къаршылама гелгенлеге сёз берди.

         Дагъыстан пачалыкъ педагогика университетини филология факультетини дагъыстан тиллерини кафедрасыны ёлбашчысы Сайгит Нурмагьамматов, Дагъыстан пачалыкъ университетини филология факультетини дагъыс­тан халкъларыны адабиятыны кафедрасыны ёлбашчысы Агъарагьим Солтанмуратов оьзлени атындан яшланы къутлады ва оьр охув ожакълагъа да тюшюп, ана тиллени уьйренивюн узатмакъны ёрады.

          Институтда билим беривню сан янына багьа берив центрны ёлбашчысы Сайитгьюсен Гьимбатов да ортакъчылагъа насигьат сёзлер айтды.

            Пагьмулу яшлар булан иш юрютеген центрны ёлбашчысы Разият Идрисова охувчу яшланы олимпиаданы низам къайдалары булан таныш этди.

         Ол билдирген кюйде, олимпиаданы натижалары билим берив министерлигини сайтында ерлешежек. Оьзге йыллардан башгъа болуп, натижалардан къайры, сайтгъа олимпиадада алдынлы ерлер алгъан яшланы ишлери ерлешдирилежек. Разият Идрисованы сёзлерине гёре, шо чара олимпиаданы ишинде ачыкълыкъ тувдурмакъ учун этилине. Бу йыл Дагъыстан Республиканы оьлчевюнде оьтгерилген бары да олимпиадаланы алдынлыларына ва оланы муаллимлерине март айны 25-нде дипломлар ва грамоталар тапшурулажакъ.

         Охувчулар булан бирче гелген муаллимлени институтну актовый залда олар учун пайдалы семинар оьтгерилди. Ана тиллени муаллимлерини арасында оьтгерилеген бютюнроссия конкурсда биринчи ер алгъан Сарат Мухумаева, регионара конкурсда алдынлы ерге ес болгъан муаллим Сейфуллагь Шагьмарданов муаллимлеге оьзлени бай сынавун аян этдилер.

       Къумукъ тилден олимпиадада ортакъчылыкъ этмеге 6 райондан (Хасавюрт, Буйнакск, Къарабудагъгент, Къаягент, Гьайдакъ, Хумторкъали) ва 3 шагьардан (Магьачкъала, Хасавюрт, Буйнакск) 27 къумукъ охувчу гелген эди. Къумукъ тиллерден республика оьлчевде оьтгерилген олимпиадаланы натижалары шулай болду:

       Сонгугюн, март айны 21-де, Дагъыстан Республиканы муаллимлерини билимлерин камиллешдиреген институт къумукъ адабиятдан республика олимпиаданы ортакъчыларын къаршылажакъ.

        Пагьмулу яшларыбызны ва оланы гьазир этген муаллимлени уьстюнлюклери булан къутлайбыз ва гележекде де ана тилни уьйренивде дагъы да оьрлюклеге етишмекни ёрайбыз!

Р. МУСАЕВА.

Авторизация
*
*
Регистрация
*
*
*
Согласны с условиями сайта?
Генерация пароля