Июль айны 3-де ва 4-нде Къазахстанны тахшагьары Астанада оьтгерилген тюрк миллетлени йыр фестивалына Дагъыстанны халкъ артисткасы Зоя Чунаева барып гелди. Интернетде ону йырлавуна кёплер тынглагъандыр. Къайтгъан сонг ол редакциягъа да гелди.

                  ____________________________________________

–Зоя, бизин къумукъ миллетни атындан тюрк халкъланы шолай уллу йыр фестивалында ортакъчылыкъ этип гелгенинг нечакъы да яхшы, сагъа баракалла. Нечик бардынг, къазах къардашларыбыз нечик къаршылады? Заман бираз гетген буса да, хабарласанг, охувчуларыбыз да билер эди…

–Июль айны башында магъа Магьачкъаладан Москвагъа барма тюшдю. Ондан да тюрк миллетлени йыр фестивалы юрюлеген Астанагъа бардым. Озокъда, мен булай чара юрюлегенни билме де билмес эдим, «Ёлдаш» газет чакъырып айтмагъан буса. Астанада мени бек арив къаршыладылар. Аэропортгъа гелип, къурум комитетни адамлары алып барды. Яшыллыкъ, гюллер – кёп бек гёзел шагьар. Муну къургъан Нурсултан Назарбаевге къазахлар оьзлер де алгъыш этелер, баракалла болсун оьзюне. Маданият министерлигинде фестивальда ортакъчылыкъ этме гелгенлер булан ёлугъув оьтгердилер.

Экинчи гюн бек уллу ва гёзел къурулгъан Камерный театрына бардыкъ. Милли накъышлар булан безендирилген о бинаны ичи адамны тамашагъа къалдыра, гьайран эте. Тюркиядан, Китайдан, Тувадан, Узбекистандан, не билейим, барын да айтма къыйын, гелгенлер булан ёлугъуп, таныш болуп лакъыр этдик. Гьар ким оьзюню тилинде сёйлесе де, бир-бирибизни англай эдик. Шулай уллу оьлчевдеги фестивальда ортакъчылыкъ этгениме мен бек шатман.

Магъа гезик етишгенде, къабалай да гийип «Аман досум…» деген къумукъ халкъ йырын йырладым. Оьзюмню янымдан газетибизни редакциясына баракалламны билдирме сюемен. Шулай уллу даражадагъы фестивалгъа барма имканлыкъ бергенигиз учун, сав болугъуз.

–Бизин къумукъ халкъны барлыгъын билдирип гелген сагъа да баракалла! Дагъы да уллу оьлчевдеги чараларда ортакъчылыкъ этме насип болсун!

Я.Бийдуллаев.

Суратда: З.Чунаева.