Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности "Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИВнимание! Конкурсы!Наши партнерыНаши спонсорыСотрудникиАвторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)

Яшлар – ону яшаву

Яшлар – ону яшаву


   Уьлгюлю муаллим жамиятны, пачалыкъны айындыра­гъан, ону талигьин тюз ёлгъа салмагъа белсенген гьакъыллы адамланы арасында уьйретивчю, гьалиги заманны тили булан айтгъанда, муаллим лап гёрмекли ерни тута деп айтсам, янгылыш болмасман деп эсиме геле. Озокъда, касбучуланы да бола нече тюрлюсю де, амма мен сизге танытмагъа сюеген муаллим бек саламат, эдепли, чинкдеси, оьз ишине бары барлыгъы булан берилген оьр категориялы касбучу.


Айгьанат Алавутдиновна Арсланбекова Къарабудагъгентдеги гимназияда ана тиллени юрютеген уьлгюлю муаллим деп айтмагъа ярай. Айгьанат Алавутдиновна ­оьзюню бары да яшавуну аслам пайын школагъа, яшланы охутувгъа ва оланы тарбиялавгъа багъышлагъан.


Ол Къарабудагъгент юртда 1969-нчу йылда тувгъан. Айгьанат Алавутдиновна школаны оьр къыйматлагъа да битдирип, Дагъыстан пачалыкъ университетни дагъыс­тан-орус бёлюгюне охума тюше ва ону да 1989-нчу йыл тамамлап, ата юртуна къайта. 1991-нчи йылда Къарабудагъгент гимназиягъа ана тиллени муаллими болуп ишге къабул этиле. Айгьанат Алавутдиновна касбусун кёп сюегени саялы, ишине де берилип, къаны-жаны булан къасткъылып чалыша, оьзгелеге де уьлгю гёрсете. Ол ишлеме башла­гъан биринчи гюнлерден тутуп ишине белсенип гиришген. Буссагьатда да оьзюню гьаракатын шо кюйде давам эте.


Ишине намуслу янашып уьйренген Айгьанат Алавутдиновна йылдан-йылгъа ишинде гьюнерин ва сынавун артдыра туруп чалыша. Ону къастлы гьаракаты коллективни арасында да белгили. Оьзю де тюнегюн дегенлей шо охув ожакъда билим алгъан, муаллимлени хасият битимин бек яхшы билеген Айгьанат Алавутдиновна гьеч бирев де себеп табып болмасдай оьзюне бек талаплы янаша ва йылдан-йылгъа билимлерин даим артдырып тура.


Айгьанат Алавутдиновна охувчуланы ва иш ёлдашларыны чы нечик де, гьатта эсгерилген районну юртларында иш гёреген охув ожакъларыны муаллимлерини арасында да уллу абур ва сый къазангъан. Ону республика даражада да муаллимлер сынаву булан пайдалана. Бажарывлу муаллим оьзю береген дарслар булан дазуланып къалмайлы, дагъы да къошум ишлер юрюте. Демек, ол охув ожакъны ёлбашчысыны тарбиялав ишлеге къарайгъан заместители, ана тил ва адабият дарсланы юрютеген муаллимлени методика бирлешивюню ва 5 «в» класны ёлбашчысы да дюр.


Айгьанат Алавутди­новна дарс береген охувчуланы билимлери ра­йондагъы школаланы охувчуларыныкинден бир къадар артыкъ экенине, ону охувчулары район ва республика конкурсларда, олимпиадаларда алдынлы ерлени къазана­гъанлыгъы да шагьатлыкъ эте. 2018-нчи йыл «Ана тиллеге – экинчи тыныш» деген конкурсда Айгьанат Алавутдиновнаны охувчу къызы Сепият Абдуллатипова республика оьлчевде экинчи ерни алды. 2016–2018-нчи охув йылда оьтгерилген тергевлени гьасиллерине гёре, ол охутагъанланы билим даражасы 9-нчу «б» класда 91 процентге етишген, 5-нчи «г»   класныкилер чи гьатта 96 процентге, 6-нчы «б» класныки буса 100 процентге, билим алывну сан яны буса 73 процентге минген. Булар – гёрмекли натижалар. Айгьанат Алавутдиновна гьар даим де охутув программагъа ва янгы охув гьасиллеге-талаплагъа, оьзю билим береген охувчуланы билимин, оланы предметни уьйренивге иштагьлыгъын артдырывгъа айрыча агьамият бере. Олар булан гьар тюрлю конкурслар, КВН- лер оьтгере, сочинениелер, рефератлар яздыра, там газетлер онгара. Яшланы ана тил ва адабият дарслагъа англавун артдырмакъ муратда дарсда гьар тюрлю янгы къайдаланы къоллай.


Иш борчларымны кюте туруп, Айгьанат Алавутдиновнаны 6-нчы класда адабиятдан оьтгерилеген «Абусупиянда – къонакълыкъда» деген дарсына къаршы болдум. Айгьанат Алавутдиновна бу дарсны бек къужурлу къайдада оьтгерди.


Дарсда интерактивный доскада Абусупиянны сураты, юртну гёрюнюшю, баву, бавдагъы къушланы тюрлю чарнавлары булан аудиодискден шаирни оьмюр баянлыгъы гьакъда оьзю хабарлай туруп, документли фильм гёрсетилди. Сонг да, яшлагъа муаллим Абусупиян бирдагъы «терек орнатгъанын» ва огъар «Къылыкъ китап» деп къойгъанын айтды.


Бу «терекни емишлерин» сююп ашагъанлар яхшы къылыкълы бола деп яшлагъа англатды. Озокъда, булай дарсланы ана тилни муаллимлери гьар дарс­да оьтгерме герек. Дагъы ёгъесе, ана тил дарслагъа яшланы исиндирмеге къыйын. Бу муаллим жагьлыгъыны гючюнден ишини къыйынлыгъын да олай артыкъ эс этмей, юртдагъы гьар тиштайпа йимик, уьй-абзар, бав къуллукъланы да кютмеге заман таба.


2009-нчу йылда уьлкени оьлчевюнде Айгьанат Алавутдиновна Арсланбекова «Йылны муаллими» деген атгъа да ес болду. Ол билим берив ожагъыны янындан да грамоталар булан савгъатлангъан. Гележекде де Айгьанат Алавутдиновнагъа савлукъ ва ишинде дагъы да уьстюнлюк­лер ёрайман.


 

Ажей Мамаева,

Къарабудагъгент районну билим берив управлениесини маълумат-методика центрны касбучусу.



Количество показов: 673
Автор: YOLDASH.news
22.02.2019 12:30
Подписывайтесь на канал yoldash.ru в

Возврат к списку


Добавить комментарий









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта