Тек бизин республиканы Прокуратурасы террорчулукъгъа къаршы иш юрютеген комитетини вакиллерини бары да токъташдырывлары булан толу кюйде рази къалмай. Дагъыстанны Прокуратурасында оьтгерилген генгешни вакътисинде гелтирилген далиллер де шону исбатлай. Ачыкълашдырып айтгъанда, 2014-нчю йылны 11 айыны ичинде бизин республикада экстремизмге байлавлу 43 (2013-нчю йылны 11 айыны ичинде – 19), олай да, 415 террорчулукъ иш гьисапгъа алынгъан. Шондан къайры да, жинаятчы уьюрлеге къуршалгъанлар 97 керен ич ишлер ва аманлыкъ болдурув къурумларыны къуллукъчуларына, олай да акъчасына, башгъа мал-матагьына ес болмакъ учун оьзге адамлагъа чапгъын этген.
Демек, бир-бир тармакъларда оьтгерилеген жинаятчылыкълар бир къадар аз бола буса да, умуми кюйде алгъанда, оланы санаву айтардай кемимейгени гьис этилмей. Шо саялы да ич ишлер ва аманлыкъ болдурув къурумларыны къуллукъчулары гьали де рагьатланмагъа болмай. Тек террорчулукъ булан ябушувну янгыз эсгерилген къурумларына салмайлы, шо жинаятчылыкъгъа къаршы иш юрютювге бютюн жамият бирлешмеге герекдир.
Инг алда, оьр гьакимлик къурумларда чалышагъанлар террорчулукъгъа къаршы юрюлеген шо гьаракатда халкъны арасында бар чакъы абурун, политика ва яшав сынавун толу кюйде къолласа пайдалы болур. Озокъда, шу ерде жинаятчы уьюрлени гьаракатыны алдын алмакъ учун олар гьеч бир зат да этмей деп айтмагъа бажарылмай.
Шо гьакъда айта туруп, артдагъы вакътилерде маълумат къуралларда да, халкъ арада да кёп айтылагъан Мычыгъыш Республиканы Башчысы Рамзан Къадыровну террорчулукъгъа къаршы иш юрютювге байлавлу белгили сиптесин эсгермеге сюемен. Ол билдиргени йимик, Мычыгъышда жинаятчы уьюрюне къуршалгъанлар адам оьлтюрсе, агьлюсю, дос-къардашы республикадан тышгъа чыгъарылып йиберилежек ва яшайгъан уьйлери тюп кюрчюсю булан бузулажакъ. Белгили экени йимик, Рамзан Къадыровну шо гьукъмусу яшавгъа чыкъмагъа да башлагъан, бир нече яшавлукъ уьйлер яллатылгъан. Тек шу ерде жинаятчы уьюрлеге къуршалгъанланы агьлюлерини не айыбы бар деген сорав тувулуна. Булай да олар агъачлыкълагъа гетген къардашлары булан кёбюсю гезиклерде къатнамайгъаны белгили. Сонг да, олар оьзлер яшап турагъан ерлерден къайда гёчюп гетмеге тарыкъ?! Террорчулукъгъа къаршы юрюлеген гьаракатны шолай ишлер асувлугъун артдыражакъгъа инанмагъа да къыйын. Неге тюгюл, янгыз гюч этив булан шо масъаланы чечмеге бажарылмас.
Дагъыстанны Башчысы Рамазан Абдулатипов террорчулукъну гьакъында эсгерегени йимик, бизин республикада герти кюйде парахатлыкъны болдурмакъ муратда жагьил адамланы яшавгъа къаравлары алышынар йимик билимин, оланы ич культурасын артдырмакъ учун мекенли чаралар белгилемеге ва ювукъ вакътини ичинде шоланы яшавгъа чыгъармагъа да тарыкъдыр.
Автор: Н. Байболатов.
