Кимден кёмек излейик?

   

Пятница, 27.04.2018г. — «ЁЛДАШ».


Артдагъы йылланы боюнда бизин районубузну халкъы ана топурагъында доланмагъа ва ону ишлетмеге башлагъанына барыбыз да шагьатбыз ва къуванабыз. Неге тюгюл де, ана топуракъны тийишли кюйде къолласа, ондан къазанмагъа бола, иш ерлер болдурула, бюджетге налогланы тёлевлери де арта.


 


Айрокъда ябыкъ топуракъда овошлар оьсдюрюв ай сайын, йыл сайын артып юрюй. Айтагъаным, 10 йыллар алда Аданакъ юртда теплицаларда памидор оьсдюрюв башланып, оланы памидору савлай республикабызгъа белгили болду.



Уллубийавулну жамияты да ишлейген халкъ гьисапда къайсы девюрде де оьзюн танытып гелген ва оьзгелеге уьлгю болгъан. Демек, артдагъы 2–3 йылны боюнда Уллубийавулну топуракълары къолланмагъа ва ишлетилмеге башланды. Айтагъаным, янгы юзюм бавлар булан янаша Уллубийавулда гюн сайын памидор оьсдюреген теплицаланы санаву ва майданы артып тура.



Масала, 2015-нчи йылда 40-50, 2016-нчы йылда 100-ден артыкъ теплицалар бар эди буса, 2017-нчи йылда шоланы санаву 500-ден де артды, бугюнлерде буса 800-ге ювукъ бар. Бу ерде айрыча бир затгъа тергев бермеге чакъыраман: халкъ ана топурагъын къолламагъа, шону уьстюнде загьмат тёкмеге башлагъан.



Чинкдеси, шо теплицаланы оьсюп гелеген яшёрюмлер ва жагьиллер къура. Демек, олар терс ойлагъа ва терс ишлеге башын сукъмайлы, ата юртунда ана топурагъын ишлетсе, пайдалы тюгюлмю?!…



Шолай доланмагъа ва ишлемеге сюеген адамлагъа буса бир-бир къурумлар ва шоланы жаваплы къуллукъчулары тогъас сала, оланы ёлун къыркъа. Артдагъы йылларда пачалыкъны янындан топуракъда ишлейгенлеге акъча маялар берилеген болгъан буса да, теплицаларда памидор оьсдюрегенлеге шолай акъчалар берилмей. Олагъа акъча алмакъ учун 3 гектардан аз болмагъан майдангъа теплицалар къурмагъа яда буса, ижарачылар бирлешип, юрт хозяйство комплекс къурмагъа герек.



Озокъда, шолай этилсе яхшы болагъаны ва пачалыкъны янындан кёмек болдурулагъаны белгили. Болса да загьмат тёгеген адамланы уьркютмеге, къоркъутмагъа тюшмей. Олар янгы аякъгъа турмагъа айлана. Балики, 1–2 йылдан олар къуршалып, СПК яда буса оьзге коллектив къурмагъа мурады бардыр?!… Тек оланы терен ойларын ва уллу умутларын бузагъан къурумлар ва шоланы къуллукъчулары ёлугъа.



Уллубийавулда теплицалар къурулмагъа башлангъанлы, юртгъа гьар тюрлю тергев болдурагъан къурумланы ва идараланы жаваплы къуллукъчулары «къонакълай» гелмеге башлады. Озокъда, тергев болдурагъан къуллукълар – пачалыкъны жаваплы къурумлары. Олар адамны ишине, яшавуна ва турушуна тергев бермеге герек. Огъар биревню де сёзю ёкъ. Амма адамланы теплицаларына соравсуз ва ихтиярсыз гирмеге, оьзлени хас документлерин гёрсетмейли, адамлар булан ябушмагъа, кисесинден савут ва тапанча чыгъармагъа, халкъны арасында къалмагъал салмагъа яраймы экен дагъы?!…



Муна, гьалилерде де УБЭП-ни къуллукъчулары булан теплицаланы есилерини тюртюшювлери болду. Шонда болгъан тюртюшювлени видеозапислерин бютюн Дагъыстанны халкъы социал сетлерде гёрдю. Озокъда, яхшы иш болмагъан. Шо болгъан къалмагъалланы теренлешивюню алдын алмакъ муратда юртну жамияты жыйынлар да оьтгерген.



Нечик алай да, болгъан ишден гьасил чыгъармагъа ва бир пикругъа гелмеге герек деп ойлайман. Айтагъаным, Уллубийавулну жамияты болгъан ишде ким такъсырлы экенлигин ихтиярланы якълайгъан къурумланы къуллукъчулары аян этер деп инана. Демек, РФ-ни Аслу законуна (Конституциягъа) гёре, бары да ватандашлар законну алдында бир йимик ихтиярлы ва жаваплы. Халкъ къайда барып кант этмеге, кимден кёмек излемеге герек?!



Авторизация
*
*
Регистрация
*
*
*
Согласны с условиями сайта?
Генерация пароля