Гьаракаты сукъландыра

Теплицаларда оьсдюрюлеген оьсюмлюклер иссини сюе, гюнге тартыла. Оланы биналарын ерлешдиривню масъалаларын чечегенде бу шартланы гьакъында унутмагъа тюшмей. Биз ёл чыкъгъан хозяйствода биналаны ерлешген кююн гёргенде, шо талаплар мунда къоллангъанына бир де тамашалыкъ этмедик. Сонг да, мунда оьсюмлюклени сугъармакъ учун сувлар жыйылагъан кёл къурулгъан.

Хозяйствону ёлбашчысы ­Буньямин Рамазанов булан ёлу­гъуп, бираз ла­къыр этген сонг, биз ол авлакъчылыкъ ишде бай сынаву бар касбучу экенине тюшюндюк. Хозяйствода ишлени салынгъан кююне, загьмат тёгегенлени оьмюрлерине тамашалыкъ этегенибизни англап, Буньямин бираз иржайып:

– Авлакъ ишлени юрютювде къаягентлилеге тенг болагъан­лар районда тюгюл, савлай республикада да аз болур, – деп башлады бизин булангъы лакъырын Буньямин Рамазанов. Шону учун, тамаша болмагъыз, мен Къаягентде тувуп оьсгенмен. Яш заманымдан берли авлакъ ишлер булан танышман. Юртлуларым йимик Волгоград, Аштархан областлагъа барып да бир нече йыллар авлакъчылыкъ ишлерде ишлегенмен. Шонда бай сынав да топладыкъ. Тек бир ой эсибизден таймай эди. Авлакъ ишлени тамамлап уьйге къайтгъан сонг, янгы сезон башлангъынчагъа ярым йыллар не этегенибизни билмей къала эдик.

Булай ойлар Буньяминни инилери Илмиямин, Къурбанали булан бирге гьалиден дёрт йыллар алда юртда биринчилерден болуп теплицалар къуруп, шоланы ичинде помидор оьс­дюрюв иш булан машгъул болмагъа борчлу эте.

Шолайлыкъда, арадан оьтген 4 йылны ичинде хыйлы ишлер этилген.

– Биз башлап 24 сотка ерде теплицалар къурдукъ, – дей Буньямин. – Гьали, гёресиз, 2 гектаргъа етишген.

Лакъыр эте туруп, биз теплицаны ичине гиребиз. Мундагъы тазалыкъ. Сыдыра-сыдыра орнатылгъан помидор тюплер, олагъа этилеген къуллукъ, тартылгъан сув гьар кимни де сукъландырар. Теплицаны ичине сутканы узагъында 16-19 градус иссилик бериле. Иссини гьалын тергейген алатлар да даим ишлеп тура.

– Теплицаны ичинде сиз гёрген бары да ишлени бизин хас авлакъчылыкъ бригадабыз кюте, – дей, лакъырны давам эте туруп, Буньямин. – Йылда эки гелим къайтарабыз. Аллагь буюрса, помидорну тюшюмюн март айны ахырына жыймагъа къастыбыз бар. Гьазир продукцияны жыйып ташыв, юклев ишлер де машинлешдирилген. Шогъар да къарамайлы, теплицаларда йылны узагъында 15–20-гъа ерли адам загьмат тёге, – деп сёзюн бёле Буньямин.

Иш ерлер ачгъаны булан тамамланып къалмай, Буньямин, ону агъа-инилери Илмиямин ва Къурбанали юртда оьтгерилеген хозяйство ишлеге де къол узата, болагъан кёмегин эте, юртлуланы жамият яшавунда да актив ортакъчылыкъ этелер.

Къаягентде болгъан адамлар арт вакътилерде юртну баш орамында тартылгъан ярыкъланы гёрмей болмай. Шо ишге Буньямин де яхшы къошумун этген. Ол ярым чакъырымгъа ярыкъ тартдыргъан, айлыкъ харжларын тёлев масъаланы чечивню де оьзюню башына алгъан. Ондан къайры, Гьюсемегент юртгъа гётерилеген асфальт ёлну боюнда ерлешген ташлангъан кёлню ичин, айланасын тазалатгъан, сув гелтирген. Балыкъ тутмагъа гьасирет юртлулары учун кёлню ичине гьали-гьалилерде 15 минг бала балыкъ яйгъан. Ювукъ арада яхшы адамланы гьаракаты булан кёл ва кёлню айланасы ял алмагъа сюеген къаягентлилер жыйылагъан ерге айланажагъына шекленмейбиз. Уьч де агъа-ини Избербаш шагьардагъы ата-анасыз къалгъан етим яшланы уьюне де гьар йыл къол ялгъай.

2017-нчи йылда Къаягентде тутушуп ябушувда савлай Россиягъа, дюньягъа атлары белгили кочаплар ва оланы артындан оьсюп гелеген гиччипавлар учун юртлуланы гючю булан янгы спортзал къурулма башланажакъ. Шо гьаракатны Буньямин Рамазанов инилери булан арив гёрген, якълагъан ва аслам къошумун этмеге сёз берген.

Биз де ишден тартынмайгъан, юрт ва юртлулары учун аслам къошумун этеген, гьар-бир юртлусу булан тил табып сый-гьюрмет къазанып чалышагъан агъа-ини Буньяминге, Илмияминге, Къурбаналиге савлукъ ёрап: «Ишлеригиз тюзелсин, берекетигиз дагъы да артсын!» – демеге сюебиз.


Магьамматрасул Ибрагьимов.


Къаягент район, Къаягент юрт.


Суратда: Буньямин Рамазанов.

Авторизация
*
*
Регистрация
*
*
*
Согласны с условиями сайта?
Генерация пароля