Ашлыкъ къайтарывда ишлер генглеше

   

Дагъыстанны маълумат къураллары билдиреген кюйде, июльну бирине Дагъыстанны 16 районунда гюзлюк ашлыкъланы тюшюмюн къайтарыв башлангъан. Шоланы арасында Къаягент районну авлакъчылары да бар. Июн айны 27-синде районда биринчилерден болуп «Къаягент» пачалыкъ унитар предприятиени авлакъчылары ашлыкъланы къайтарывгъа гиришди.

_____________________________________________________________


2016-нчы йыл гюзлюк ва язлыкъ оьсюмлюклер 5501 гектарда чачылгъан болгъан. Шо авлакълардан 12652 тон ашлыкъ жыйылгъан. Бу йыл шо натижалар дагъы да гётерилмеге герек. Гюзлюк ва язлыкъ оьсюмлюклени авлакълары районда 424 гектаргъа артгъан.


Районну юрт хозяйство управлениесини башчысыны заместители Абдулбасыр Къадиевни айтывуна гёре, гюзлюклер чачылгъан бары да хозяйстволарда, ижара участкаларда болгъан, оьсдюрюлген будайланы, юрт хозяйство техниканы, авлакъчылыкъ бригадаланы гьазирлиги тергелген. Ашлыкъланы къайтарывгъа районну хозяйстволары, ижарачылар гьазир демеге ярай. Касбучуланы къыйматларына гёре райондагъы гюзлюклени гьар гектарындан орта гьисапда 28-30 центнер ашлыкъ жыймагъа имканлыкълар бар. Шо алдагъы йылны натижаларындан хыйлы артыкъ.


Тюшюм къайтарывну биринчилерден башлагъан «Къаягент» ГУП-ну оьзюне сынавлу специалист Н.Магьамматгьажиев башчылыкъ этеген авлакъчылыкъ бригадасыны механизаторлары, ишчилери оьтген жуманы ичинде 506 гектардагъы гюзлюклени 140 гектарын оруп алгъан. Орта гьисапда алгъанда, гьар гектардан 29,1 центнер тюшюм къайтарылгъан.


Оланы арты булан оьзге хозяйстволар да ашлыкъ къайтарывгъа гирише. Артдагъы эки гюнню ичинде «Жавангент» СПК-ны, «Гьюсемегент» ГУП-ну авлакъчылары да орувну башлады. Бугюн, июльну 5-нде, районда ва республикада уллу юрт хозяйство предприятиелерден саналагъан «Каспий» ва «Оьтемиш» пачалыкъ унитар предприятиелерде де ашлыкъ къайтарыв башланды…


«Каспий» ГУП алдагъы йылларда йимик бу йылда да 900 гектаргъа гюзлюклер ва 60 гектаргъа язлыкъ арпа чачгъан. 2016-нчы йылда хозяйствону авлакъчылары гьар гектардан орта гьисапда 36 центнер тюшюм алгъан. Касбучуланы айтывуна гёре, авлакъчылар бу йылда шо натижалагъа чыкъмагъа гьаракат этип ишлей. Гьава шартлар яхшы, техника, адам гюч етише.


«Оьтемиш» ГУП-ну топуракълары кёп. Шондан пайдаланып, мунда гьар йыл минг гектардан артыкъ гюзлюклер чачыла. Бу йылда хозяйствону 1240 гектар ерине гюзлюклер чачылгъан. Шоланы 740 гектарыны есилери – ижарачылар. Оьсдюрюлген гюзлюклени гьалы бу хозяйствода да яхшы. Адам гюч, техника ашлыкъ къайтарывгъа гьазир. Гьар гектардан орта гьисапда 25-30 центнер тюшюм къайтармагъа умут бар.


Ювукъ арада къалгъан дагъы да 8 хозяйствода ашлыкъланы къайтарыв ишлер башланажакъ.


Ашлыкъланы тас этивсюз, аз болжалланы ичинде къайтарыв бугюн Къаягент районну ва юрт хозяйство предприятиелени башчыларыны алдында токътагъан лап жаваплы масъала болса да, мунда жамият гьайванланы къышлавун оьтгеривге гьазир болув ишлени, емлер топлавну барышын да бир де унутмай. Районда бугюн 2109 тон емлер, шону ичинде 359 тон бичен жыйылгъан, 1750 тон силос къуюлагъа ерлешдирилген. Ишлер «Каспий» ва «Къаягент» пачалыкъ унитар предприятиелерде яхшы юрюй. Ювукъ арада емлени къадарын гюзлюк авлакъларда къысылагъан салам тайлар да хыйлы артдыражакъ.


Районну юрт хозяйство управлениесини башчысы Б.Исмайылов юрт хозяйство ишлени барышы булан рази.


– Гьава бир кюйде сакъланмай, янгурлар чакъ-чакъда себип де йибере, – дей бизин булангъы лакъырында Бийболат Камилович. – Шону учун бугюн аслу масъа­ла – оьсдюрюлген бай тюшюмню тас этмей къысгъа болжалларда айны 30-на таба


тамамламагъа тарыкъ. Шону учун ашлыкъ оьсдюрювчюлени гьаракаты шону яшавгъа чыгъарывгъа бакъдырыла. Биз де ра­йонну авлакъчыларына, юрт хозяйство касбучуларына, тармакъда чалышагъан бары да ёлбашчылагъа уьс­тюнлюклер ёрайбыз.


Автор:Магьамматрасул Ибрагьимов.


Къаягент район.

Авторизация
*
*
Регистрация
*
*
*
Согласны с условиями сайта?
Генерация пароля