Республиканская еженедельная общественно-
политическая газета «Елдаш» (Спутник)
Меню DAG.news БЛОГОСФЕРА "ВРЕМЕНА" ПОЛИТИКА ЭКОНОМИКА ОБЩЕСТВО СПОРТ
Республиканская еженедельная общественно-политическая газета «Елдаш» (Спутник)
"ЁЛДАШ" ГАЗЕТ

Халкъ шаири булан савболлашыв

Халкъыбызны арасында белгили болгъан, сююв къазангъан ювукъ адамыбызгъа, къурдашыбызгъа-сырдашыбызгъа байлавлу ала-саладан къайгъылы хабар етишсе, юрегинг сызлай, чюмлеп авурта. Итнигюн эртен 13-нчю ноябрде редакциябызгъа етишген шолай хабар барыбызны да пашманлыкъгъа салды, юреклерибизни авуртдурду. Арабыздан сююмлю ва пагьмулу шаирибиз Бадрутдин Магьамматов гетгенни билдик.


Къумукъ адабиятны кёгюнде Магьаммат Атабаевден де узакъ къалмай бирдагъы бир ярыкъ юлдузубуз сёндю. Бизин халкъыбыз учун да, Дагъыстанны адабияты учун да бу кёп уллу тас этив. 1963-нчю йылдан берли биринчи шиърулары газетлерде, журналларда чыкъма башлагъан Бадрутдинни асарларына композиторлар макъамлар язып, радиодан, телевидениеден йырланып йиберди. Уллулар да, жагьиллер де оланы кёп сююп къабул этди, оьзлер де къоллама башлады.

Гетемен, аявлум, гетемен,

Гетсем де къайтмасгъа тюгюл.

Сюювюм аманат этемен,

Боюнгну къучакълап бугюн…,–деген ону шиърусуна язылгъан йыр жагьиллени лап да кёп йырлайгъан йыры болуп токътады. Гьали. Гьали буса ол арабыздан гетди. Ол гетген ер «къайтмасгъа тюгюл» деген ону калималарын къабул этмей. Тек азиз халкъы учун ол, оьзю де язгъанлай, къайтмасгъа гетмеген. Оьзю чыгъаргъан кёп санавдагъы асарлар булан, китаплар булан, таржума этген пьесалар, поэмалар булан халкъыбызны эсинде даимге яшажакъ. Ону «Женнетни азабы» деген китап болуп къумукъча ва орусча чыкъгъан поэмасы кёплени тамашагъа къалдырды, къолдан къол этип охулду. Халкъ оланы йылдан-йылгъа къоллап, охуп, илгьам алып, ругьун гётерип юрюжек.


Б.М.Магьамматов 1943-нчю йылда Къарабудагъгент районну Къакъамахи юртунда тувгъан. Уллу Ватан давгъа гетген атасыны бетин гёрмей оьсген. Ол белгисиз кюйде тас болгъан. Атасыз оьсмеклик нечик болагъанны Бадрутдин оьзюню поэзиясында бек пагьмулу кюйде суратлагъан. Къарабудагъгентдеги школа-интернатны битдирген сонг ол армия къуллугъун Каспий флотилияда кютген. Къайтгъан сонг 1967-нчи йыл Москвада ВЛКСМ-ни ЦК-сыны янындагъы школаны битдирген. Комсомол къуллукъларда ишлеген. Магьачкъалада ДГУ-ну битдирген сонг Москвада адабият институтну оьр курсларын да охуп битдирген. Дагъыстан радиону комитетинде, Къумукъ театрда, о замангъы «Адабият Дагъыстан» деген журналда ишлеген. Москвада Щукинни атындагъы театр училищеде къумукъ студентлер учун дарслар юрютген. 1987-нчи йылдан берли арт гюнлерине ерли Дагъыстанны китап издательствосуну къумукъ адабиятыны редактору эди. Бизге ону гьакъында гетген заманны эсгерип язма нече де къыйын.


Адабият тармакъда чалышывунда отуздан да кёп шиъру китаплар чыгъарды. Ону китаплары орус тилде Москвада чыкъды, мажар тилде Венгрияда чыкъды, ингилисче чыкъды. Шекспирни «Гамлет» ва «Макбет» деген пьесаларын къумукъ тилге гёчюрдю. Олар Къумукъ театрны сагьнасында ойналды. Ол «Дружба народов» деген журналны савгъатыны лауреаты, Тюркияны язывчуларыны союзуну члени, В.Шекспирни Халкъара центрыны члени болду. Дагъыстан Республиканы маданиятыны ат къазангъан къуллукъчусу, Дагъыстан Республиканы Пачалыкъ савгъатыны лауреаты.


Арабыздан халкъ шаир гетди. Гьакимиятны янындан кагъызгъа язылып шолай атны алмаса да, халкъ огъар шо атны тезден берген эди. Къумукъну къайсы районуна, къайсы юртуна, шагьарына барса да, ону кёп сююп, абурлап-сыйлап, халкъ шаир йимик къаршылай эди. Ол сабур, саламат, адамны хатирин къалдырып болмайгъан адилли хасияты булангъы адам эди. Шо кюйде эсибизде де яшажакъ. Жаны женнетде болсун.


Аллагь рагьмат этсин!


«Ёлдаш» газетни редакциясы.



Количество показов: 104
13.11.2017 00:00
|
Рейтинг (3.56)

Возврат к списку


  • Роспотребнадзор - Спецпроек








   МЫ В СОЦИАЛЬНЫХ СЕТЯХ:












AlfaSystems massmedia K3FN2SA