Зайналабит Абдулагьатов: «Спорт саякъланы ёлуна тюшме къоймай»

– Зайналабит Магьамматович, сиз оьзюгюз де спорт булан яш заманыгъыздан тутуп машгъул болуп гелгенсиз ва бир тюрлю натижалагъа да етишгенсиз. Районда бугюн сиз башчылыкъ этеген тармакъда  спорт ишлер нечик салынгъан, натижалары рази къалдырамы?

 

– Магьамматзапир, биринчилей, мен де сагъа районну спорт яшавуна тергевлю янашагъанынг саялы баракалламны билдирмеге сюемен.  Озокъда, гьалиги заманда физкультура ва спорт булан машгъул болма сюегенлени сыдыралары осал толумлаша. Тек шогъар да къарамайлы, бизин районну спортчуларыны уьстюнлюклери рази къалдырмай болмай. Тутушуп ябушувдан къаягентли кочаплар Нариман Исрапилов ва Ильяс Бекболатов республика, россия ва халкъара оьлчевлеринде оьтгерилеген ярышларда биринчи ерлени къазанма болгъан. Оланы юртлусу Даниял Маликов да оланы табанларын таптап геле. Первомайское юртлу Марина Жапарова, Жахар Албёрюев ва Янгы Викъриден Райисат Магьамматова боксдан гёрмекли уьстюнлюклеге етишген. Гьюсемегентли агъа-инилер Зайналабит ва Али Магьамматовлар ябушувну гюнчыгъыш къайдаларындан дюнья ва халкъара оьлчевюнде оьтгерилген ярышларда биринчи ерлеге ес болгъан. Янгыкъаягентли Атлан Алибеков – ушу-саньдадан Россияны чемпиону. Янгы Викъридеги регбистлени командасы да республика ярышларда савгъатлавну канзисине гётерилген. Оьтген йылгъы ярышларда да шо уьстде атлары эсгерилген ёлдашлар барысы да савгъатлы ерлеге ес болгъан ва оланы гележеги де яман болмас деп ойлайман.

 

– Гележекни гёз алгъа тутуп, дагъы не айтмагъа сюер эдигиз?

 

– Мен уьстде шо гьакъда бир къадар эсгердим бугъай, оланы табанларын таптап гелеген яшёрюмлер районда аз тюгюл. Бу йыл да шоланы усталыгъы, озокъда, гьар тюрлю ярышларда малим этилинежек. Дагъысын айтмагъанда, бу йыл район оьлчевюнде спортну гьар тюрлю жураларындан 25 керен ярышлар оьтгерилежек.

 

– Ярышлагъа спортчуланы гьазирлемек учун не йимик имканлыкълар пайдаландырыла, шартлар яратылынгъанмы?

 

– Районда 6 спорт школа ачылгъан ва иш гёре. Шоларда 41 тренер 2700-ге ювукъ яшёрюмню спортну гьар тюрлю жураларына уьйрете. Оланы спортгъа уьйретмек учун школаларда да тийишли онгайлыкълар болдурулгъан демеге ярай.

 

– Спортчуланы натижаларында, озокъда, оланы тренерлерини бажарывлугъу да аслу ерни тутагъаны гьакъ. Бугюн районда шолай тренерлер кимлердир?

 

– Къаягентден М. Магьамматов, Первомайскоеден М. Къурбанов, Гьюсемегентден Э. Къазанатов ва А. Амиржанов, Янгы Къаягентден А. Османов, Янгы Викъриден М. Ражабов ва шолай башгъалары натижалы ишлейлер.

 

– Зайналабит Магьамматович, школаларда да онгайлыкълар яман тюгюл деп сиз уьстде эсгерип гетдигиз. Спортчуланы уьйретмеге, оланы ярышлагъа алып бармагъа харж къайдан геле, етишеми?

 

– Муна, шо лап да къыйын масъала. Ата-аналары, ерлердеги юрт хозяйство предприятиелени башчылары бар имканлыкълагъа гёре кёмек эте.

 

– Район бюджетден кёмек болмаймы?

 

– Бола, тек аз, спортгъа етишгенде, харжы да етишмей къала. Амма спорт парахатлыкъны, дос­лукъну ва сыкълашывну белгиси экени гьакъда унутма тюшмей эди. О яшёрюмлени адашгъанланы, саякъланы ёлуна тюшмеге къоймайгъаны гьакъда айтып къойсакъ да, кёп зат анг­лашыла.

 

– Дурус, шону учун гьаракат этегенигиз ва лакъырлашыв саялы сизге баракалла  ва уьстюнлюклер ёрайман!

 

– Савбол.

 

Лакъырлашывну язып гьазирлеген М. Темирбеков.

Авторизация
*
*
Регистрация
*
*
*
Согласны с условиями сайта?
Генерация пароля