Уьчюнчю ерге ес болгъан

Москва учун ябушгъан, оьзю Буйнакск районну Оьр Къазаныш юртундан Темиркъазыкъ-Кавказ федерал округну, Дагъыстанны ва Москваны чемпиону Болат Изудинов 63 кило авурлукъда уьчюнчю ерни къазангъан. Ол ярышларда уьч ёлугъувда уьст гелип, бир керен ерли Мычыгъыш Республиканы тхэквондоистине утдургъан.

– Биринчи ерни алма нече де къаст этдим. Тек бир ёлугъувну утдуруп, финалгъа магъа ёл ябылды. Гьали ювукъ арада мен Москваны чемпионатында ва Израилде оьтгерилежек халкъара турнирде де ортакъчылыкъ этежекмен, –деди Болат.

 

СУРАТДА: Б. Изудинов.

 

 

 

Нарт уланны эсделигине

 

Эндирейли нарт улан, авур атлетикадан СССР-ни спортуну устасы, яшавдан эрте гетген Сапиюлла Болатовну эсделигине ба­гъышлангъан турнир ону ата юртунда биринчилей оьтгерилди.

 

Сапиюлла Болатов 1953-нчю йылда тувгъан. Ол авур атлетикада ва путлукъ гётеривде Дагъыстанны беш керен чемпиону болгъан. Совет Армияны сыдыраларында къуллукъ этеген йылларда СССР-ни Савутлу гючлерини чемпионатында буса ол уьчюнчю савгъатны къазангъан.

Сапиюлла Болатов авур атлетикадан къайры да, футболну да сюе болгъан. 1971-нчи йылда ол Хасавюрт районну инг де яхшы футболисти болгъан. Яман адамланы къолундан эндирейли нарт улан 1990-нчы йылда оьлюп гетди.

Ярышларда Бабаюрт, Хасавюрт районланы ва Хасавюрт шагьарны яш атлетлери ортакъчылыкъ этдилер.

Ерли «Эндирей» деген спорт школада ярышланы ачылывунда Сапиюлланы агъасы Къалсын, иниси Насрулла Болатовлар, ювугъу, спортну ветераны Садюр Акъаев, спорт школаны директору Алик Асакъаев ва районну спорт комитетини председатели Агьмат Исакъов ортакъчылыкъ этдилер.

– Агъам Сапиюлла авур атлетиканы кёп сюе эди. Ол Дагъыс­танны чемпионатларында уьст гелип, о йыллар бизин бек сююндюрген эди. Путлукъ гётеривде де ону о йыллар утуп болагъанлар болмады. Яшавуну артдагъы йылларын ол Тюмен областда йиберди. Онда ол СССР-ни спортуну устасы да болгъан эди, – деди иниси Насрулла. – Бугюн бизин  спорт школада авур атлетикадан бизин юртлу белгили нарт улан Сапиюлла Болатовну эсделигине турнир оьтгердик. Гелеген йыл биз ону турнирин юрт маданият къалада оьтгерме хыялыбыз бар. Ярышлагъа Магьачкъаладан, Къарабудагъгент, Магьаррамгент ва Дербент районлардан командаланы чакъыражакъбыз.

 

 

 

Яш спортчуланы уьстюнлюклери

 

Тутушуп ябушувдан яшланы арасында Россияны билим берив министерлигини  чемпионатында къумукъ яшлар савгъатлар къазангъан.

 

Оьтген ярышланы гьакъында Къарабудагъгент районну спорт школасыны тренери Завур Умаракъаев булай хабарлады:

– Краснодар крайдагъы Гулькевичи шагьарда оьтгерилген уллу ярышларда Къарабудагъгентни яшларыны спорт школасындан, 63 килода Къурбан Къурбанов ва 69 килода Магьаммат Абдуллаев биринчи ерлени алдылар. Паравул юртдан 32 килода уьчюнчю ерни Магьамматсалигь Абакаров къазанды.

Уьчюнчю ерлеге Бабаюрт районну спорт школасындан 50 килода Билал Таваев ва 100 килода Ислам Абуев ес болгъанлар.

Къарабудагъгент районну яш кочапларына ярышлагъа барма гьар заман кёмек этеген «Газпром трансгаз Махачкала» жамиятны генеральный директоруна баракаллабызны билдиребиз.

 

 

Айтылгъан кочапны савгъатына

 

Хасавюрт шагьарда 14–15 йыллыкъ яшланы арасында дюнья­ны ва СССР-ни чемпиону Руслан Ашуралиевни эсделигине багъышлангъан тутушуп ябушувдан ярышлар оьтгерилди.

Ярышланы ачылывунда Олимпия оюнланы чемпионлары Магьамматгьасан Абушев, Гьажимурат Магьамматов, Европаны чемпиону Ихаку Гьайдарбеков, Олимпия оюнларда гюмюш медаль къазангъан Магьамматхан Арацилов ва Русланны къызы Фатима Ашуралиева ортакъчылыкъ этдилер ва сёйледилер.

 

– Мен Русланны яхшы таныгъанман. Ону булан ярышлагъа да баргъанман. Ол бек яхшы адам да, гючлю кочап да дюр эди, – деди М. Арацилов.

– Мени атамны эсделигине Хасавюртда уллу спорт байрам оьтгергени учун шагьар администрациягъа, Докузпари, Магьаррамгент район администрациялагъа ва Дагъыстанны спортгъа къарайгъан министерлигине баракалламны билдиремен. Шу ярышларда ортакъчылыкъ этген яш кочапланы атлары гележекде Европада ва сав дюньяда белгили болажагъына инанаман, – деди Фатима Ашуралиева.

Уьч гюнню узагъында юрюлген ярышларда 368 яш кочап биринчи ерлер учун уьч халчада тогъа тартдылар.

Бу ярышларда къумукъ яшлар дёрт биринчи ерни къазандылар.

Биринчи савгъатгъа 46 кило авурлукъда хасавюртлу Ибадулла Батырбиев финалда къаягентли къумукъ яш Бийсолтан Арслановну утуп ес болду. 76 килода Оьтемиш юртдан Камил Абдулжамалов уьст гелди. Огъар Ашуралиевни агьлюсюнден къошум акъча савгъат тапшурулду.

Уллубийавуллу Гьажимурат Умаров 100 кило авурлукъда, магьачкъалалы Рамазан Идрисовну утуп чемпион болду. Инг де авур 120 кило авурлукъда бабаюртлу Ислам Абуев финалда Ахты юртлу Сабир Юзбековну утма болду. Къаягентли Сайпулла Алиболатов 69 кило авурлукъда экинчи ерни алды. Инг де енгил 32 килода уьчюнчю савгъатны къарабудагъгентли Ильяс Гьажиев къазанды.

Савгъатлы ерлеге ес болгъан яш кочаплар Темиркъазыкъ-Кавказ федерал округну ярышларында ортакъчылыкъ этежеклер.

Ярышларда юрегим оьктем болгъанны гьакъында да айтма сюемен. Савгъатланы тапшура­гъанда оьрдеги канзилерде 4 къумукъну гёрюп сююндюм. Олар финал ёлугъувларда бек арив техника гёрсетди.

 

 

Измулла ГЬАЖИЕВ.

СУРАТДА: ярышдан гёрюнюш.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля