Россияны Игитини эсделигине

Россияны Игити Абдулмалик Магьамматов Къарабудагъгент районну Губден юртуну аманлыгъын къорувда кёп йылланы узагъында оьз борчун кютген. Дин экстремистлер булангъы ябушувларда къоччакъ улан бир де къайпанмайлы борчларын кютген. Абдулмалик Магьамматов оьзюню арт тынышына етгенче, душманларыны къолундан къурбан болуп оьлгюнче, шо  рагьатсыз  ишине амин кюйде къалгъан.

Къарабудагъгент  районну ич ишлер бёлюгю район администрацияны физкультурагъа  ва спортгъа къарайгъан комитети булан бирге  оьтгерген ярышларда республиканы районларындан гелген ич ишлер бёлюклерини къуллукъчуларыны командалары ортакъчылыкъ этди.

               Турнирни  барышында Къарабудагъгент район администрацияны ёлбашчысы Агьмат Гьажиев, Дагъыс­танны ич ишлер министерлигини жаваплы къуллукъчулары, ФСБ-ни  Къарабудагъгент райондагъы ФСБ бёлюгюню ёлбашчысы Якъуб Фёдоров, Къарабудагъгент РОВД-ни ветеранларыны советини ёлбашчысы Набиюлла Исаев, Абдулмалик Магьамматовну дос-къардашлары ортакъчылыкъ этдилер.  Турнир Россияны Игитини эсделигине минутлукъ шыплыкъ билдирилип башланды.

Район администрацияны атындан  Агьмат Гьажиев ону бары да ортакъчыларына къыйын ишинде уьстюнлюклер ва ожакъларында да, элибизде де парахатлыкъ ёрады. 

«Оьсюп гелеген наслу бизин игитлерибизни атларын билмеге ва оланы уьлгюсюнде тарбияланмагъа герек.  Районну ва олай да  Дагъыс­танны халкъыны парахатлыгъын, аманлыгъын къоруй туруп, жанын къурбан этгенлени атлары бир заманда да эсден тайма ярамай», – деди Агьмат Гьажиев.

Волейбол  турнир  башланып, командалар оьзлени усталыгъын гёрсетмеге имканлыкъ болду. Ахырынчы гьасиллеге гёре, ярышда 1-нчи ерни Къарабудагъгент районну ич ишлер бёлюгюню командасы алды, 2-нчи ерге Гьайдакъ районну ич ишлер бёлюгю ес болду, 3-нчю ер буса Избербаш шагьарны ич ишлер бёлюгюне тапшурулду.

Алдынлы ерлени алгъан бары да командалагъа дипломлар, кубоклар,  акъча савгъатлар  берилди.

               Турнирни онгаргъанланы сёзлерине гёре, булай ярышны  энниден сонг да оьтгермеге гёз алгъа тутулгъан.

 

Р. МУСАЕВА.

СУРАТДА: турнирден бир мюгьлет.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля