Шону да билип, «Анжи» оюнну биринчи минутундан тутуп, ахырынчы мюгьлетине ерли сав оюн «Химикни» оьзюню къапусуна къысып турду, тек гол гийирип  башына чыкъмады.

«Химикни» футболистлери де, баш тренери де «Анжини» гючюн билип, оюнну башындан тутуп бары аслу гючюн оьзюню къапусуну алдында токъдашдырды. Бу оюнда «Химикни» он бир якълавчусу бар эди деп айтма ярай эди.

Бу оюнну еттинчи минутунда  Максимов гючюн салып ургъан топну, майданны есилерини къапучусу Божович гери урду, топ Асилдаровгъа гелди, о да боп- бош къапугъа бакъдырып бажармай, топну аутгъа йиберди.

Оюнну 31-нчи минутунда Максимовну пасындан Гьажибеков башы булан ургъан топну Божович къапуну лап гьызында гьаран токътатды.

Арадан беш минут да гетмей, «Анжини» узакъ чапгъыныны натижасында Сердеров ургъан топну «Химикни» къапучусу кёп гюч салып гери урду.

Оюнну 71-нчи минутунда Валерий Чуперканы пасындан Михаил Комков гючюн салып урду, тек топ къапуланы гёнделен багъанасына тийип, къангып гетди.

Оюнну 81-нчи минутунда штрафной тувулунгъан къоркъунчлу мюгьлетни вакътисинде, гьали чи гийиремен гол деп турагъан Максимовну, топну бош къапулагъа бакъдырып ура турагъан  аягъыны тюбюнден «Химикни» якълавчулары уруп, угловойгъа йиберди.   Оюн

0:0 санав булан тамамланды.

 

 

Ш. Кишиев.