Найида Алиханова:

 

– Найида, сен гьали болгъунча бир сама да баянлыкъ бермегенингни гёз алгъа тутуп, тувгъан, оьсген ерингни,  ата-анангны, олай да оьрюм чагъынг нечик оьтгенни гьакъында лакъырлашывубузну башында бизин охувчулагъа  айтгъанынгны сюемен.

 

– Атам-анам миналы къарабудагъгентлилер болса да, мен Магьачкъала шагьарда тувгъанман. Анам (Ума Алиханова къызардашым Патиматны да, мени де атасыз ­янгыз оьсдюрген ва тарбиялагъан).  Яш йылларымдан тутуп, мен  енгил атлетика булан машгъул болуп, къайсы мезгилге де чабып,  яхшы натижалар гёрсетип гелгенмен. Тек оьрюм чагъыма етише туруп, спортну оюн жураларына бакъгъан якъдагъы иштагьым арт­магъа башлады. Оьр класларда охуй­гъан йылларымда бизин школада къурулгъан футбол  командагъа къуршалып турдум.  Сонг Дагъыстан пачалыкъ педагогика университетни жыйым командасында да футбол ойнадым. Регбиге буса мен сонг- сонг гелдим. Узакъ къалмайлы, спортну шо журасындан оьтгерилеген турнирге де бардым,  Россияны жыйым командасыны ортакъчысы гьисапда уьлкени оьлчевюндеги чемпионатда да ортакъчылыкъ этдим.

 

– Биринчилей ортакъчылыкъ этген турниринг сени учун нечик оьтдю?

 

– Арив оьтдю! Эгер де башгъачалай болгъан буса, оьзюм ортакъчылыкъ этген  биринчи турнирден сонг  гьазирине мени жыйым командагъа чакъырмас эди. Шо турнирде  командабыз айтардай яхшы ойнамады. Биз Россияда бешинчи ерни алдыкъ. Тек оьзюм биринчи оюнну гьасиллерине гёре де яхшы натижалар гёрсетмеге бажардым.

 

– «Ракета» деген атны сагъа ким ва къачан такъды?

 

– Шо гьакъда мен мекенли кюйде айтмагъа да болмайман. Оьзюм билеген кюйде, шо ат магъа  Россияны  жыйым командасында тагъылды.

Инг башлап  Россияны чемпионатында башгъа шагьарлардан гелген, олай да  гьар тюрлю ярышларда бизин булан тогъа тартагъан командаларда ортакъчылыкъ этеген орус къызлар магъа « Малышка» деп айта башлагъан эди. Мен  чалт чабып болагъан саялы болмагъа ярай, арадан заман оьтюп, къаравчулар да, мени булан ойнайгъан къызлар да магъа «Ракета» дейген болдулар.

 

– Найида, регби йимик къоркъунчлу, адамны санлары кёп авуртдурагъан  спорт­ну журасы булан машгъул экенинге  сагъа къардаш болагъан уланлар нечик янаша? 

 

–Билемисиз, мен бир заманда да узукъа­рилерим айтагъан сёзлени тергевсюз къоймайман. Оланы пикрусу мени учун бек агьамиятлы. Узукъарилеримни  лап да уллусу Жабрайыл башлапгъы вакътилерде мен регби булан машгъул экенимни ошатмай да турду, сонггъа таба рази болуп къалды. Оьзгелерини  буса бир де шо якъдан къаршылыгъы ёкъ эди. Сиз тюз айтасыз, регби оюнну вакътисинде спортчуланы санлары  оьтесиз кёп авурта. Бугюнлерде де бармагъым сынгъаны саялы мен командабызны оьзге ортакъчылары булан бирче  Гон-Конгда оьтгерилеген турнирге гетип болмадым.

 

– Россияны жыйым командасына къуршалып, сен Европаны чемпионатында да ортакъчылыкъ этген  бугъайсан чы…

 

 

–Этдим. Оьзюм Европаны чемпионатында гёрсетген оюнум булан рази де къалдым. Айрокъда Германияны, Бельгияны ва Италияны жыйым командалары булан оьтгерилген оюнларда мен яхшы натижалар гёрсетмеге бажардым. Тек не этерсен, мен оьзюм де къуршалгъан Россияны жыйым командасы шо чемпионатда дёртюнчю ерни тюгюл къазанып болмады.

 

–Найида, сен регби булан къачан болгъунча машгъул болмагъа хыял этесен? Спорт булан машгъул болагъанынг сагъа оьр охув ожакъда билим алмагъа пуршав этмейми? Агьлю яшавунгну къургъан сонг, сагъа спортдан гетмеге тюшмесми?

 

– Тюзюн айтсам, мен спортгъа заманлыкъгъа гелмегенмен. Регби булан машгъул экеним охувума да бир де пуршав этмей. Биревюлейине, спорт булан машгъул болагъаным гьар не  ишге де жаваплы янашмагъа уьйретген деп де эсиме геле. Агьлю яшавну гьакъында мен гьали де ойлашмайман. Магъа чы  он сегиз йыл да битмеген. Гележекде мен спортда бир тюрлю гёрмекли оьрлюклеге етишмеге умут этемен. Мени спортдагъы гьаракатыма тергев этген бизин къумукъ газетни бары да охувчуларын етип гелген Янгы йыл булан да гьакъ юрекден къутлап, кёп яхшылыкълар да ёрайман.

 

– Кёп савбол, Найида. Янгы йылынг сени де къутлу болсун. Янгыз спортда тюгюл, яшавунгда да гёз алгъа тутгъан бары да асил муратларынга етишмеге сагъа насип болсун.

 

 

 

Ш. КИШИЕВ.

Суратда: Н. Алиханова.

Авторизация
*
*
Регистрация
*
*
*
Согласны с условиями сайта?
Генерация пароля