Х. Шихсайитовну атындагъы турнир

 

Шо ярышларда уьлкени гьар тюрлю ерлеринден гелген 200 кочап ортакъчылыкъ этди. Бу йыл бу турнирге Азербайжандан ва Къыбла Осетиядан спортсменлер гелгенлик ярышланы халкъара турнирге гьисаплама имканлыкъ берди.

Эки гюн юрюлген ярышларда кочаплар, оьзлени авурлукъларына гёре ябушуп, биринчиликни алмагъа бек къаст этди. Ярышланы ачылывунда жыйылгъанлар Ставрополь ва Краснодар крайлардан, Къабарты-Балкъариядан, Темиркъазыкъ Осетиядан, Къарачай-Чергесиядан, Ингушетиядан, Къыбла Осетиядан, Чувашиядан, Мычыгъышдан, Калининград областдан гелген ва Дагъыстанны командалары булан таныш этилди.

Биринчи гюн кочаплар уьч тюрлю авурлукъда гюч сынадылар, 57 кило авурлукъда М. Идрисов, 74 кило авурлукъда Р. Расулов ва 97 кило авурлукъда М-К. Гьюсейнов биринчи ерге лайыкълы болдулар.

Турнирни бары да ортакъчылары 86 кило авурлукъда юрюлежек ярышланы рагьатсыз кюйде къаравуллагъан эди. Нечик чи, шо авурлукъда ябушуп утгъан спортсменге машин бериле эди. Оьзюню жагьил заманында Хизри Исаевич Шихсайитов да шо авурлукъда ябуша болгъан.

Бу турнирде 86 кило авурлукъда тогъа тартма гелгенлер айрада кёп эди. Олар барысы да яхшы ябушуп билеген кочап­лар, 5-си буса спортну халкъара класлы усталары болуп да чыкъды. Турнирни лап да уллу савгъаты – машинни ачгъычлары дагъыстанлы кочап, оьзю Чувашия саялы ябушагъан Д. Куруглиевге тюшдю. Ол финалда магьачкъалалы А. Гьамитгьажиевден уьст гелме бажарды. Уьчюнчю ерге де дагъыстанлы кочаплар Д. Маликов ва М. Пахрутдинов ес болдулар.

Олардан къайры да, экинчи гюн 65 кило авурлукъда ябушагъан дагъыстанлы кочап М. Къадимагьамматов, 125 кило авурлукъда азербайжанлы кочап Ж. Магьамматов алдынлы ерге чыкъдылар. Олагъа барысына да кубоклар, медаллар ва савгъатгъа телевизорлар берилди. Лап да аслу савгъатгъа ес болгъан Даурен Куруглиевге «Nissan Almera» деген машинни ачгъычларын залгъа жыйылгъанланы харс урувларыны тюбюнде Буйнакск районну башчысы Даниял Шихсайитов тапшурду.  Сонг да, ол шо гюн Буйнакск районну атындан бираз алларда Ташгентде юрюлген дюньяны чемпионатында утуп гелген А. Гьадисовгъа ва А. Садуллаевге ренкли телевизорлар савгъат этди.

Бютюнроссия турнирде яхшы ортакъчылыкъ этгенлер айрыча савгъатлагъа да ес болду. Шолай хас савгъатлар М. Къадимагьамматовгъа, А. Магьамматхановгъа, белгили тренерлер Ш. Хуталиевге, А. Алиевге, Л. Жабрайыловгъа ва Азербайжанны жагьил кочапларыны старший тренери С. Элдаровгъа берилди. Азербайжандан гелген тренер С. Элдаров буса ДР-ни Халкъ Жыйыныны Председатели Хизри Шихсайитовгъа FILA-ны эсделик медалын тапшурду.

 

 

Абдулла Бугленли.


Авторизация
*
*
Регистрация
*
*
*
Согласны с условиями сайта?
Генерация пароля