Исламнур АБДУЛАВОВ:


Исламнур, масхара этемисен? – деп сорайман.

 

– Тюгюл! Мени шо гьакъда бираз сама шеклигим де ёкъ! – деп гесди ол. – Аллагь берген гьар гюн тёшекден шо ой булан тураман, гече шо ой булан къайтып ятаман, – деди.

 

– Олай болгъанда, мен сени шу сёзлерингни сен айтгъан кюйде «Ёлдаш» газетге язма да язаман.

 

– Языгъыз, шо кюйде язма да языгъыз! – деп, мени Исламнур эсер- месер этди.

Хамисгюн. Ахшам сагьат тогъузгъа ярым. «Анжини» тренировкасы битди. Футболистлер сыкъмасув футболкаларын да уьстюнден чече туруп, раздевалкагъа багъып тербенди. Мен шо арада баш тренер Сергей Ташуевни къырыйына барып:

 

– Сергей Абузейидович, Исламнур Абдулавовдан баянлыкъ алмакъны тийишли гёремен, дедим.

 

Ташуевден: «Бир къаршылыкъ да ёкъ!» – деген жавапны да алып, мен оьрде эсгерилген гостиницаны фойесинде душевойгъа киринме гетген Исламнурну къаравуллап токътадым.

Арадан кёп гетмей, чайынып, сув башлары булан гелеген футболистлени арасында Исламнур да гёрюндю, гелип къырыйымдагъы креслода ерлешди.

Маълумат:

Исламнур Абдулавов Магьачкъалада 1994-нчю йылда тувгъан. 13 номерли орта школада охугъан. Минасы – Паравулдан ( Къарабудагъгент район). Миллети – къумукъ. Атасы Магьамматрасул маршрут таксиде ишлеген, анасы уьйде яшлагъа къарап тургъан. Агьлюсюнде уьч яш бар – эки улан, бир къыз.

 

Футболгъа биринчилей ким алып гелди, ким таныш этди футбол булан?

 

–  Магъа тогъуз йыл бола эди. Атабыз маршрут такси гьайдай,  агъам Гьамзат булан атабызны машининдебиз. Футбол бар деп Дахадаев орамны бегетген саялы, атабыз бираз къарсалап башлады. Гьамзат буса, мени де алып, машинден де тюшюп, футболгъа барма токъташды. Биринчи керен футболгъа да барып, стадионгъа гирген мюгьлетден тутуп, магъа «футбол аврув» къабунду. Сонг «Анжини» бары да оюнларына юрюме башладым. Яшлай айтылгъан къаравчу – фанат болдум, гьатта мени акъыра­гъанымны, къычырагъанымны гючюнден, тамакъ аврувгъа тарыма аз къалдым.

 

–  Оьзюнг футбол булан къачан, нечик машгъул болдунг?

 

– Шонда да агъабыз Гьамзатны къасты болду. Магъа он йыл болагъанда, мени Гьамзат спорт школагъа гелтирди. 2003-нчю йылдан тутуп, 2010-нчу йыл болгъунча мен шо школагъа юрюдюм. Биринчи тренерим Ринат Изболатов эди.

 

– Сонг?

 

– Сонг сав бир йылны  (2010–2011) мен Киев шагьарны айтылгъан «Динамо» командасыны академиясында оьтгердим.

 

– Киевден гелгендокъ, «Анжи» булан биринчи контрактынга къол да салдынг чы…

 

– Тюз. 2011-нчи йыл июль айда мен «Анжи» булан биринчи контрактгъа къол салдым. Сонг «Анжини» экинчи составыны баш тренери Руслан Агъаларовну ёлбашчылыгъы булан  ойнама башладым. «Анжини» экинчи командасында мен отуз алты оюн ойнадым, он беш гол гийирдим. Мен берген паслардан сонг гирген голланы мен санавун юрютмеймен. Тюзю, оьзюмню гьакъымда шо голлагъа, оюнгъа бакъгъан якъда  хабарлама да сюймеймен. О гьакъда сёйлемеге де, язмагъа да, ойлашмагъа да къаравчулар, тренерлер, журналистлер бар. Олар бере футболистге тийишли къыйматын да.

 

– Сен экинчи командада ойнама башлагъанда, сагъа яш къаравчу-къаравчулар Карим Бензема деген ат такъгъан эди (Бензема — Европада аты айтылгъан футболист).

 

– Карим Бензема – гючлю футболист, гьали ойнайгъан футболистлени арасында Бензема – мени  кумирим. Мен ойлайгъан кюйде, мени бет гелишим бираз Бенземагъа ошай, къаравчулар да шо атны магъа шо саялы къойгъан деп эсиме геле. Мени пагьмум, усталыгъым шонча да шолай Бенземаны пагьмусуна, усталыгъына ошайдыр деп эсиме гелмей. Не болса да , не ат къойса да, о – оланы иши, магъа олай тенг­лешдиривлеге кёп агьамият берме тюшмей. Мени ишим – гьар гюн сайын оьзюмню усталыгъымны, пагьмумну гётермек учун гьаракат этмек, «Анжини» аслу составында гьар замангъа оьзюме ер къазанмакъ.

 

– Эки йылдан сени « Анжини» аслу составына чакъырды.

 

–  Аслу составгъа чакъырылгъынча мен о состав булан кёп тренировкаларда ортакъчылыкъ этдим.

 

– Сени йимик жагьил улангъа «Анжини» о замангъы составындагъы дюньяны «юлдузлары» булан ойнама тюгюл, тренировкаларда ортакъчылыкъ этмек де – уллу насип…

 

– Тюз айтасыз – насип!  Техникагъа, оюн дисциплинагъа, заманында къаршы команданы оюнчуларына хапарсыз, ачылгъан бизин футболистге пас бермекге, оьзге футбол гьиллалагъа мен Самуэль Это’О -дан, Роберто ва Жоао Карлослардан, Диарадан, Жусилейден, Жирковдан ва башгъалардан уьйрендим.

Шо вакътиде гостиницаны фойесиндеги бизге къаршы креслогъа, Расим Тагьирбеков олтуруп, гьазирине:

 

– Расим Тагьирбековдан да  деп неге къошмайсан? – деди.

 

– Сенден негер уьйренейим, сен – якълавчусан, мен – чапгъынчыман! Мен тизме къарайман, сен буса таза бузувчусан!  Биз, чапгъынчылар, тизген затны бузмакъ – сизин аслу оюгъуз. Мен  сенден не уьлгю алып боламан? – деп, Исламнур Расимни масхарасына жавап берме бажарды.

– Эсингдеми он еттинчи август, 2013-нчю йыл, Санкт-Петербург шагьар, толгъан «Петровский» стадион…?

 

–  Озокъда! Олай затлар бир футболистни де эсинден таймай. О гюн Россияны чемпионатында «Анжи» «Зенит» булан ойнай эди. Оюнну алтмыш еттинчи минутунда тренер магъа: « Тез чечин!» – деп буйрукъ берди. Мен футбол майданда алтмыш етти минут ойнап тургъан Мегьти Карсела Гонсалесни алышдырып, «Анжини» аслу составында биринчи оюнумну ойнадым…»

 

– «Рубинге» гийирген биринчи голунг эсингдеми?

 

–  Дюр! Тек о мен гийирген гол булан бирче, «Рубин» булан ойнагъан оюнну санаву да  эсиме тюше. Шо саялы о гол магъа айтардай сююнч гелтирмей.

 

– Сени чинк де сагъа бек юреги авруйгъан къаравчунг кимдир?

 

– Мени анам. Озокъда, анам. Оюн битгендокъ, ол телефонума зенг ура.

 

– Сени командада лап ювукъ къурдашынг?..

 

– Бизин командада ойнай­гъан чакъы футболистлер бары да – мени къурдашларым. Тек Сердер булан кёп боламан. Биз жагьиллей бирче ойнадыкъ, йылларыбыз да бир, хасиятларыбыз да къыйыша буса ярай.

 

– Сени футбол майданда чинк де ушатагъан еринг?..

 

–  Чапгъынчыны ери, орта чапгъынчыны…

 

– Сени чи бир-бирде Гьажиев футбол майданны ортасына, ярым якълавчуну позициясына да сала эди.

 

– Олай да бола эди. Тек бу суалны тренерге берсегиз яхшы. Мени тренер къайда салма ти­йишли гёрсе, мен шонда ойнайман.

 

– Сен къайсы тренер булан ишлеме сюер эдинг?

 

– Магъа башгъа тюгюл, мени ишим – ойнамакъ. Гьажиевге баракалла билдирме сюемен. Гьажи Муслимович магъа инангъан саялы, мени усталыгъымны гёрген, якълагъан саялы.

 

– Исламнур, дин булангъы аралыгъынг нечикдир?      

 

– Бизин ожакъда атабыз барыбызгъа да бир йимик исламны ёлунда тарбия берген. Мени агьлюмде намаз этмек, ораза тутмакъ ва башгъа бизин ислам дин гёрсетеген ёл булан юрюмек – болмаса ярамайгъан затлар. Агьлюге шолай тарбия берилген, мен де шо агьлюню членимен.

 

– Къатын алмагъанмысан?

 

– Алмагъанман гьали де… (иржая)

 

– Футболдан ялкъгъанда, не зат булан машгъул болма сюесен?

 

– Мен футболдан ялкъмайман! Тек Интернетге гиреген кююм бола, китап охума сюемен.

 

–  Интернетдеги «Анжини» къаравчуларыны «къонакъююне» гиреген кююнг боламы?

 

– Озокъда, бары затны охуйман къоймайлы!

 

Кёп савбол, Исламнур, баракалла! Бизин газетни редакциясы да, охувчулары да шу баянлыгъынгдан сонг сагъа бирден-бир бек агьамият бережек. Сен шону билгенни сюемен. Сен «Анжиде» биргине-бир къумукъ футболистсен, даражангны тас этме. Биз де сагъа муратларынга етмекни, уллу уьстюнлюклеге етишмекни ёрайбыз. «Реал» Мадридни сос­тавында сени гёрме сюебиз!

 

– Сиз де кёп савболугъуз! Сизге де баракалла! «Ёлдаш» газетни охувчуларына менден салам айтыгъыз! «Ёлдаш» газетни редакциясыны бары да охувчуларын да Ораза байрам булан къутлайман.

P.S. Къаттыгюн Исламнур оюнну ахырында, Шамил Асилдаровну алышдырып, «Волгарь» Аштархан булан ойналагъан оюнда футбол майдангъа чыкъды. Исламнур оюнну яхшы якъгъа алышдырды, ону пасындан «Анжи» аштарханлылагъа экинчи голну гийирди.



Шарабутдин КИШИЕВ.


Авторизация
*
*
Регистрация
*
*
*
Согласны с условиями сайта?
Генерация пароля