Гюч сынадылар

         Магьачкъала, Хасавюрт, Дербент шагьарлардан, Бабаюрт, Хасавюрт, Дербент ва Магьарамгент районлардан гелген атлетлер эки гюнню узагъында оьзлени гючюн сынадылар.

        Ярышларда биринчи ерни алгъан атлетлер ювукъ арада Нальчик шагьарда оьтгерилежек Темиркъазыкъ-Кавказ федерал округунда оьтгерилежек ярышларда ортакъчылыкъ этежеклер. Шоланы арасында Бабаюрт районну спорт школасыны спортчулары да бар.

      Солтанали Дибиров, 85 кило авурлукъда рывокда – 132, толчокда 170 кило гётерип, Дагъыстанны чемпиону болду. Чемпион атны 105 килодан оьрдеги категорияда рывокда – 160, толчокда – 190 кило гётерип спортну устасы Уллубий Бийболатов къазанды. Эки де чемпионну ярышлагъа район спорт школаны тренери Бийкъылыч Бийболатов гьазирлеген.

      Бабаюрт райондан хамаматюртлу Рамазан Муцалханов 94 килода (тренери Жанхуват Исламов) 126 ва 150 кило гётерип, ярышларда экинчи савгъатгъа ес болду. 62 килода уьчюнчю ерни бабаюртлу Альберт Баширов къазанды.

      Тренер Бийкъылыч Бийболатов гьазирлеген спортчулар яхшы уьстюнлюклер къазанма болдулар.

      – Бизин эки атлетибиз округну чемпионатында ортакъчылыкъ этежегине сююндюк. Бирдагъы бизин атлет Михаил Быканов да биринчи ерни алма аз зат къалды. Бизин Бабаюрт районда авур атлетиканы абурун гётереген ва гьар заман кёмек этеген Дагъыстан Республикада авур атлетика федерацияны президенти Адилхан Гьанакъаевге баракаллабызны билдиребиз. Энни округну чемпионатына гьазирлик гёрежекбиз. Шо ярышларда да савгъатлы ерлер къазанма къаст этежекбиз, –деди Бийкъылыч Бийболатов ярышлардан сонг.

      «Эндирей» деген спорт школадан (директору Алик Асакъаев) Тимур Болатов 69 кило авурлукъда экинчи савгъатгъа ес болду. Шо спорт школадан къатынгишилени арасында Жамиля Агъалавова 69 кило авурлукъда Дагъыстанны чемпиону болду. 75 килода чемпион атны хасавюртлу Айзанат Мурзаева къазанды. 56 килода хасавюртлу къумукъ улан Элдар Къанболатов уьчюнчю ерни алды.

И. ГЬАЖИЕВ.

Суратда: (ортада) Уллубий Бийболатов.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля