Россияны жыйым командасында ортакъчылыкъ этген спортсменлени бириси – Дагъыстандан, бизин районну Оьр Къазаныш юртундан чыкъгъан улан. Болат Изутдинов 1992-нчи йылда тувгъан, Оьр Къазаныш юртдагъы орта школаны охуп битдирген. Школада охуй туруп да ол тренери Арсен Орусхановну ёлбашчылыгъы булан спортну ябушув журалары булан иштагьлангъан.
Буйнакск шагьардагъы медицина училищени спорт залында тренер Сайит Жанболатовну къасты булан тхеквандо ябушувну терен сырларына тюшюнген сонг, ол Москва шагьардагъы пачалыкъ университетни физкультура факультетине охума тюше ва тренери Вадим Ивановну башчылыгъы булан спортда яхшы натижалагъа да етише. Тхеквандо ябушувдан Дагъыстанны 4 керен чемпиону болгъан Болат Изутдинов 2012-нчи йылда Москва шагьарны чемпиону деген атгъа да ес бола.
Дюньяны кубогун къазанмакъ учун Мексикада оьтгерилген турнирде Россияны жыйым командасы инг алдын Американы Бирлешген Штатларыны ва Францияны жыйым командаларындан уьст болуп, Мексиканы гючлю командасы булан тенге-тенг ябушуп, оьзлени «В» группасында биринчи болгъанлар. Турнирни ярым финалында олар ябушувну тхеквандо журасыны кюрчюсюн салгъан Къыбла Кореяны гючлю командасын 51:38 санав булан утма бажаргъан. Экинчи бёлюкдеги Иранны командасын 45:39 санав булан утуп, Мексиканы жыйым командасы да финалгъа чыкъгъан.
Финалдагъы ёлугъувланы россиялы спортчулар оьр даражада оьтгерме бажаргъанлар ва Мексиканы командасын 29:26 санав булан утуп, дюньяны кубогун къазанмакъ учунгъу турнирде чемпион атгъа ес болгъанлар.
Булай уллу халкъара ярышларда къазанылгъан алтын медаллар Россияны тхеквандо командасыны 2014-нчю йылда етишген тенгсиз уллу уьстюнлюгю болуп токътай. Россияны жыйым командасында болуп 63 кило авурлукъда оьзюн лайыкълы кюйде гёрсетме бажаргъан бизин якълы кочап Болат Изутдиновну, ону тренерлерин, дос-къардашын булай уллу уьстюнлюгю булан гьакъ юрекден къутлайбыз.
Казим КАЗИМОВ.
Суратда: дюньяны кубогун утгъан Россияны командасы.
