Европада – эки алтын медаль

Магьачкъаладагъы «Динамо» деген хас Олимпия спорт школадан таргъулу Исмайыл Гьажиев 46 килода финалда азербайжанлы Эльвин Намазовну 12:10 санав булан утуп, биринчи ерни алгъан.

Финалгъа етишгенче таргъулу кочап немис кочапны 10:0, эрменилини 10:0, словакиялыны 4:0 ва ярымфиналда украинлини 4:2 санав булан утма болгъан. Исмайыл Гьажиев – Дагъыстанны, СКФО-ну ва Россияны чемпиону.

Ол гьали оьрюм яшланы Олимпиада оюнларында ортакъчылыкъ этежек. Ону ярышлагъа белгили таргъулу кочап, Да­гъыстанны жыйым командасыны баш тренери Пахрудин Залибеков гьазирлеген.

Грек-рим ябушувдан Кахулайда тувгъан ва гьали Калининград шагьардагъы Олимпия училищени тарбиялавчусу Арслан Зубайыров (тренери Василий Хромов), 58 килода финалда эрменили кочапны 10:2 санав булан утуп, Европаны эки керен чемпиону болду. Бу – яш кочап учун уллу уьстюнлюк.

Кахулайлы улан да Китайгъа баражакъ. Арслан Россияны эки керен чемпиону да дюр. Ол Темиркъазыкъ-Къыбла федерал округда да уьч керен уьст гелген. Бир нече уллу халкъара турнирлени чемпиону да болгъан. Артдагъы уьч йыл Арслан яшлардан къурулгъан Россияны жыйым командасына гирген.

Эки де бизин яшгъа йыракъ Пекинде уллу уьстюнлюклер ёрайбыз.

 

Суратда: И. Гьажиев тренери П. Залибеков булан. 

Авторизация
*
*
Регистрация
*
*
*
Согласны с условиями сайта?
Генерация пароля