Биринчи кругда «Балтика» Дагъыстангъа гелгенде, къонакълар кёп аста, бек къоркъуп ойнагъан эди. Шону натижасында «Балтикагъа» Магьачкъаладан бир очко алып гетме насип болду. Шо шартны да эсине алып, бизинкилер Калининграддагъы оюн башлангъаны булан футбол майданны есилерин оьзлени къапусуна къыса башлады

Биринчи таймны лап да башында командалар бир-бирини къапуларыны алдында къоркъунчлу мюгьлетлер де яратды. Оюнну 14-нчю минутунда «Анжини» узакъ чапгъыныны натижасында Амаду Мутари  «Балтиканы» къапусуна ургъан топну, къапучу Георги Шелия гери ургъан топ оьзюню якълавчусу Сергей Цукановну  бутуна тийип, къангып Шелияны къапусуна гирди. Шолайлыкъда, оюнну санаву 0:1 болду.

Арадан эки минут гетип, Янник Боли калининградлыланы якълавчуларыны агьамиятын оьзюне бакъдырып, бош къалгъан Мутариге пас берди. Амаду да къапуну арек мююшюне уруп, оюнну санавун 0:2 этди.

Биринчи таймда «Анжини» оюнчулары, азындан, дагъы да уьч топ гийирме болагъан  мюгьлетлерден пайдаланып болмады. Янгыз Болини ургъан эки тобуну бириси есилени къапусуну багъанасына, бириси де гёнделен багъанасына тийди.

Танапусдан сонг да «Анжи» оюнну санавуна гёре, аста булан ойнамады, футбол майданны есилерине гёре ачыкъ футбол гёрсетди. Оюнну ахырынчы тогъуз минуту бек къужурлу болду. Башлап оюнну 81-нчи минутунда Комковну орнуна чыкъгъан Александр Алиевни штрафнойдан берген пасындан Илья Максимов башы булан уруп оюнну санавун 0:3 — ге чыгъарды.

Уьчюнчю голну гийирген сонг, бизин футболистлер  оюнну югенлерин бираз бош этди. «Балтика» буса оьзлени къапусуна гирген голдан сонг футбол майданны ортасындан башлангъан биринчи чапгъынын «Анжини» къапусуна голгъа айландырды. Бизин якълавчу Алексей Аравинни хатасындан пайдаланып, футбол майданны есилерини чапгъынчысы Зинович «Анжини» къапусуна гирген биринчи голну автору болду.

Голдан сонг дёрт минут да гетмей, Зюзинс дейген «Балтиканы» ярым якълавчусуну арекден ургъан, айтардай къоркъунчлу тюгюл тобун, бизин сав оюнну хатасыз оьтгерген къапучубуз Кержаков хапарсыздан эки де къолуну арасындан къапуну ичине  йиберип  къойду. Шолай оюнну санаву да 2:3 ерге гётерилди.   «Анжи» бирден эс табып, оюн битип къалгъынча калининградлылагъа дагъы оьзлеге топну алма къоймады деп айтса да ярай.

Оюн битгенде болагъан прес-конференцияда оьтгерилген оюнну барышында усталыкъ ва сынав оьр болгъангъа футбол майданны есилерини баш тренери де рази болду.

 Сергей Ташуев буса оьзюню командасы гёрсетген оюнну 82- нчи минутуна ерли разилигин ва сонггъу оюнуна къарсалагъанын яшырмады.

 

 

 

Шарапутдин Кишиев.

Суратда: Кержаков «Анжиге» гирген голдан сонг.