«АНЖИНИ» ПАЙДАСЫНА ТАМАМЛАНДЫ

Бу оюнгъа «Анжини» якъламакъ учун Дагъыстандан гелгенлени ва Аштарханда яшайгъан бизин якълыланы санаву ерли «Волгарны» къаравчуларындан бир де кем тюгюл эди. Оьз командасын якълап этеген оланы къувуну да аштарханлылардан хыйлы артыкъ эди.

Ёлугъувну башындан ахырына ерли бизинкилер майданны есилеринден хыйлы бажарывлу, сынавлу ва чалт экени бары къаравчулагъа гёрюндю. Шондан къайры да, аштарханлылар савлай командасы булан артгъа тартылып, не амал этип буса да «Анжини» чапгъынларын гери урмакъдан башгъа дагъы гьаракат гёрсетмеге болмагъанын оюнгъа къарагъанлар барысы да гьис этди десем, бир де янгылыш болмасман.

Оьтгерилген шо ёлугъувну 90-нчы минуту битгинчеге майданны есилери бизинкилеге бир сама къоркъунчлу мюгьлет тувдурма къоймай бажарды. «Волгарны» баш тренери Юрий Газзаев оьзю ёлбашчылыкъ этеген командагъа къуршалгъанлар оюнну оьтгермек учун тюз ёлну танглагъаны да белгили болду.

Шолайлыкъда, оюнгъа гёрсетилген 90 минут битген сонг, судья Кирилл Левников оюнгъа дагъы да уьч минут къошду. Шо уьч минут да гьали битди, дагъы битди деген мюгьлетде майданны есилери чатакъ салып, бизин ярым якълавчу Беришаны йыкъды. Шолай штрафной майданны есилерини къапуларыны ювугъунда белгиленди. Шо штрафнойдан берилген пасдан пайдаланып, Янник Боли оюнну санавун да, Дагъыстандан гелген юзлер булан къаравчуланы да юреклерин ачды!

Оюн «Анжи» команданы пайдасына 0: 1 санав булан тамамланды. Гьали энниден сонг, ачыкълашдырып айтгъанда, майны 27-синде «Анжи- Аренада» экинчи оюн оьтгерилежек. «Анжи», шо оюнну да утуп, премьер — лигада оьзюню ерин сакълажагъына къаравчулар гьакъ юрекден инана.

 

 

Шарапутдин КИШИЕВ.

СУРАТДА: «Анжи» «Волгарь» команда булан оьтгерген оюнуну къыставуллу бир мюгьлети.

Авторизация
*
*
Регистрация
*
*
*
Согласны с условиями сайта?
Генерация пароля