Экинчи оюнун бизинкилер москвалы, Россияны тогъуз керен чемпиону «Спартак» булан ойнады. 0:1 санав булан утдурса да, команда сезонну лап да башында маъналы оюн гёрсетди.

     «Анжи» уьчюнчю оюнун да Белоруссияны Солигорск шагьарындан гелген «Шахтёргъа» утдурду. Шахтёр оьз чемпионатында уьчюнчю ерде буса да, Белоруссияны кубогуну бу йылгъы еси буса да, мен ойлашагъан кюйде, «Анжи» шо командагъа утдурма герекмей эди.

     Баш тренерибиз Ташуев айтгъан кюйде, гьали командагъа контроль оюнланы санавлары, натижалары биринчи ерде тюгюл. Биринчи ерде – гележекге гьазирликни масъалалары. Сонг да, яшлар, биз алдагъы номерде эсгерген кюйде, кёп авур атлетика ва чабыв булан байлангъан упражнениелерден бираз мою­гъан, къавшалгъан кююнде ойнады.

     Тек къаравчулар бу Ташуевни айтывлары булан рази тюгюл. Уьч оюнда бир гол да гийирмеген команда кимни де къарсалатар..

     Сезон башланма бир жумадан бираз къолай къалгъан, къара­йыкъ!

     Он дёртюнчю мартда «Анжи» Санкт-Петербургда ерли «Динамо» булангъы оюну булан бу сезонну экинчи бёлюгюн ача.

Шарапутдин КИШИЕВ.