Республиканская еженедельная общественно-
политическая газета «Елдаш» (Спутник)
Меню DAG.news БЛОГОСФЕРА "ВРЕМЕНА" ПОЛИТИКА ЭКОНОМИКА ОБЩЕСТВО СПОРТ
Республиканская еженедельная общественно-политическая газета «Елдаш» (Спутник)
"ЁЛДАШ" ГАЗЕТ

...Эрте-геч лакъырны башлама тюшежек


Бугюнлерде бютюн Россияда эки тюрлю чара оьтгериле. Бириси – гетген асруну 30-нчу йылларында пачалыкъны жазалав «тирмен ташларыны»  арасына тюшюп, къысматы кюлдей болгъанланы, Сибир бойлардагъы туснакъланы бары да акъубаларын чекгенлени, гьюнагьсыз гюллеленгенлени эсге алагъан пашман гюн. Шону  биз  адатлы гьалда гьар йыл октябр айны 30-нда оьтгеребиз. Арты булан, арадан бир жума да гетмейли, ноябр айны 4-нде Россияны халкъ бирлигини гюнюнде шатлы мажлислерде жы­йылажакъбыз.


Мен шо гюнлени бир-бири булан байлап, ювукъ этип  эсгерегеним негьакъ тюгюл. Биз гьали де, 80-90 йыллар оьтгенде де,  къайгъылы 30-нчу йыллагъа байлавлу бир умуми ойгъа, гьасилге гелип болмай бусакъ, бирликни гьакъында сёйлеме чакъы гьалыбыз бармы?! Биревлер Сталинни макътап, кёклеге чююп, Янгы Къаягентде йимик, огъар эсделик сала яда Магьачкъаладагъы вузланы бирисинде йимик, уллу бинаны тёр тамына ону залим суратын иле. Оьзгелери буса бугюн де Сталинни налатлайлар, ону девюрюнде ювукъ адамларына, анадаш юртларына, миллетине болгъан заралны-дертни унутмайлар.


Къумукълар шо йылларда тарыгъан тас этивлеге гьали де тийишли, дурус  къыймат берилип битмегендир деп эсиме геле. Эл арада шо масъаланы  ачыкъдан, биревню де бетин этмейген кюйде, мекенли лакъырны башламакъдан бир тамаша тартыныв бар йимик гьис этиле. Озокъда, заман гетип, хыйлы зат унутулар, юрек дертлер солкъ болар. Амма эрте-геч шо лакъырны башлама тюшежек.


Къумукълар 30-нчу йылларда лап да айтылгъан асил адамларын тас этген. Миллетини аркъатаявлары Жалалутдин Къоркъмасов, Абусупиян Акаев, Темирболат Бийболатов, Юсуп Гереев, Багьавдин Астемиров, Абдул-Гьюсен Ибрагьимов, Абумуслим Атаев, Рашитхан Къапланов… Къайсын бирисин айтарсан? Биз бугюн де шо зор тас этивлени аччы емишлерин татыйбыз, яшавубузда сезебиз.


Биз бир миллет болуп, бугюнге ерли де ватаныбызда 30-нчу йылланы къурбанларына умуми эсделик салып болмагъанбыз. Нете, тарихине арт берген, етти атасын танымайгъан мангушлагъа дёнме хыялыбыз бармы? 30-нчу октябрде шо пашман  гюнню Россияны хыйлы шагьарларында белгиледилер. Къайгъылы чараларда уьлкени президенти де ортакъчылыкъ этди. Дагъыстанда буса милли китапханадагъы жыйын булан тамамланып къалдылар. Къумукъ жамият къурумланы янындан да бир сиптечилик де гёрсетилмеди. Гьали дагъы йылгъы 30-нчу октябр­ге ерли къарап турайыкъмы?


Количество показов: 30
04.11.2017 00:00
|
Рейтинг ()

Возврат к списку


  • Роспотребнадзор - Спецпроек








   МЫ В СОЦИАЛЬНЫХ СЕТЯХ:












AlfaSystems massmedia K3FN2SA