Республиканская еженедельная общественно-
политическая газета «Елдаш» (Спутник)
Меню DAG.news БЛОГОСФЕРА "ВРЕМЕНА" ПОЛИТИКА ЭКОНОМИКА ОБЩЕСТВО СПОРТ
Республиканская еженедельная общественно-политическая газета «Елдаш» (Спутник)
"ЁЛДАШ" ГАЗЕТ

Дагъыстанда гьал яхшы янына алышынма умутлу

     

Дагъыстан Республиканы Башчысы Р.Абдулатиповну ишинден азат этиливю хыйлы халкъны юхусундан уятгъандай сесгендиргенин о гюнлерде адам арада кёп эшитмеге бола эди. Дагъыстан Республиканы баш гьакими этилип Москвадан янгы адам йиберилгени де бизин дагъы да бек сесгендирди. Неге тюгюл, бу гезик Дагъыс­тангъа бизин якъда тувмагъан ва яшамагъан башгъа адам гелди. Ону геливю булан дагъыстанлылар оьзлени кёбюсю яхшы умутлары да яшавгъа чыгъар бугъай деп ойлашагъанына шек ёкъ.

Республикагъа ёлбашчылыкъ этмеге кёп йыллар Россияны ич ишлер министерлигинде оьр къуллукъларда генерал-полковник чинге ерли ишлеген ва артда да Россияны Пачалыкъ Думасында къайратлы гьаракаты булан оьзюн гёрсетген Владимир Абдуалиевич Васильев белгиленгени бираз ойлашдыра. Балики, бизин республикада макътардай гьал ёкъ экени саялыдыр…

Дагъыстанда гьалиги заманда нечик гьаллар адамланы яшавларына зарал гелтирегенни гьакъында айтма тарыкъ деп эсиме геле. О да, биринчилей, бизин респуб­ликада коррупция «семирегенлик». Коррупцияны тайдырмакъ учун чаралар гёрюле деп кёп сёйленсе де, халкъгъа гёрюнеген иш этилмей эди. Йыл сайын дагъы да яман болагъанын айрокъда аз харж булан яшайгъан адамлар гьар гюн йимик гьис этип турду.

Гьакимлени бирлери намусларына гёре юрюмей. Урушбатчылыкъ халкъ арагъа сингип яшай. Не эте бусанг да, урушбатчылыкъгъа ёлугъасан. Шо шайтан къуллукъ шонча да мекенлешген чи, гьатта бермесе де ярайгъан гезиклерде де арив болмас деп ойлашагъан болуп къалгъанбыз. Оьзлюгюнден урушбат берме онгарылгъан къол узатылып къала.

Дагъыстанны Башчысы болуп гелген Владимир Васильев – Дагъыстанны Уллу Ватан давдан сонггъу тарихинде къырдан гелген биринчи ёлбашчы. Ол бизин бусурман республикагъа къыйышмай деп айтагъан авазлар да, астаракъ чалынса да, бир-бир мююшлерден таба эшитиле. Дагъыстан Россияны ичинде яшайгъан республика. Ону ватандашларына оьзлер сюйген динни юрютмеге бирев де пуршав этмей. Бизин республиканы къайсы йыллардагъы баш гьакими къачан межитлеге юрюй къалгъан эди? Коммунистлени заманында динге къаршы гьаракат юрютеген атеистлер де оьр гьакимлик къуллукъну юрютюп турду. О заман бирев де гьеч сёз айтмай эди.

Биринчилей бизин республиканы кётюр этеген – коррупция. Огъар къаршы мекенли дав этеген адам тарыкъ. Коррупция кёп сёйлеген булан, ябушабыз,– деп артыкъ макътангъан булан гетеген «душман» тюгюл. Душманны буса яда оьлтюрме тарыкъ, яда къоркъутуп къувалама герек.

Урушбатчылыкъ да оьтесиз яман аврув. Ону да бир янсыллы этмей туруп, Дагъыстанны не экономика, не де маданият оьсювю болмажакъ экени къайсыбызгъа да белгили. Бюджет къайдада охутув ишлер юрюлеген касбу билим берив ожакълагъа гьавайын охума тюшмеге бажарыламы? Машин гьайдавчудан кёп зат ёкъ, автошколаларда яшлар нечик охуй? Олар дарслагъа юрюймю яда олагъа охугъан деп шагьатнама кагъызлар берилип къаламы? Бу ёрукълу соравлагъа жаваплар да къаравуллама тарыкъ тюгюл. Халкъ ону яхшы биле. Билсе де, гьакимлени кёплери оьзленикин юрютюп туралар.

Гьалиги заманда Россияны Президентини Администрациясына арз кагъызлар йиберме оьтесиз тынч. Интернет почта байлавлукъ булан бир-нече секундну ичинде олар йиберген еринге барып токътай. Оланы язгъанлагъа да кёмек этилсе тюгюл, бир янындан да яманлыкъ болмай. Москвагъа язагъанлар да кёп болгъандыр. Москвада да биздеги гьалны бек яхшы англай. Бизге гелген ёлбашчыны иш ёлун, яшав ёлун охугъандокъ, ол ким экени гёрюне. Бугюнлерде Россияны Президенти Дагъыстангъа шолай адам тарыкъ деп ойлаша буса, Дагъыстандагъы гьал четим де дюрдюр...

Владимир Васильев Дагъыстанны яхшы таный. Халкъына абур этегенин ва халкъ булан бирликде ишлежегин ол Президент Путин булан янгы къуллукъгъа белгиленегенини гьакъында сёйлемек учун Кремлге чакъырылгъанда да англатыв берген. Балики гьал яхшы янына алышынар.

 



Количество показов: 22
26.10.2017 00:00
|
Рейтинг ()

Возврат к списку


  • Роспотребнадзор - Спецпроек








   МЫ В СОЦИАЛЬНЫХ СЕТЯХ:












AlfaSystems massmedia K3FN2SA