ХАЛКЪНЫ АМАНЛЫГЪЫ – БИРИНЧИ ЕРДЕ

Жыйынны ача туруп, комиссияны председатели, районну ёлбашчысы Жамболат Салавов артдагъы йылларда террорчулукъ яндан алгъанда Хасавюрт бойдагъы гьал тергевню тюбюнде экенни айтды.

–Тек бизге тергевню осаллашдырма ярамай, уьстевюне, халкъ кёп жыйылагъан ерлерде айрыча сакълыкъ болдурма герек, – дей ол. – Биринчи сентябрде бары да школаларда билимлени гюнюне багъышлангъан линейкалар оьтгерилежек. 18-нчи сентябрде буса Россияны Пачалыкъ Думасына ва Дагъыстанны Халкъ Жыйынына сайлавлар болажакъ. Шо гьакъда гьали-гьалилерде Къызлар шагьарда болгъан генгешде де эсгерилди. Юрт башчылар, дружинниклер башында полицияны къуллукъчулары да булан шо чаралар къавгъасыз ва низамлы оьтмекни гьайын этме ва шо ерлерде аманлыкъны болдурма герек.

Шо масъалагъа гёре район комиссияны секретары Руслан Амаев яшлар каникуллардагъы заманда бары да 53 школа тергелгенни эсгерди. Кемчиликлер гёрсетилген ва шоланы тайдырма заман да берилген. Тийишли къуллукъчуланы ва АТК-ны вакиллери булан къурулгъан комиссия бары да ерлени тергеген. Ол билдирген кюйде, бары да школаларда «къувунлу кнопкалар» ишлей ва видеокамералар салынгъан. Янгы охув йылгъа багъышлангъан линейка оьтгереген заманда полицияны къуллукъчусу ва 10 дружинник тергев болдурагъанны да эсгерди.

Районну билим берив управлениесини начальниги Абдулла Абдуллаев айтагъан кюйде, бу охув йылда школаларда 22 мингден де артыкъ яш охужакъ. Шоланы сиягьлары да алданокъ гьазирленген болгъан. Бугюнлерде гьакъылбалыкъ болмагъан яшланы арасында жинаятчы ишлерде ортакъчылыкъ этгенин-этмегин билмек учун, ич ишлер бёлюгюнде гьисапгъа алынгъанлар бары-ёгъу тергев этиле.

Герей Гереев билдирген кюйде, билимлени ва сайлавланы гюнюнде ич ишлени къуллукъчулары артдырылгъан гючлер булан халкъ кёп жыйылагъан ерлерде аманлыкъ болдура. Шону кютмек учун бары да зат гьазир. Бёлюкде гьар ким не этме гереги язылгъан.

Хасавюрт районну территория сайлав комиссиясыны председатели Къазбек Алхаматов 18-нчи сентябрге нечик гьазирлик барны гьакъында айтды.

–Районда 69 сайлав участка бар, шолар бары да сайлавлагъа гьазир, – дей ол. – Бары да сайлав участкаланы председателлери булан календар плангъа гёре жыйынлар ва генгешлер оьтгерилген, оьтгерилип де тура. Сайлавчуланы санаву да токъташдырылгъан ва бизин районда 96140 сайлавчу бар. Хасавюрт район 3 регион бёлюклеге бёлюнген: биринчисини центры – Яхсайда, экинчисиники – Бамматюртда ва уьчюнчюсюнюки – Муцалавулда. Эгер сайлавланы заманында токлар тайып къалса деп де гьазирликлер гёрюлген. Мен бугюн токъташдырып айтма боламан: бары да сайлав участкалар сайлавлагъа гьазир.

2015-нчи йылда дин бёлюкню, полицияны, гьакъылбалыкъ болмагъан яшланы ишлерине къарайгъан бёлюкню, врачланы ва АТК-ны вакиллеринден къурулгъан группа школалагъа барып, яшланы арасында ачыкъ лакъыр этип, олагъа террорчулукъны зияны гьакъда лекциялар охуп турдулар. Ондан къайры да, шо лектор бёлюк иш къурумланы ишчилери булан да ёлугъувлар оьтгерип турду. Шо гьакъда дин ишлеге къарайгъан комиссияны касбусучу Исрапил Давутгьажиев де айтды.

Жыйынны давам эте туруп, районну башчысы АТК-ны жыйынына уьч юртну башчыларын да чакъыргъанны эсгерди. Темиравул администрацияны башчысы Алик Зурхаев, Кёкрек юртну башчысы Мирза Муртазалиев ва Покровское юртну башчысы Марат Хункаров да оьзлени юртларында АТК-ны ишлери нечик юрюлегенни гьакъында гьисап берди.

Жыйынны битдире туруп, районну башчысы Жамболат Салавов жыйылгъанлагъа гьарисинден не иш гьасил бола буса, этмекни тапшурду. Ингдеси, биз халкъ­ны аманлыгъын сакълама герекбиз. Шо бугюнлерде –инг аслу борч, деди ол.


Гебек КЪОНАКЪБИЕВ,

оьз мухбирибиз.

СУРАТДА: Хасавюрт районну АТК-сыны гезикли жыйынындан гёрюнюш.

Материал подготовлен в рамках реализации государственной программы РД “Комлексная программа противодействия идеологии терроризма в Республике Дагестан на 2016 год”.

Авторизация
*
*
Регистрация
*
*
*
Согласны с условиями сайта?
Генерация пароля