Террорчулукъну ва экстремизмни идеологиясындан арек болмакъ учун


Ону къайгъысына къаршы юрюлеген профилактика гьаракат–аслу къуллукъ


Оьзюне АТК (Антитеррор комиссия) деп ат тагъылгъан къурум къурулгъанлы олай кёп болмаса да, комиссия республиканы оьзге ерлеринде йимик Буйнакск районда да гьаракат этип оьзюню ишин яхшылашдырмакъны ва агьамиятлашдырмакъны гьайын этип чалыша. Бир нече гюн алда мен Буйнакск районда шо къурум гёреген иш булан таныш болмакъ учун районда болдум ва шо ишни яшавгъа чыгъарылывунда жаваплы бир нече адамлар булан лакъыр этдим.



Антитеррор комиссия иш гёрегенли хыйлы алмашынывлар болгъан. Районну Антитеррор комиссиясыны председателини заместители Мурат Агьматзиявутдинов билдиреген кюйде, шо яман ёлгъа бакъма болар йимик яда гьёкюнюп тюз ёлгъа бакъгъанлар булан, оьлтюрюлген террорчуланы ювукъ адамлары булан, олай да районну территориясында турагъан тыш уьлкелерден гелгенлер булан да профилактика иш юрюле. Заманлыкъ ишлерде тышдан гелип ишлейгенлер булан да шолай профилактика къуллукъ оьтгериле.



Недир шо профилактика иш, гьаракат яда къуллукъ? Уьч де синоним сёзлер огъар бек арив къыйыша. Бу соравгъа да ол булай деп жавап бере:



– Антитеррор гьаракатны агьамиятлыгъы да, ону гьасиллери де, гьатта гючю де кёбюсю гьалда ихтиярлар якълав къурумланы шо ёлдагъы оьзлени гёз алгъа тутулгъан ишлерин мекенли кюйде яшавгъа чыгъарагъанындан гьасил бола. Эгер де къуллукъчу ишин этилегенине жавап бермек учун кюте буса, ондан бир умпагьат да ёкъ. Этмесе ярамай, гьакимлер шолай борч салгъан деген къуллукъну пайдасы уллу болмай. Ону гьакъ юрекден англама тарыкъ. Террорчулукъгъа къаршы иш шолай, гьар кимни де жавапчылыгъын тарта, ойлашдыра, оьзюн де шогъар къошум этме чакъыра. Неге тюгюл, халкъ атылтывланы, оьлтюрювлени яны бир заманда да болмажакъ.


Террорчулагъа кёмек этгенлер де оланы сыдыраларына гире



Экстремистлени аслу мурады, озокъда – оьзлени сыдыраларына болгъан чакъы кёп адамны къуршамакъ. Ону учун да олар жамият арада тюз иш юрютегенлер болуп, оьзлени гюнагь ишлерине оьзгелени де тартма къаст этип айланалар. Кёбюсю жагьиллер шону англамай къала. Яхшы ишге къошулайым деп, кёп ойлашмай, оланы тузагъына тюше. Тузакъдан къутулма бек къыйын. Кёбюсю чю, англаса да, не этегенин билмей оьлюп гетелер.



Агъачлыкъларда яшынып юрюйгенлер гьали аз. Буйнакск районда бир вакъти кёп эди. Шо себепден болма да ярай, ерли орманлыкъ хозяйствону, шагьарны оьр янында, агъачлыкъ булан дазу ерде уллу, эки къабатлыкъ кантора бинасы бар эди. Ону къырыйында агъач ишлетеген цехлер де бар эди. Гьали орманлыкъ хозяйствону къуллукъчулары шагьарны ичиндеги бир бинада бир нече уьйню ичине сыйынгъан. Неге тюгюл, агъачда турагъанлардан къоркъгъан. Гелип оьлтюрюп гетер деп къоркъмаса да, олагъа кёмек этме тюшер деп эсине гелгендир. Кёмекден къачса, оьлтюрме де бола. Къачмасанг, «Террорчулагъа кёмек этгени учун» деген статьягъа гёре такъсырланажакъсан…



«Агъачлыкъда яшайгъан террорчулагъа кёмек этмесе, озокъда, олар гюлледен оьлмесе, ачындан оьлер эди. Шо саялы антитеррор ишни мекенлешдире туруп, шолай статья да чыкъды», – дей мени булан хабарлай туруп Буйнакск районну Антитеррор комиссиясыны председателини заместители Мурат Агьматзиявутдинов.



Буйнакск районну Антитеррор комиссиясыны председатели, район администрацияны башчысы Камил Изиев айтагъан кюйде, гьали де районну савлукъ сакълав ва билим берив идараларында террордан сакъ болувну масъалаларына айрыча агьамият бериле. Сакълыкъ болдурмакъ учун кёп иш этиле. Профилактика да – болмаса бажарылмайгъан къуллукъ.



Школаларда яшлар булан оьтгерилеген чараларда къыс­тавуллу гьаллар болуп гетсе не этме тарыкъ, шону яшлар билме герек. Яшлар бугюн гиччи буса да, тангала уллу болар. Олар террорчулагъа къошулма ярамайгъанны билгенинден къайры, олагъа бир кёмек де этме ярамайгъанны да англама герек.


Комиссияны генгешлери, школалардагъы антитеррор чаралар



Антитеррор комиссияны генгешлеринде оьзлени этилген ишлери тюгюл, этилме герекли ишлени гьакъында да сёз юрюле. Инг де агьамиятлы иш – школаларда оьтгерилеген чаралар. Коридорларда да шо темагъа байлавлу сурат стендлер де илинген. Халимбекавул орта школада да шолай. Школаны директоруну тарбиялав ишлеге къарайгъан заместители Ума Килясханова хабарлайгъан кюйде, шолай чаралар оьтгеривню оьтесиз уллу агьамиятлыгъы бар. Яшлар сакъ болувну уьйрене, террорчулардан арек болуп турмакъны гьайын эте, олагъа къошулсанг, оьзюнгню ва къардашларынгны нечик четимликлеге салагъанны англай.



«Яшланы тарбиясына террорчулукъгъа къаршы иш юрютювню уллу терегини бир бутагъына бир нече япыракълары къатнашса да, гележекде жамият арада аманлыкъны сакълавгъа хыйлы пайда гелтирме бола», – дей дагъы да сёзюн узата туруп Ума Килясханова.



Октябр айны биринде оьтгерилген Антитеррор комиссияны генгешинде де Буйнакск районну билим берив управлениесини начальниги Аида Залимханова районну школаларында террорчулукъну ва экстремизмни идеологиясына къаршы профилактика иш мекенли кюйде яшавгъа чыгъарылагъанны эсгерди.



Озокъда, англатыв ишни бек агьамияты бар экени англашыла. Инг аслусу, жамият арада шо уллу жинаятчылыкъгъа къаршы юрюлеген гьаракатда халкъ да ортакъчылыкъ этегени яхшы. Гележекде шо къайгъыны жамият арадан арек этип, болмагъандай токътатмагъа бажарылажакъгъа инанмагъа себеп тувдура.



Авторизация
*
*
Регистрация
*
*
*
Согласны с условиями сайта?
Генерация пароля