ЭЛИНГ САГЪА ЯТГЪА ЙИМИК ЯНАШСА…

       Ят эллерде солтан болгъанча, оьз элингде ултан болгъан яхшы дей къумукъ айтыв. Ата- бабаларыбызны гьакъыл сёзюне бир де шеклик этмеймен. Оьзюм де хыйлы йыллар ят тарапларда туруп, инсангъа анадаш элинден аявлу ер болмасгъа мекенли тюшюнгенмен. Гьасирет Ватанынг гьар тюрлю пачалыкъ къурумланы атындан сени къайтывунга тогъаслар салма къараса да, ахырда бары да тергев къалмагъаллардан оьтюп, дос-къардашгъа, тухум-тайпагъа, миллетинге гене къошулгъанлыкъ шо заманлыкъ онгсузлукъланы унутдура.


Бырынгъы къумукъ айтывгъа гьалиги заманны гёзюнден янашсакъ, анадаш эли гьар ватандашына «солтан» болмагъа, оьр даражалагъа етишмеге имканлыкълар болдурмагъа борчлу тюгюлмю? Бизин макътавлу кочабыбыз Ильяс Бекболатов Азияны чемпиону болгъанны эшитгенсиздир. Тек ол шо дюнья ярышларында башгъа пачалыкъны байрагъыны тюбюнде ябушгъанын билемисиз? Ону уьстюнлюклерини гьюрметине энниден сонг Уьзбекистанны гимни согъула. Огъар бу йыл Токиода оьтгерилежек Олимпия оюнларда ортакъчылыкъ этмеге тувра ёллар ачыла. Оьзюню азиз ватанында Ильясгъа шо гьасиретли умутуна элтеген ёлланы алдына уллу барулар тургъузулгъан эди.


Бизин кочапгъа бакъгъан якъдагъы терсликлер ва къыйыкъсытывлар беш йыл алъякъда башланды.Шо заман тутушуп ябушувдан Россияны чемпионатын утгъан Бекболатовну орнунда дюньяны чемпионатына Ильясгъа халчада   бир нече керен шексиз кюйде утдургъан осетинли С.Рамонов бакъдырылгъан эди. Уьлкени жыйым командасыны баш тренери М.Гьюсейнов неге шолай терс этилгенини себебин англатып болмады.


Ондан сонг команданы башын тутгъан тренер Д.Тедеев де дагъыстанлы спортсменге гьар-бир якъдан чатакъ салма белсенди. Огъар бакъгъан якъдагъы тюзсюзлюклени гёре де туруп, Россияны спорт ябушув федерациясыны президенти М.Мамиашвили де арагъа къошулуп, оьзюню адилли,тюз сёзюн айтма тийишли гёрмеди.


Шо заман Ильясда башгъа пачалыкъ учун ябушма тюшедир деген ой тувду. Ол башлап Венгрияны танглагъан эди. .Тек ябушув федерация   бир тюрлю увакъ-тюек себеплеге илинип, разилигин бермеген эди.


Оьз ватанында якълав тапмагъан янгыз И.Бекболатов тюгюл. Бугюнлерде дагъыстанлы кочаплар Альберт Саритов Румыния учун, Адам Батыров Бахрейн учун, Шарип Шарипов Азербайжан учун ябушалар. Олай дагъы да нече-нече спортсмен бар.


Мен бу ерде бирдагъы бир спортсменибизни эсге алма сюемен. Муса Таймазов бираз алларда Бирлешген Арап Эмиратларында паралимпиецлени (сакъат спортсменлени) арасында енгил атлетикадан оьтгерилген дюнья чемпионатында уьчюнчю ерни алгъан. Гьали огъар да бу йыл Японияда болажакъ Олимпия оюнларында ортакъчылыкъ этмеге имканлыкъ бар. Тек бир затгъа тамаша боласан. Тезден берли спортну халкъара устасы болма тюшеген Мусаны гьали де спортну устасы деген сама аты ёкъ. Дагъыстанны спорт министерлиги гьар тюрлю багьаналар булан шо масъаланы чечмеге алгъасамай.


Муса да, Ильяс да – жагьиллер оьзлерден уьлгю алма тюшеген къоччакъ, адилли ва рагьмулу уланлар. Олагъа гележек Олимпия оюнларда оьр уьстюнлюклеге етишмеге Аллагьутаала кёмек этсин! Шо бютюн миллетибизни уьстюнлюгю болажагъына бир де шекленмеймен.

Авторизация
*
*
Регистрация
*
*
*
Согласны с условиями сайта?
Генерация пароля