ДЮНЬЯ АГЬАМИЯТЫ БУЛАНГЪЫ АГЬВАЛАТМЫ?


Оьтген сонгугюн Бирлешген Арап Эмиратларыны тахшагьары Абу-Дабиде оьтгерилген ярышлар бютюндюнья агьамияты булангъы агьвалатгъа айланып битди десе де ярай. Шону гьакъында язмагъан, айтмагъан бир маълумат къурал да къалмады. Къошулчан ябушувларда америкалы Дастин Порьени утгъан дагъыстанлы спортсмен Гьабиб Нюрмагьамматовну аты данггъа айтылды. Жагьиллени арасында огъар «сужда къылагъанланы», огъар ошама къарайгъанланы санаву баргъан сайын арта. Ону уьстюнлюклери булан уьлкелени башчылары, белгили политиклер, жамият ва маданият чалышывчулар къутлайлар. Гьабиб ябушувну алдында гийип чыгъагъан акъ папах, базарларда лап да кёп сатылагъан баш гийим болуп токътагъан.



Шо гюн гече Гь.Нюрмагьамматовну утуву гьакъындагъы хабар Магьачкъалагъа етишгенде, юхугъа батгъандыр деп турагъан шагьарны орамларын бирден минглер булан жагьиллер еледи. Гьарай-гьурай, къавгъа-къувун, тапанча атышывлар, машин сигналлар…Гьакимлени спортсменге янашагъан къайдасына къарагъанда чы, орамлагъа чыкъгъан яш наслугъа айып этмеге де кюй къалмай. Гь.Нюрмагьамматовну алдында къайсы уллу кабинетни де эшиклери ачыла, не йимик масъаласы да чечиле. Мисал учун, оьзюню аты къоюлажакъ школа къурма сюйгенде, гьукумат къызгъанмай огъар 600 миллион манат гёрсетген.


Тюзюн айтгъанда, спортсменни айланасында юрюлеген гьарасат мени онча кепиме гелмей, бир шоу оюнгъа парх берегендей гьис этемен. Ондан къайры, Гь.Нюрмагьамматовну Интернетден таба ваъзачы болуп гьар-бир затгъа къыймат берегенлигин, гьакъыл уьйретегенлигин огъар бираз саламатлыкъ етишмейму экен деген ойланы тувдура.


Шу хабарны башлагъан сонг, бирдагъы бир затны эсгермей къойма бажарылмай. Шо гюн Абу-Дабиде Нюрмагьамматовдан къайры, оьзлени ябушувларын бирдагъы 5 дагъыстанлы спортсмен оьтгерген эди. Оланы арасында бизин макъталгъан кочабыбыз Муслим Салигьов да бар эди. Эгер де Гьабиб 3-нчю раундда утдурма къылдан-къыл къалгъан эди буса, Муслим биринчи раунд янгы башланып, оьзю булан тогъартма чыкъгъан канадалы Нордин Талебни уруп ерге йыкъгъан эди. Шондан сонг Талеб ябушувну дагъы узатып болмады. Тек шогъар неге буса да маълумат къураллар тийишли тергев бермеди. Къайда къарасанг, бары да ерде янгыз Гь.Нюрмагьамматовну сураты ерлешдирилген.


Спортсменлер алгъан гонорарлагъа къарагъанда да, тамаша болмагъа чакъы зат бар. TheSportsDailu деген Интернет портал аян этген маълуматлагъа гёре, Гь. Нюрмагьамматовгъа ябушувланы оьтгерген къурум 6 миллион доллар тёлежек. Ондан къайры, рек­ламадан, спонсорлардан гелген акъча булан ону гонорары дагъы да шончакъыгъа артмакъ бар. Бизин манатлагъа айландыргъанда, бир миллиардгъа етише-етишмей къала. Алдагъы ябушуву саялы алгъан 2 миллион долларны да санагъанда, уьлкеде бирдагъы бир миллиардерге артыкъ болду деме ярай.


Гьали оьзгелени гонорарларына къара­йыкъ. Муслим Салигьов – 77500 доллар, Омар Агьматов – 72 минг доллар, Ислам Магьачев – 49 минг доллар, Шамил Абдурагьимов – 27 минг доллар, Майирбек Тайсумов – 27 минг доллар. Балики, мен спортну бу журасында юрюлеген къайдаланы бары да сырларын билмеймендир. Буса да, гонорарланы арасындагъы шу даражадагъы башгъалыкъланы дурус гёрмеймен.

Авторизация
*
*
Регистрация
*
*
*
Согласны с условиями сайта?
Генерация пароля