Жаны авруйгъан адам болгъай эди

25 января 2019 в 15:05 536
Жаны авруйгъан адам болгъай эди


Магьачкъаланы башчысын сайлавгъа байлавлу къурулгъан конкурс комиссиягъа 40 адам арза берген. Тюзюн айтгъанда, тахшагьарны лап да уллу гьаким шанжалын «елеме белсенгенлер» шончакъы болар деп бирев де къаравулламай эди. Шо себепден комиссиягъа сайлавланы алданокъ токъташдырылгъан болжалын артгъа теберме тюшген.


Арза бергенлени арасында Пачалыкъ Думадан башлап, юрт жыйынланы депутатларына ерли бар. Ондан къайры, сиягьда гьар тюрлю ерлерде ишлейген пачалыкъ ва муниципал къуллукъчуланы да гёрме болабыз. Бир-бир жамият чалышывчулар да ягъада къалмагъан ва сайлавларда ортакъчылыкъ этме сюегенин билдирген.


Озокъда, законгъа гёре эсгерилген сайлавларда къайсы ватандашны да ортакъчылыкъ этмеге ихтияры бар. Тек сиягьдагъы бары да фамилияланы гёзден гечирип къарагъанда, бир тюрлю соравлар да тувулунмай къалмай. Мисал учун, Магьачкъаладан 130 чакъырым ариде ерлешген Оьр Мулебки деген (Акъуша район) юртдагъы школаны директору не хыяллары булан комиссиягъа арза берген экен? Шо адам бир де шагьарда турмагъан, Магьачкъаланы масъалаларын янгыз газетден яда Интернетден охуп биле. Яда Урахи (Сергокъала район) юрт администрацияны башчысы тахшагьарны тав авул булан тенг гёреми экен? Яхшы, булар чы бир затны башын сама тутгъанлар, тек шо сиягьда Интернетде адамланы онгсуз масхаралары булан кюлетип турагъан белгили видеокомментатор не эте? Шагьарны башчысы болма сюегенлени башгъасы комиссия берген анкетадагъы: «Не касбуну юрютесиз?» деген соравгъа «шоумен» деп язгъан. Ол сайлавланы да бир шоугъа гьисаплаймы экен деген ой тува.


Лап да тамашасы, арза бергенлени арасында судну къарары булан эки керен такъсырлангъан адам да бар. Неге комиссия ону документлерин къабул этгени англашылмай. Озокъда, шолар бириси де конкурсдан оьтмежегин барыбыз да яхшы билебиз. Амма сайлавлардан сонг олагъа: «Бизге тюз янашмады, бизин къыйыкъсытды, палан болду, тюген болду», – деп, терс хабарлар яйып юрюмеге себеплер чи болажакъ.


Кёплер неге шо сиягьда буссагьат шагьарны башчысыны борчларын кютюп турагъан Мурат Алиев ёкъ деп сорайлар. Гертиден де, М.Алиев аз заманны ичинде оьзюню бажарывлу ва гьаракатчы ёлбашчы гьисапда гёрсетип бажарды. Ол – белгили тухумдан чыкъгъан жагьил къумукъ улан. Шагьарда низам салып боларгъа инамлыкъ да бар эди. Озокъда, къайсыбыз да гьали сама тахшагьарны башын миналы, Магьачкъаланы анадаш ерине гьисаплайгъан, ону гележеги учун жаны авруйгъан адам тутар деп къаравуллай эдик. Тек алдындагъы гюн М.Алиев оьзюню Интернетдеги сагьифасында сайлавларда ортакъчылыкъ этмежегин билдирген.


Белгили кюйде, «Единая Россия» деген партияны Магьачкъала бёлюгюню январ айны 15-нде оьтгерилген конференциясында шагьарны башчысына кандидат этилип бир тавушдан Салман Дадаев гёрсетилген. С.Дадаев бугюнге ерли Москвадагъы Басман округну башчысыны къуллугъунда ишлеп гелген. Башлап ону атын арагъа Дагъыстанны Башчысы В.Васильев чыгъаргъан эди.