Шейит-Ханумну шатлыгъы


  


Дагъыстанны халкъ шаири Шейит-Ханум Алишева бугюнлерде оьзюню 70 йыллыкъ юбилейин шатлыкъны шартларында кёп къадардагъы охувчулары булан бирче иштагьланып къаршылай десек, гьакъыкъатгъа къыйышмай къалмас. Оьтген жумада, декабр айны 14-нде, Къумукъ театрда оьтгерилген юбилей шатлыкълар да шону ачыкъдан ташдырды.



Къумукъ милли театрда, гертиден де, поэзияны англайгъан ва огъар айрыча гьюрмет булан янашагъан уллу да, гиччи де жыйылгъан эди. Неге десегиз, Шейит-Ханум яш чагъындан тутуп, оьзюне илгьам берген биринчи шиъруларына къошум гьисапда яшланы-яш охувчуланы бугюн де яратывчулукъ усталыгъы булан юреклерине ёл таба… Яш охувчулар учун «Къарчыгъа» деген къумукъ тилде чыгъа­рылагъан журналны баш редактору да дюр.



Шейит-Ханумну шатлыкъ ахшамы Дагъыстанны Халкъ Жыйыныны Председатели Хизри Шихсайитовну Къутлав кагъызы булан ачылды. Къутлав кагъызны буса ону заместители Камил Давдиев охуду.


– Дагъыстанны халкъ шаири Шейит-Ханум Алишеваны юбилей шатлыгъы булан гьакъ юрекден къутлайман, – деп узатды ол. – Пагьмулу шаирибиз адабият тармакъда бажарывлу таржумачы, публицист-журналист гьисапда да белгили. Шону учун Дагъыстанны язывчуларыны союзуну правлениесини секретары Дагъыстанны Расул Гьамзатовну атындагъы Пачалыкъ адабият савгъаты булан иштагьландырылгъаны гьакъда айтсакъ да, кёп зат англашыла. Дагъыстанны язывчуларыны союзуну къумукъ бёлюгюню башчысы гьисапда да ол оьсюп гелеген яш пагьмулагъа сынавлу ва макътавлу адабият чалышывчуларыбызны уьлгюсюн сингдирмеге къаст эте демеге ярай…


Гертиден де, Шейит-Ханумну яратывчулугъу янгыз къумукъ охувчуларыны оьлчевю булан дазуланмай, савлай аламгъа, тюрк дюньясына да яйылгъан. Демек, Дагъыстандан, Россиядан тышда да гьар тюрлю пачалыкъларда башгъа-башгъа тиллерде печатдан чыгъарылгъан. Шолайлыкъда, ол гьалиги заманда да уьлкеден тышда оьтгерилеген ёлугъувларда, генгешлерде, конкурсларда ортакъчылыгъын болдура…


– Шейит-Ханум оьзтёрече аты ва хаты булангъы янгылыкъ яратывчу шаир гьисапда да охувчуларыны арасында абур къазангъан, – деди Дагъыстанны язывчуларыны союзуну председатели Магьаммат Агьматов.


Ону биринчи шиърулары «Аяны иссивюнден» тутуп, оьзюню анадаш милли газети «Ленин ёлу» («Ёлдаш») газетде чыкъмагъа башлагъан. Сонг буса «Дослукъ» журналда. Биринчи шиъру къайдалы китапчалары «Чыракъ», «Гюл байлам» ва шолай башгъаларында печат этиле. Дагъыстан китап издательствода, «Къарчыгъада» да чыкъгъан. «Гёзюнг ач, уян», «Мени ёравларым» ва шолай башгъа китаплары охувчулагъа яхшы белгили. Ону яратывчулугъунда ватандашлыкъ, сююв лирика, патриотлукъ-философия гьислер ва башгъа темалар айрыча ер тутгъан.


Шатлыкъ жыйынны ортакъчылары шаир Марина Агьматова, «Ёлдашны» баш редакторуну заместители Къарамагьаммат Къараев ва оьзге ёлдашлар да белгили шаирибизни атына, яратывчулукъ ёлуна байлавлу къутлавларын, оьз ёравларын малим этди. Савлукъ булан аманлыкъ ва гележекде де яратывчулукъ ёлунда уьстюнлюклер ёрады.


Ахырында инчесаниятны усталарыны чыгъышларын да залда жы­йылгъанлар исси харс урувлары булан къыйматлады. Шаирни асарларына гёре «Мени атым – Шейит-Ханум» деген поэзия спектаклни гёрсетген Къумукъ театрны артистлери де къаравчуланы разилигин къазанды.

Авторизация
*
*
Регистрация
*
*
*
Согласны с условиями сайта?
Генерация пароля