Узакъ йыллар билим берив тармакъда муаллим болуп чалышгъан ва бай сынав топлагъан Минаханымны шиърулары булан охувчуларыбыз тезден берли таныш. Бу гезик де ону янгы шиърулары бериле.
Адабият бёлюк.
Минаханым КИШИЕВА:
Дёртлюклер
Тал тереклени бир де
Болмайгъандай емиши,
Эринчек къатынланы
Этилмей къала иши.
***
Гьал билмейгенге барып
Макътангъандан не пайда?
Халкълар сени таный чы –
Этилген ишинг къайда?
***
Адамлар бир-бирине
Дос-къардаш болма герек.
Ёлдашлыгъынгны юрют:
Бав болмас янгыз терек.
***
Ишлемеген тишнемес,
Иш болмаса, яшав ёкъ.
Юрекден этген ишинг
Этер яшавунгну токъ.
***
Биревлер акъча жыя
Татли деп о емишдей,
Тек нечакъы жыйса да,
Кёплеге харж етишмей.
***
Кёп сююп бережекмен
Сагъа уьюмню тёрюн,
Юрекге балгьам болуп,
Айда бир сама гёрюн.
***
Бир де артыкъ байлыкъгъа
Къаратма сен гёзюнгню.
Сени халкълар макътасын,
Макътама оьз-оьзюнгню.
***
Хыйлылар бар къоркъагъан
Сёйлеме сёзюн тувра,
Башлылар барып бугюн
Башсызлагъа баш ура.
***
Артыкъ байлыкъ бир де магъа герекмей,
Мен тюгюлмен малгъа гёзюн сатагъан.
Байлыкъ о чу дюр къолланы
Яхшы кюйде жувса гетип къалагъан.
***
Аллагь сакъласын бизин
Ярлыдан тез бай болгъан.
Гьали дёрт де яныбыз
Шолай тайпадан толгъан.
***
Не къыйынынг болса да,
Ичинг дертден толса да,
Ягьсызгъа юрек ачма,
Ягьлыдан, вёре, къачма.
***
Гьакъыл деген – оьр байлыкъ,
Ким-кимге де етмейген,
Тек магъа аз тюшген деп,
Бирев де кант этмеген.
***
Халкъ йимик охуп, язып,
Алмасанг да сен билим,
Нече де макътанасан,
«Тирмен сибире» тилинг.
***
Гёзюнг ачсанг, гюн чыгъа,
Къашынг язсанг, ай тува.
Ойнайгъан гёзюнг-къашынг
Оюм-дертимни къува.
***
Айыбынгны чыгъарса,
Гьап-гьазирсен гьаплама.
Оьзюнг тап-таза болуп,
Халкъгъа айып къаплама.
***
Ким де сукъланар йимик
Гьалал кюйде яшайсан.
Алтын челтирден чыкъгъан
Женнет къушгъа ошайсан.
***
Къартлыкъ гелип къарсалап
Сингсе де сюегиме.
Кар этип болмай тура
Мени кюр юрегиме.
Гьай нечик де яшадыкъ
Адашгъан ёлавчуман
Сюювню дюньясында.
Юрегим ишлейгендей
Къолумну аясында.
(М.Бадрутдин)
Юрек токътамай ишлей
Бары санланы къуршап.
О токътаса – сёнербиз,
Гёз юмгъан гюлге ошап.
Яшав къуруп дюньяда,
Не гёрдюк, не гёрмедик,
Тез гетеген оьмюрню
Къызгъанып да билмедик.
Яшадыкъ ягьгъа гирип,
Намусну да гётерип.
Ат тартмайгъан арбаны
Юрютдюк биз теберип.
Санаву да ёкъ эди
Юрекдеги дертлени.
Къайсын-бирин айтайым
Етмеген негетлени.
Сюйме де, сюйдюрме де
Бизге ярамай эди.
Гиеген гийимибиз
Майбез къабалай эди.
Сюйгенингни алмагъа
Болгъан булан хыялынг,
Сюйгенинге бармагъа
Ёкъ эди ихтиярынг.
Бу уьч гюнлюк дюньяда
Не гёрмедик, не гёрдюк.
Йыгъыла, тура туруп,
Нечик де оьмюр сюрдюк.
Энни оьмюр гетгенде,
Ойлашабыз къыйналып,
Гетген янгурну артындан
Чапгъандай ямучу алып.
Гьай нечик де яшадыкъ
Болуп къысматгъа мюкюр.
Бизге яшавну берген
Яратгъаныма шюкюр!
Гьар макътав оьсгениме
Сюювню дюньясында.
Юрегим ишлеп тура
Къолумну аясында.
