Мычыгъыш Республиканы Бамматюртунда 1956-нчы йылда тувгъан Агьмат Мовлединович Мусаев бугюнлерде Йыракъ Гюнтувушда, Приморск крайда яшай.
Агьмат 1975-нчи йылда ата юртундагъы школаны битдирген сонг Ленинграддагъы темир ёл транспортну институтуна охума тюшген. Приморск крайда 1984-нчю йылдан тутуп яшай. Ташкёмюр чыгъарагъан ерде слесарь болуп ишлеген.
Гьали шахматлардан тренер гьисапда загьмат ёлун узатып тура. Оьзю де, агьлюсюнде уьч авлети де шахматлар ойнай.
Аслу ишинден чола табып, Агьмат аз сатырлы шиърулар да яза. Шиърулар, сатырлар, дёртлюклер… Авторну язгъанларын охувчуланы тергевюне де беребиз.
Адабият бёлюк.
Денгиз,
Тузлу тили булан,
Ягъада олтурагъан,
Баланы аякъларын
Ялай…
терен
тарлыгъып.
***
Чечеклер –учуп
уьйренмеген
гюмелеклер.
***
Гележексен. Гетежексен.
Ине йимик оьтежексен.
Гетгенингни билмежексен.
***
Бир-бир гюнлер – гюллер.
Бирлери – гюллелер.
***
Кёкден тёгюлген эртен
Женнет бавларда экен,
Гёзлеринг теренинде
Мен оьзюмню излеймен.
Гёзелли гюн гелеген
Ярыкъ сигьру гёремен :
Сени асил жанынгда
Гюмелеклер бийийген.
Юлдуздан толгъан ахшам
Чачларынгда адашгъан,
Атирлерден эсирген
Авлагъым юрек ачгъан
Ва гьайранлы гечелер
Балжибинленикилер.
Олар жыйгъан байлыгъын
Умут булан оьлчейлер.
***
Мунглукъдан тувгъан макъам
Элте оюм йыракъгъа,
Ёлун билмейген якъгъа,
Жан гьасирет ожакъгъа.
***
Алтын юрекли къатын,
(Айтып болмайман атынг),
Акъ булутлу суратынг,
Савгъат азиз сыпатынг.
Алтын юрекли къатын,
Женнет ярыкълы жанынг,
Жавгьар жанлы йырларынг,
Гюз юлдузлу сырларынг.
Алтын юрекли къатын,
Аллагь аяп сакъласын.
***
Янгызлыкъ – бирденден тюшген къырав.
Янгызлыкъ – гёзде нюр битген сорав.
Янгызлыкъ – авуз ябылып йылав.
Янгызлыкъ – оькюреген къонгурав.
***
Япыракълагъа сагъынчым сингди.
Тереклер кёкге силкинди.
***
Заман эсни къызгъанмай.
Йипни уьзмеге къарай
