Алав АЛИЕВ
Татарстанны тахшагьары Къазандагъы гимназияларыны бирисинде дёрт ай алъякъда болгъан къайгъылы агьвалат, къарагъанда, бизин бир затгъа да уьйретмеген. Май айны 11-нде, эртен вакъти, дарслар янгы башланып турагъанда, гьакъылгъа мукъ, дели башлы 19 йыллыкъ жагьил адам, оьзю бир заман охугъан идарагъа гирип, тюбек булан атышып, 7 яшны ва 2 муаллимни оьлтюрген эди. Хыйлы яралангъанлар да болду.
Шондан сонг эл арада нечакъы сёз болду, нече-нече таклифлер, чакъырывлар чалынды. Гьатта Пачалыкъ Думада депутатлар «Савутну гьакъындагъы» федерал законгъа алгъасавлу кюйде бир тюрлю алышынывлар этмесе ярамай деген ойгъа гелди.
Тек гьаманда йимик, жумалар, айлар гетип, агьвалатны къувуну-сеси солкъ болгъанда, лакъырлар лакъыр кююнде къалды, онча алышынгъан зат гёрюнмеди. Шону англамакъ, билмек учун, бир нече школалардан айланып чыкъсагъыз да таманлыкъ эте. Бугюн де орта ва оьр охув ожакълардагъы яшланы ва педагогланы аманлыгъын болдурувгъа уьстденсув, немкъорай янашыв эс этиле.
Муна гьали бирдагъы зарлы агьвалат уьлкени бютюн жамаатын титиретди, пашман ойлагъа дёндюрдю. Сентябр айны 20-сында Пермдеги ерли университетде 18 йыллыкъ жинаятчыны къолундан 6 студентни чакъсыз жаны къыйылды, яралангъанланы санаву 40-дан да артгъан. Шо мюгьлетде гимназиягъа ювукъда полицияны лейтенанты К.Калинин болмагъан эди буса (ол янындагъы тапанчасы булан атышып, жинаятчыны яралагъан ва тюбегин чыгъарып алгъан), къайгъылы сиягь дагъы да артмакъ бар эди.
Озокъда, лап башлап, неге гьакимият охув идараланы аманлыгъын болдурувгъа тийишли тергев бермей? Неге шо бек агьамиятлы ва жаваплы масъаланы онгача иш гёреген къорувчу къурумланы ихтиярына берген деген соравлар тувулуна. Бир-бирде чи, къорувчуланы орнунда, аз акъчагъа да ишлемеге гьазир пенсионерлер де токътап бола.
Артдагъы гюнлерде бизин республиканы охув ожакъларында болгъан къувунлу агьвалатлар да бир тюрлю чараланы гёрмекни талап эте. Магьачкъаладагъы коллежлени бирисинде студент улан ёлдашы булан эришип, огъар бичакъ уруп яралагъан. Арадан эки гюн де оьтмей, тахшагьарны 36 номерли школасында 9-нчу класны охувчулары ювукъдагъы тюкенден гёзьяшларын акъдырагъан агъулу газны сатып алып, танапусну вакътисинде школаны догъасында себелеген. Натижада 30-гъа ювукъ яш агъуланып азарханагъа тюшген.
Белгили кюйде, уьлкеде йимик, Дагъыстанда да орта ва оьр билим береген охув ожакъланы 90 проценти пачалыкъ яда муниципал идаралар деп гьисаплана. Демек, шолардагъы аманлыкъны болдурув инг алдын пачалыкъны, гьакимиятны борчу тюгюлмю?! Шо борчну да бары да якъдан гьазирлиги, тийишли савуту да бар Росгвардиягъа тапшурмагъа герек.
