Уллу Россия уьлкебизни йимик, бизин республиканы халкъларыны яшав шартлары гьар йыл сайын яхшылашагъанына бирев де шеклик этмейдир. Башгъа масъала нечик чалтлыкъ булан яхшылашагъаны. Озокъда, кемчиликлер ёкъ тюгюл. Оланы гьакъында айтылар, тек бугюн, янгы йыл янгы башланып турагъан заманда яхшы ишлени гьакъында айтмагъа сюесен. Этилген гёрмекли ишлер булан янаша уллу умутлар да арив къыйыша.
2018-нчи йылдагъы республика етишген натижаланы эсгере туруп, йылны гьасиллерин чыгъара туруп, Дагъыстанны баш гьакими Владимир Васильев де эсгерген кюйде, бары да этилеген ишлер ватандашланы аманлыгъын болдурув булан бирче, оланы яшавун яхшылашдырмагъа къуллукъ эте. Халкъны разилигин болдурмакъ – къайсы даражадагъы гьакимни де биринчи гезикли борчу.
Яшав йыл сайын яхшылаша деп айтгъанны сюймейгенлер де ёкъ тюгюл. Олар багьалар гётерилегенни, коррупция барлыкъны ва оьзге тюрлю къыйыкъсытывланы гёз алгъа гелтирип ойлаша. Тюз ойлашмай деп айтма да болмайсан. Тек туврадан къарасанг, кёп керенлер «яхшы» артыкъ. Алайыкъ халкъгъа инг ювукъ той намусланы. Он – йигирма йыллар алда этилеген той харж да, гьалигиси де бири-биринден кёп арек. Яшав яхшылаша. Адамланы киселери олай юкъкъа тюгюл. Алдагъы йылларда йимик акъча артыкъ къысылып да харжланмай. Тойларда гьали 2 мингден кем де салынмай. Юрт ерлерде арив онгарылгъан гьамамы, тизилген аш уью, плитка тутулгъан абзары ёкълар да аз. Ишлеме сюегенлеге иш де ёкъ тюгюл. Бизде оьзю сюеген ишни тапмаса, Россияны оьзге регионларына чыгъып ишлеме де имканлыкъ бар.
Болса да, адамлагъа гьали де кёп зат етишмей. Алда болгъан яхшылыкъланы унута бара бусакъ чы, о дагъы да яман. Не етишмей деп сорав тувулуна буса, халкъны жавабын бир сёз булан англатма бола. Озокъда – татывлукъ. Столлардагъы тюрлю ашлагъа татыв етишмей. Туврадан айтса да, башгъа пикру булан айтса да, шолай. Бар зат бар, дагьниси ёкъ. Инг яманы – дос-къардаш, авул-хоншу гьакъ юрекден гьаллашмайгъаны. От сёнмеген, исивю аз.
Шатлыкъ ёкъ деп айтса да тюз болмас. Тек бир-бирев булангъы иссилик аз. Гьар ким уллу атав йимик, уллу пачалыкъ йимик айрыча яшама сюе. Огъар янгы технологияланы оьтесиз чалтлыкъда оьсегени таъсир этегенни барыбыз да билебиз. Этип болагъаныбыз буса ёкъ… Бирдагъы йылны тарихни бетлерине айландырдыкъ. Берекетли йыл болду деп эсиме геле. Республикада бары да тармакъланы къуршап алгъа барывну гьаракаты юрюлдю деп айтма ярай. Ёллагъа нечик тергев берилегени гёрюне. Гетген йыл Буйнакск шагьаргъа барагъан айланма ёлланы нечик арив онгарды. Магьачкъаланы темиркъазыкъ ягъасында ишленип турагъан уллу кёпюр гьалиденокъ ёлавчуланы тергевюн тарта. Ондан таба, къыбла янгъа, Агъачавулдан оьтюп гетеген ёл да нечик мекенли онгарылып тура.
2018-нчи йылда ёл къурулушгъа республика бюджетден 5 миллиард ярым гёрсетилген эди буса, бу йыл 8 миллиардгъа ювукъ акъча харжланма тарыкъ деп гёз алгъа тутулгъан. Арив асфальт ёллар республиканы оьсюв даражасы бар экенин гёрсетегенинден къайры, машин гьайдавчуланы ёл хатабалагьлардан да сакълар, пассажирлени аманлыгъын болдурар. Шолай, оьзге тармакъларда да этилген гёрмекли ишлени кёплерин эсгермеге бажарыла.
Яшав яхшылашгъан чакъы, янгы умутлар да, янгы талаплар да тувдура. Ону учун да янгы йылда бир-биревге ёрамагъа инг де къыйышывлу «Янгы умутлагъа етишме насип болсун!» – деп айтылагъан сёзлер буса да ярай. Ич арада татывлукъ кемимесин деп де къошсакъ, шо ёрукъда хоншугъа оьзюбюзню янашывубуз булан да яхшылыкъ гелтирсек, озокъда, янгы йылыбыз дагъы да къутлу болур.
