Бузма тынч, тизме къыйын

       Топуракъны еси де, къуллукъчусу да болса, ерли халкъны яшаву ва экономикасы къолайлашагъаны гьакъ. Шону магъа да яш заманымда ата юртум Оьтемишде ачыкъдан сезмеге тюшген. Неге десегиз, бизге иш де, аш да , яшав да береген – ана топуракъ. Шону учун болмагъа ярай, мени юртлуларымны гьалиги наслулары да оьзлеге ата-бабаларындан къалгъан мердешли тармакълагъа, саниятлагъа арт бермеге хыял этмей.

 


Мени савлай оьмюрюм де топуракъгъа, оьсюмлюклеге къуллукъ эте туруп гетди десем, гьакъыкъатгъа къыйышмай къалмас. Ер юзюнде нече тюрлю касбу, саният бар. Айтмагъа сюегеним, шо гьакъда магъа заманы етишгенде кёп ойлашмагъа тюшмеди. Школадан сонг орта билимге ес болуп, о замангъы Дагъыстан пачалыкъ юрт хозяйство институтну агрономлар гьазирлейген факультетине охумагъа тюшдюм.


Оьр хас билимге ес болуп, магъа агроном гьисапда Лак районну «Дагъыс­тан» деген колхозунда загьмат ёлумну башламагъа тюшдю. Шонда дёрт йыл ишлеп, 1982-нчи йылда ата юртумдагъы юрт хозяйство предприятиеге къайтып, директорну заместители болуп ишлей туруп, бир вакътини ичинде 1985-нчи йылгъа ерли парткомну башчысы болуп чалышдым. 1986-нчы йылдан бугюнге ерли юрт хозяйство предприятиени баш агроному болуп борчларымны кютюп тураман.


Яшырмагъа негер тарыкъ, совет девюрде 70–80-нчи йылларда ерли сов­хозда загьмат тёгеген юзюм оьсдюрюв булан машгъул 12 юзюмчюлюк бригада бар эди. Шондан башгъа да, 4 трактор бригада, 1 авлакъчылыкъ ва 1 къурулуш бригада ишлеп, гёрмекли натижалар къолда этилине эди.


Бузма тынч, тизме къыйын. Белгили себеплеге гёре, хозяйство кётюрлюкге тарып, тозулма башлады. Шо вакъти «Оьтемиш» ГУП-ну гьалиги директору Арсланали Ибрагьимовну гьаракаты, кёмеги булан хозяйство янгыдан аякъгъа турма башлады…


Бугюнлерде хозяйстводагъы 3 бригаданы ортакъчылары аслу гьалда юзюм ва ашлыкълар оьсдюрюв булан машгъул бола. Шолайлыкъда, янгы юзюм бавлар амалгъа геле, ашлыкълар чачылагъан майданларыбыз генглеше. Оьтемишни авлакъларында оьтген йыл 1200 гектардан да къолай майдангъа гюзлюклер чачылды. Шону 725 гектарын ижарачылар оьсдюрегени гьакъда айрыча эсгермеге герек. Дагъысын айтмагъанда, оьтген йыл биз сайламлы ашлыкълар оьсдюрюп, Сергокъала, Къарабудагъгент, Буйнакск, Гьайдакъ районлагъа 300 тонгъа ювукъ урлукъ сатып бердик.


Айтмагъа сюегеним, хозяйство айлана якъдагъы четимликлеге де къарамайлы, янгыдан аякъгъа тургъузула. Буссагьатгъы вакътиде юзюмлюклерде борла бутав ишлерде 20 ишчи къуршала. О – бек жаваплы, сан янындан тюшюмню моллугъу гьасил болагъан иш. Ишчилер Тамила Ибрагьимова ва Найида Магьамматова борчларына айрыча бажарывлу кюйде янаша. Бугюн хозяйство ишлерде инженер Осман Алишихов, юрист Салимгерей Гьажиев, завгар Баба Гьажиев, гьайван ферманы бригадири Марат Бабаев, механизаторлар Солтанагьмат Солтанагьматов, Камалутдин Хидирбеков актив кюйде ортакъчылыкъ этегени гьакъда да рази­лик булан эсгермеге сюер эдим.


Умуми гьаракатны натижасында артдагъы эки йылны ичинде
74 гектар майдангъа юзюмлюклерибизни майданлары да толумлашды. Шону учун юзюм орнатагъанлагъа ва борлалагъа къуллукъ этип оьсдюрегенлеге 5 йылгъа пачалыкъны янындан харж булан кёмек этилине. Демек, гьар гектаргъа чыгъагъан харжларыбызны 80 проценти къайтарыш этилине. Шолайлыкъда, юрт хозяйствону асувлугъу да, юрт хозяйство загьматчыланы-къуллукъчуланы къазанчлары да къолайлаша бара.

 

Мирза Гьажиев.


Суратда: «Оьтемиш» ГУП-ну


баш агроному (солда)


Къаягент районда


«Инг де бажарывлу ашлыкъ оьсдюрювчю» деген сыйлы атгъа гёре «Йылны адамы».

Авторизация
*
*
Регистрация
*
*
*
Согласны с условиями сайта?
Генерация пароля