Айтылгъан усталыкъны школасы


       Халимбекавулну бугюнгю яшавунда «Пять сторон света» деген ябушув усталыкъны школасы айрыча тергевню тарта. Бу школа-интернат деп айтылагъан билим беривню спорт къатнашгъан ида­расында 270-ден де ар­тыкъ яш охуй. 37 дарс беривчю, 30 тарбиялавчу ва 10 тренер ишлей. Оьзюню оьзтёречелигине, му­къаят­лыгъына ва танывлу болмакълыгъына гёре бу­­­лай охув ожакъ Дагъыс­танда дагъы ёкъ десе де, къопдурув болмай.



Спортну гюнтувуш ябушув жу­раларын уьйренивден къайры да, мунда орта билим береген охув ожакъдагъы дарслар да юрюле. Гьар йыл 11 класны битдирген охувчулагъа аттестатлар бериле. Школада ингилис тилни де теренден уьйренеген программа къоллана. 5 класны охуп битген яшлар ата-аналарыны разилиги булан къайсы райондан, шагьардан, Россияны оьзге регионларыдан да гелип бу школа-интернатгъа охума тюшмеге бола.


Школа-интернат 1996-нчы йылда ачылгъан. Ону бугюнгю даражасын да, барлыгъын да болдургъан адамлар – Гьюсен Сайгитович Магьамаев ва ону агьлюсю Ольга Николаевна Магьамаева. Оланы гьаракаты булан бош ерде булай уллу школа ва спорткомплекс къурмагъа бажарылгъан. Охуйгъан яшланы барысы да гележек яшавунда белгили спорт усталар болмаса да, чемпион даражалагъа етишмесе де, оьмюрюнде спортну сююп де, ону абурлап да билежеклер. Школа шогъар уьйрете. Яшёрюмлеге спортну пропаганда этивде де бу школа-интернатны уллу таъсири ва агьамияты бар. Гьюсен Магьамаев – Россияны ат къазангъан тренери, Россияны ат къазангъан спорт насигьатчысы. Ону биринчи касбусу – художник-оформитель. Дагъыстан чебер училищени битдирген.


Школада охуп чыкъгъан яшланы арасында дюньяны оьлчевюнде спорт яшавунда аты айтылгъан Бозигит Атаев ушу-саньдадан дюньяны 4 керен чемпиону, Жанхуват Белетов, Муслим Салигьов дюньяны 3 керен чемпионлары болгъан. Олар уьчевю де – спортну ат къазангъан усталары, «Золотой пояс» деген милли савгъатны лауреатлары.


Назир Шандулаев, Уллубий Нуритдинов, Къазбек Мамаев, Али Далгьатов – яшёрюмлени арасында ушу-саньдадан дюньяны чемпионлары. Тимур Мегьтиев – тхек-вандодан дюнья чемпионатны призёру. Руслан Ибрагьимов, Имран Гьажиалиев, Муратали Къапуров, Эсенболат Белетов – Россияны чемпионлары, Россияны жыйым командасыны членлери болгъан. Спортну кингбоксинг журасындан халимбекавуллу Атай Жанболатов – Россияны чемпиону. Дюнья чемпионатында да ол гюмюш медаль къазангъан. Уьстюнлюклени дагъы да эсгерме бола.

 

Авторизация
*
*
Регистрация
*
*
*
Согласны с условиями сайта?
Генерация пароля