Юртланы гьалиги гьалы булан таныш болмакъ учун ерли администрацияны башчысы булан ёлугъуп лакъыр этмесенг бажарылмай. Шону учун да мен Гьелиге гелгендокъ, администрацияны башчысы Магьамматгьажи АТАЕВ булан ёлукъдум. Ону булан арабызда болгъан лакъыр сизин тергевюгюзге де бериле.
– Магьамматгьажи, жагьил адамсан, юртну башын тутмакъ учун сынав да чы тарыкъ бола. Тек бажарывлу болса, бир- бирде сынаву ёкълар барлардан яхшы да ишлей…
– Тюз айтасыз, сынав гелип къалажакъ, уллулар булан да гьакълашабыз, сорамакъ илыкъ тюгюл. Янгыз ишни юрютме бажарылмай. Уллуланы сынавундан да пайдаланабыз.
– Не йимик масъалалар бар юртда чечилмей турагъан? Сув масъала чы алдыгъызда токътамайдыр. Шавдегек булакъ йимик де, юртну ортасындан чыгъагъан сув булакъ да къайсы юртгъа да тюшюп турмай.
– Сув масъала да бар, тек гелеген йыл чечилежек. Сув болгъан булан, ону гьар авул булакълагъа да, агьлюлеге де етишдирме тарыкъ. Проектлерибиз Къурулуш министерликден оьтген, бу йылны ахырларына таба ишлер башланажакъ, гелеген 2021-нчи йылны баш вакътилеринде тамамланажакъ, Аллагь буюрса. Бары да ишлени тамамламагъа 46 миллион манат бериле.
– Ёлланы кюю нечикдир?
– Юртну ичиндеги ёллагъа асфальт салынып тура. 1 чакъырым 600 метрге салынажакъ деп гёз алгъа тутулгъан. Хыйлы пайы битген, къалгъаны да бу йыл битежек.
– Спорт булан машгъул болма имканлыкълар бармы юртлу яшлагъа?
– Спорт школабыз бар. Тек спортзалыбыз ёкъ. Школаныки бар уллу спортзалы. Тарыкъ болса, ону къоллайбыз. Футбол ойнайгъан гиччи майдан да къурдукъ.
– Халкъны яшавун яхшылашдырмакъ учун юрюлеген пачалыкъ чаралагъа къошулмагъанмусуз?
–Юртда онгайлыкъланы чарасына къошулгъанбыз. 2021-нчи йыл юртну ортасында гюлбав этилежек. Гелеген йыл клубну да ярашдыражакъбыз. Кёп йыллар бола къаравсуз къалып турагъаны.
– Магьамматгьажи, оьзюнг де яхшы билесендир, юрт ерлерде увакъ далапчылыкъ юрютегенлеге, фермер хозяйстволагъа пачалыкъны янындан да кёмек этиле. Сизде бармы токъташгъан фермер хозяйстволар?
– Бар. Бизин юртда Магьамматсайит Абсаламов деп айтагъан адам бар. Гьар йыл йимик 400 гектар ерге будай чача, тюшюмюн къайтара. Гьайванлар да сакълай. Герти фермер болуп битген десе де ярай.
Жамал Таштемиров 200, 250 гьайван сакълай. Магьаммат Баликовну да 250 гьайваны бар. Жанбек Жанбековну 400 малы бар. Артдагъы вакътилерде адамлар фермер хозяйстволардан пайда алма уьйрене тура.
– Савлукъ сакълав тармакъда ишлер нечикдир?
– 20 чакъырым ариде район больница бар. Юртда да амбулаториябыз бар. Заведующийи – Зарипат Батырмурзаева. Аврувланы бек гьайын этип билеген врач.
