Бизин республиканы къайсы юртунда да совет девюрде йимик, гьалиги заман маданият уьйлени иши гёрмекли болмай. Ахшамлар кинолар гёрсетилмей, чебер иш гёреген коллективлер ёкъ десе де ярай. Къандавуравул йимик гиччи юртда чы айрокъда маданият уьюне ахшамлар жагьиллер жыйылар йимик иш юрютме де айрокъда къыйын.
Юртдагъы маданият уьйню бирдагъы бир гьали болгъунча чечилмеген масъаласы бар. О да – маданият ожагъы районну маданият управлениесини табилигинде тюгюл экени. Олай оьзге районларда да ерли колхозланы, совхозланы ихтиярында сакълангъан маданият уьйлер де, маданият къалалар да бар эди. Колхозлар, совхозлар тозулгъан сонг олар ессиз къалды.
Къандавуравул маданият уьюню директору Жамиля Салимурзаева айтагъан кюйде, оьзлени идарасын район маданият управлениени ихтиярлыгъына бермек учун тийишли гьаракат юрюлюп тура. Гьали буса юртда этилме герекли бары маданият ишлени школада оьтгерелер. Неге тюгюл, оьзлени залы ёкъ. Бар, тек онда ремонт ишлер юрюлюп тура. Гележекде гьал онглу якъгъа баражагъына умут да этелер. Янгы къурулуп турагъан орта билим берив школаны бинасында эркин зал болажакъ. Олтурма бек арив ерлери де, сагьнасы да булангъы бинада юртдагъы маданият- ярыкъландырыв ишлени оьсдюрме де имканлыкълар ачылажакъ.
