(Къарабудагъгент район)
Юрт къачан къурулгъаны токъташдырылмагъан. Къабурлардагъы бир сынташда бусурман тарх булан 127- нчи йыл эсгериле. Олай болгъанда, Гьели юртну оьмюрю 1 минг 800 йылдан къолай. Буссагьатгъы вакъти юртда 3 мингге ювукъ адам яшай.
Райцентрдан 15 чакъырым ариде, Буйнакск шагьаргъа барагъан уллу ёлну къырыйында ерлешген Гьели – бай тарихли, тек аз ахтарылгъан къумукъ юртланы бириси. Тезги заманларда да бу юртда билим алыв, маданият тармакълагъа айрыча агьамият бериле болгъан деп айтсакъ да, янгылыш болмажакъ.
Гьар юртну бир гёрмекли этеген шо юртну белгили адамлары деп эсибизге геле. Неге тюгюл, шолай адамланы ата юртгъа аслам къошуму бола. Олар юртну халкъыны эсинден таймай. Шолай адамланы атлары патриот ругьда тарбиялавда да тийишли къуллукъ кюте. Гьели юртдан чыкъгъан, юртуну тарихине оьзлени не буса да бир таъсирин къойгъан белгили адамларыны бирлерин эсгерме сюебиз.
Алескендер Алхасов 1861-нчи йылда тувгъан. Оьзюне 16 йыл болагъанда, Рус-Тюрк давдан игит болуп къайтгъан. Ону эки Георгий ордени ва эки медалы болгъан. Давдан сонггъу йылларда биринчилей Дагъыстанны гимнини макъамын язгъан. Темирханшурада биринчилей музыкалы алатлар этеген ва оланы ярашдырагъан устахана ачгъан.
Абдуллабек Исаев (Алескендерни иниси, ону анасыны къызардашы сакълагъан саялы фамилиясы башгъа) – муаллим, Дагъыстанда биринчилей китаплар чыгъаргъанлардан бириси. «Букварь», «Охув хрестоматия», «Гьисап мисаллар», «Кавказны географиясы», «Ватанны уьйретив», 10 минг сёз булангъы «Рус-къумукъ сёзлюк» чыгъаргъан. Дагъыстанны учителлерини биринчи съездини ортакъчысы. Ону аты 1928-нчи йыл совет девюрде биринчилей Гьелиде ачылгъан школагъа къоюлгъан болгъан.
Абузагьир Батыров – 1932–1935-нчи йылларда къумукъ тилде чыгъагъан «Комсомолец Дагестана» деген газетни редактору, 1935-1941-нчи йыллар Дагъыстан радиокомитетни редактору болуп, КПСС-ни район комитетини секретары, КПСС-ни Дагъыстан обкомуну инструктору болуп ишлеген. Уллу Ватан давну ортакъчысы.
Умар Къурбанов – Дагконсервтрестни управляющийи, Дагрыбпромда «Рыбоконсервный комбинатны» директору, Дагрыбфлотну баш инженери болуп ишлеген, Уллу Ватан давну ортакъчысы, эки керен Къызыл Байракъ ордени ва онгъа ювукъ медаллар булан савгъатлангъан.
Гьажи Абдусаламов – комсомолну район комитетини биринчи секретары, 20 йылдан да къолай ерли колхозну председатели, юрт администрацияны башчысы болуп ишлеген, Дагъыстанны яшёрюмлерини ат къазангъан насигьатчысы. Ону гьаракаты булан 1998-нчи йыл Гьелиде тарихи музей уью ачылгъан.
Камалюсуп Канаев – Темиркъазыкъ Кавказда белгили ат чапдырывчу, каскадёр. «Война и мир», «Сергей Лазо», «Дума о городе Шевченко» ва башгъа кинофильмлер чыгъарывда ортакъчылыкъ этген.
Изамутдин Къадыров – СССР-ни ва Россияны ат къазангъан тренери. Тутушуп ябушувдан ол уьйретген яшлар дюньяны, Олимпия оюнланы чемпионлары болгъан.
Магьаммат Исмайылов – милицияны полковниги, республиканы ич ишлер министерлигини аппаратында ишлеген.
Абусу Абусуев – медицина илмуланы кандидаты, медакадемияны дарс беривчюсю болуп ишлеген.
Жамалпаша Загьиров – ДАССР-ни школаларыны ат къазангъан учители, Уллу Ватан давну ортакъчысы, кёп йыллар учитель болуп да, школаны директору болуп да ишлеген. «Макътавлукъ» ордени булан савгъатлангъан.
Темукъ Загьиров – ДАССР-ни ат къазангъан учители, ата юртда муаллим болуп да, школаны директору болуп да, билим беривню район бёлюгюню заведующийи болуп да ишлеген.
Бекболат Сахаватов – «Единая Россия» деген партияны Къарабудагъгент район къурумуну председатели, гьали ол депутатланы Къарабудагъгент район жыйыныны председатели болуп ишлей. Олар кёп, барысын да эсгере турма бажарылмай.
Юртну абурун гётергенлени атлары ерли школаны музейиндеги стендлени бетлерине язылып, яш наслугъа уьлгю болардай сакълана. Къайсы юртгъа да о – бек тарыкълы къуллукъ.
