Бажарывлу къолларда от ойнар


Къарабудагъгент райондагъы Къакъашура юртдан чыкъгъан Нас­рутдиновланы уллу тухуму республикадан тышдагъылагъа да яхшы танывлу. Къоллавчуланы талапларына къол ялгъай туруп, асувлу ишлери, гёрмекли гьаракатыны натижалары булан белгили. Шо гьакъда гьар уьлкебизни ва республикабызны маълумат къуралларында къужурлу макъалалар, уллу китаплар да язылып чыкъгъан.



Мисал учун, оьз заманында белгили ёлбашчы, гьаракатчы адам Насрутдин Илмутдинович Насрутдинов, гертиден де, элде, халкъ арада пачалыкъны пайдаларына къуллукъ эте туруп, савлай оьмюрюн йиберген десек де, гьакъыкъатгъа къыйышмай къалмас.


Оьз ишиме байлавлу болуп арадан оьтген 40 йылланы ичинде пагьмулу ва бажарывлу ёлбашчы, касбучу Н. Насрутдинов булан магъа да чакъда-чакъда гьар тюрлю шартларда, агьвалатларда ёлукъмагъа тюшген. «Каспийгазпром» деген жамиятда ёлбашчы болуп ишлейген заманында «Моздок-Къазимагьаммат» деген газ ягъарлыкъ юрюйген быргъыланы къурашдырып, четим шартларда къыбладан темиркъазыкъ бойлагъа узатагъанда да, Дагъыстанны Халкъ Жыйыныны депутаты гьисапда Бабаюрт районну юртларында сайлавчуланы тапшурувларын, къоллавчуланы газ ягъарлыкъ булан таъмин этив къуллукъларына къол ялгъайгъанда да, Кас­пийни ягъасындагъы «Леззет» деген санаторийде ял алагъанлар, савлугъуна къуллукъ этегенлер учун онгайлы шартлар болдурагъанда да, борчларына намуслу кюйде янашып, оьзюн танытгъан. Айтмагъа сюегеним, Насрутдин агъав арадан оьтген 85 йылны ичинде, уллу чагъына да къарамайлы, гьаракатгъа – берекет деген кюйде, мисгин атасы, Социалист Загьматны Игити Илмутдинни сынавундан дарс алып, оьз гьаракатын бошамагъа къоймай етишген натижалары ачыкъ болуп гёрюндю.


Шо вакътини ичинде Бекенез булакъны хыйлы суву эниш акъгъан… Яшавну агъымы да оьзенлени, булакъланы агъымына парх бере. Бирлери алгъасамай аста, оьзгелери айлана якъны оькюртюп агъа. Оланы къайсы да борчларына бажарывлу кюйде янашсанг, айлана якъны берекетин артдырмагъа кёмек этегени гьакъ. Гьаракатгъа бойсынып, тас этивлерден къоруйгъаны да англашыла.


– Насрутдин агъав, къумукъланы бажарывлу къолларда от ойнар деген айтыву бар. Шо айтывну маънасы сынавда нечик амалгъа гелген? – деп сорагъанда, ол:


– Дюньяда елни, отну, сувну гючю гьакъында кёп тюрлю хабарлар тувулунгъан, – деп, пикруларын шулай деп узатды:


–Мен уьстде эсгерген уьч де аламаты-гючлерине, имканлыкъларына тюшюнюп бажарывлу кюйде янашсанг, адамлагъа къуллукъ этежеги гьакъ. Амма табиат гючлеге, байлыкълагъа тергевсюз янашыв уллу тас этивлеге тарытма да бола. Муна шо саялы да, табии байлыкъланы имканлыкъларын асувлу кюйде къолламакъ учун билимли, бажарывлу болмагъа тюше. Илму ва сынав шону яшавда гьар абатда ачыкъ этип ташдыра.


Уясында не гёрсе, учгъанда да шону этер деп негьакъ айтылмай. Гертиден де, жанлы гьаракатда – жанлы ругь деген кюйде, Насрутдин агъав да оьз оьмюрюнде табии ягъарлыкъны ялынын адамлагъа зарал учун тюгюл, асувлу ишлери булан къоллавчулагъа исив берип, оланы разилигин къазанмагъа къаст этгенин бирев де инкар этмеге болмас.


2004-нчю йылда печат этилинген «Табии ягъарлыкъны берекети» деген китапны авторлары профессор, филология илмуланы доктору, мисгин С. Акъбиев ва «Каспийгазпром» деген ихтиярлары дазуландырылгъан акционер жамиятны баш геологу, минералогия илмуланы кандидаты Къ.Сабанаев шо гьакъда оьзлени эсге алывларында язагъанда йимик, китапны аслу мурады, Насрутдин Насрутдиновгъа гьатдан оздуруп макътавлар этив тюгюл, гьаракатчы, бажарывлу адамны яшавундан алынгъан ачыкъ мисалланы халкъгъа аянлашдырыв болуп токътады. Яшав бир кюйде турмай. Айлана якъдагъы талаплар артгъан сайын, шоланы яшавгъа чы­гъармакъ учунгъу гьаракатны да бошама къоймай юрютмеге тарыкъ бола.


Насрутдин Насрутдинов бизге де «Каспийгазпром» деген жамиятгъа кюрчю салгъан пагьмулу ва бажарывлу касбучу, ёлбашчы гьисапда танывлу. Дагъыстанны газ промышленностуну инг де гёрмекли чалышывчусу гьисапда оьз атын оьр этгени де гьакъ. Алда йимик гьалиги заманда да газ ягъарлыкъсыз гьар агьлюде, предприятиеде, бютюнлей халкъ хозяйствону гьар гюнлюк талаплары да яшавгъа чыгъарылмайгъаны белгили. Шо берекетде асувлу кюйде пайдаланып, биз иштагьланагъанда йимик, юртларыбызда, шагьарларыбызда яшайгъан къоллавчуларыбыз да кёп бар демеге сюемен. Шо саялы да Насрутдин агъавну гьюрметин этип къоллавчулардан гьакъ сесленивлер де къаравуллайбыз.


Адам адамгъа этген къуллукъну, яхшылыкъны хадирин адам савунда англасакъ, гележек наслуларыбызны алдында бизин бетибиз де ярыкъ болур.

 

Авторизация
*
*
Регистрация
*
*
*
Согласны с условиями сайта?
Генерация пароля