Жамиятны гючю булан

Бу рагьмулу ишни яшавгъа чыгъарывда Тёбен Жюнгютей юрт администрациясыны башчысыны заместители Абдулла Мукайылов, юрт жыйынны депутаты Сайпутдин Магьамматов кёп гьаракат этип айландылар. Къурулуш ишде англаву бар уста Камалутдин Темировну да аслам кёмеги тийген.

Янгы кёпюрню къурулуву юртлулагъа хыйлы енгилликлер болдурду. Булай кёпюр юртда тезден къурулма тарыкълы иш эди. Айтагъаным, юртлулагъа айрокъда къыш вакътиде оьзенден оьтмеге бек четим эди. Янгы къурулгъан кёпюр юртну бир янындан бириси янына чыкъма ёлну къысгъарта, бирдагъы янындан, Тёбен Жюнгютейден Дёргели юртгъа барма болушлукъ эте.

Озокъда, 30 метр узунлугъу булангъы кёпюрню къурмагъа аз харж тарыкъ болмай. Кёпюр салывда ишге сахаватлы кёмекчилер, спонсорлар табып, А. Абдурагьманов ишчилени къурулуш материаллар булан таъмин этип турду. А. Мукайыловну ва Э. Эдиловну бу ишде яхшы къошуму тийди. Сонг да, экскаваторда ишлейген А. Акамов, С. Исаев, грейдер гьайдайгъан Д. Османов ва О. Бамматкъазиев,   КАмаЗ машинлери бар М. Болатов, З. Акаев ва З. Давутов, сварщиклер Б. Татаев, М. Магьамаев, ишчилер А. Гьасанов, В. Темиров ва дагъы да кёп юртлулар эл учун этек чалып, яхшы иш гёрсетдилер. Гьасили, Янгы йылны алдында кёпюр пайдаландырывгъа берилди.

Умуми кюйде алгъанда, кёпюрню  къурувгъа жамиятдан жыйылгъан акъча маялар да харжлангъан. Кёпюрден оьтегенлер юртлулагъа булай арив онгайлыкълар болдургъанланы атына баракалла сёзлер айта, алгъыш тилей туруп юрюйлер. Кёпюрню уьстю булан чакъа яйып тегишлегенлер, эки янына темир тутгъанлар.

Бу сахаватлы ишни юртлулар дагъы да узатмагъа хыял эте. Демек, уста улан К. Темиров бизге айтгъаны йимик, кёпюр бар ерге ярыкъ тартмагъа, шогъар гелеген ёлну да тегишлеп онгармагъа сюелер. Рагьмулу ишигизде сизге Аллагь кёмек этсин!

Язбаш гелгенде юртлулар 1978-нчи йылдан берли къурулгъан эсги кёпюрню де ремонт этмеге гёз алгъа тутгъанлар.

 

А. ЗАЛИМХАНОВ.

Авторизация
*
*
Регистрация
*
*
*
Согласны с условиями сайта?
Генерация пароля