Жамият къазаплана

Бабаюртда къурулуп турагъан дин идараны айланасындагъы гьал бугюн де, тюнегюн де тувмагъан. Гьалиден он йыллар алда Бабаюртда ишлеп тургъан ветаптеканы бинасын Дагъыстанны дин управлениеси  сатып алып, шону еринде дин идара ачмагъа деп айлангъан. Ерли халкъны разисизлиги буса янгыз шону булан да тюгюл: бинагъа ес бола туруп, дин управление ону айланасындагъы топуракълагъа да хожайын болуп айлана. Сонг да, Бабаюртда ачылгъан, муталимлер учун бары да онгайлыкълар яратылгъан медресеге дин управление буссагьатда да билим бермеге ихтияр бермей. Ону еринде олар янгы ерде айрыча бина къурмагъа къарайгъаны тамаша тие.

Къалмагъал болгъан эртен 300-ден де артыкъ яшёрюм Бабаюрт район администрацияны  бинасыны алдына районну башчысына оьзлени талапларын билдирмек учун  жыйылды. «Бабаюрт район» деген муниципал районну башчысы Д.Даветеев жыйылгъанланы бир бёлюгюн къабул этди, оланы талапларына тынглады ва гьалны къолдан чыгъармай сакъламакъ учун чаралар гёрежекни билдирди. Ёлугъувда район ОВД-ни ёлбашчысы Къ.Мурзаев ва районну прокурору Къанболатов ортакъчылыкъ этдилер.

–  Яшырмагъа негер тарыкъ, бугюн Дагъыстанны дин управлениеси булан Бабаюрт районну бир тюрлю де байлавлугъу ёкъ, – деди Д.Даветеев. – Бугюн Бабаюрт районда ишлейген 26 межитни ва 2 медресени  ишлемеге ихтияр береген кагъызлары да ёкъ. Дин управление Дагъыстанны бусурманларыны баш идарасы, республиканы башын тутгъанлар да олар булан гьакълаша. Шо саялы да, мен ойлашагъан кюйде, бизге олар булан байлавлукъ тутмагъа герек. Гётерилген четим  масъалаланы да гюч булан тюгюл, татывлукъ булан чечмеге къасткъылмагъа герекбиз.

Амма ёлугъувгъа гелгенлени шо масъалагъа къаравлары бютюнлей башгъа эди. Олар 15 минг адам яшайгъан Бабаюртгъа, ишлейген эки медресе азлыкъ этип, уьчюнчюсюн де къурмагъа негер тарыкъ деген сорав бере эди.

– Бугюнге ерли Бабаюрт район республикада лап да парахат районланы бириси гьисаплана эди, – деди сёз ёругъу етген Бабаюрт жумамежитни имамы Муслим гьажи Алтавов. – Амма артдагъы вакътилерде белгисиз гючлени гьаракаты булан шо парахатлыкъ къолдан чыкъмагъа тура. Бугюнге ерли Бабаюртда дин булан байлавлу болуп сенге-менге чыгъып, эришив болмагъан. Шо биревлени рагьат къоймай.

Ерли жамият дин управлениени ишине разисизлик билдире. Шо къурум белгилеген имам я жума намазгъа гелмей, я халкъ булан ёлукъмай, халкъ ону таныма да танымай. Ол янгыз бир бёлюк адамланы къуллугъун кюте.  Дин управлениеси буса шо вакътиде жамаат айыргъан имамны сансымай айлана, – дей бабаюртлулар.

Амма шо гюн иш янгыз районну башы булан болгъан ёлугъув булан битежекге администрацияны алдына жыйылгъан юзлер булангъы яшёрюмлер де инанмай эди. Жыйылгъанлар оьзлени талапларын артгъа салмагъа сюймей, еринде чечмеге сюйдюлер. Ёлугъувдан чыкъгъанлар гьалны англатгъан сонг, жыйылгъанлар бинаны къурулушу юрюлюп турагъан ерге бардылар ва гьалны гюч булан чечмеге айландылар. Тюзюн айтмагъа герек, олар ондагъы ишчилеге сёз де айтмадылар, амма  къурулуп бите турагъан бинаны терезелеринде тютюн чю чыкъды. Къувунгъа гётерилген Бабаюрт ОВД-ни къуллукъчулары да ишге къошулмадылар.

– Гьал шо ерлеге чыкъмасын учун, шону башына бувгъан салмагъа герек, – дей бабаюртлулар. – Ёгъесе, тангала уллу питне башланмагъа бола. Эгер дин управление гележек наслуну гьайын этмеге айлана буса, башлап олар учун яшлар бавлар къурсунлар. Дин булангъы масъаланы биз оларсыз да чечип болабыз, – деп къазаплана ерли халкъ.

Бабаюртлулар билдиреген кюйде, эгер къурулуш янгыдан ишленмеге башланса, олар оьзге тюрлю чаралар гёрмеге де гьазирлер.

Тюзюн айтмагъа герек, шо гюн къувунгъа гелген дин управление юрютеген ишлени  якъчылары еринде гётерилген масъалагъа милли ренк бермеге алгъаса­гъаны, осуна-бусуна тюртюнюп, эришив салмагъа къара­гъаны, ра­йонну ичиндеги халкъны экиге бёлюп, оланы бир-бирине кисдирип, арекден къарамагъа сюегенлер, гертилей де, барму экен деген ойлагъа оьзлюгюнден гелмеге болдум. Районлулар буса гьар гётерилген масъа­лагъа  гьалны чечмеге борчлулар милли ренк бермеге алгъасайгъангъа уьйренип де къалгъан. Шо саялы да бу гезик олайлагъа оьзлени яман хыялларын яшавгъа чыгъармагъа къарайгъанлагъа къулакъасылмады. Тек гьал къолдан чыкъмай, шулай къалса чы яхшы. Амма шеклик тува…

 

 

 

Г. Гьажиев,

хас мухбирибиз.

Суратда: яллагъан бина.

Авторизация
*
*
Регистрация
*
*
*
Согласны с условиями сайта?
Генерация пароля