Юрий Левицкийни Бабаюрт районгъа сапары

Республиканы гёрмекли политиги районгъа янгы охув йылны башында районну билим берив идараларыны охувчу яшланы къаршылавгъа гьазирлигин тергеме гелген эди.

Биринчилей Юрий Левицкий Бабаюртдагъы Россияны халкъларыны «Тангчолпан» деген мердешли маданият центрында болду. Шо къала артдагъы айланы ичинде танымасдай алышынды: ичине де, къыр янына да ремонт этилген.

– Артдагъы айланы ичинде район центрда ёлланы ярашдырывда, светофорлар салывда, фонтанлар къурувда, юртну айланасын яшылландырывда хыйлы иш этилген, – деди шо гьакъда айта туруп, районну башы Элдар Къарагишиев.

Юрий Левицкий шо гюн Бабаюртдагъы 2 номерли орта школада да болду. Школаны директору Агьмат Девеев сыйлы къонакълагъа школаны уьч де къабатын гёрсетди, янгы сырлангъан, тазалангъан ва охувчу яшланы кабул этмеге толу кюйде гьазир болгъан класлар булан таныш этди.

Юрий Левицкий эсгерген кюйде, Дагъыстанда республиканы Башчысы Рамазан Абдулатиповну гьаракаты булан билим берив тармакъда хыйлы иш этилген, этилип де тура. Ону тапшурувуна гёре школаланы материал-техника базасы беклешдириле, билим берив яхшылаша, муаллимлени алапаларыны оьлчевю арта.

Иш сапарын узата туруп, Юрий Левицкий Бабаюртну район больницасында да болду. Больница районну топурагъында ерлешген тав районланы къотанларыны халкъларын да къабул эте. Ону баш врачы Жаминат Алиеваны сёзлерине гёре больницада 250 адам савлугъун яхшылашдыра, жумада поликлиникагъа гьар тюрлю масъалалар булан гелегенлени санаву 3 мингге етишеген гезиклер де бола. Амма больницада бары да ишлер макътардай тюгюл.

– Бизге терапевт, педиатр ва фтизиатр етишмей, – деди, шо гьакъда айта туруп Жаминат Алиева. – Шо масъала янгыз бизин больницадагъа тийип къалмай. Эсгерилген касбучулар савлай республикада да къыт. Шо саялы да биз эсгерилген специалистлени гьазирлейген Дагъыстанны медицина академиясын битдирегенлени гёзлеп турабыз.

Юрий Левицкий Дагъыстанны савлукъ сакълав министрини орунбасары Салман Агьматовгъа шо масъалагъа къошулмагъа ва тез заманны ичинде чечивню гьайын этмеге тапшурув берди.

Бабаюрт районда болуп, ону лап да гёрмекли тармагъы – юрт хозяйствосу булан таныш болмай гетмеге бажарылмайгъангъа гёре, Юрий Левицкий районда биринчилерден болуп юзюмчюлюк тармакъны янгыртмагъа башлагъан Хамаматюртдагъы «Хазар» деген сабанчы-фермер хозяйствода да болду. Хозяйствону башын тутгъан Хизри Хизриев огъар хозяйствону ишлери гьакъда лакъыр этди, оьзлеге тергев береген ва кёмек этеген Дагъыстанны юрт хозяйство министерлигине разилигин билдирди.

– Хозяйство етишген уьстюнлюклер юрекни сююндюре, – дей Ю.Левицкий. – Шулай хозяйстволагъа этилеген кёмек де, тергев де дагъы да яхшы болмагъа герек ва мен оьз янымдан шону гьайын этип ишлеме де ишлежекмен. Сизге буса савлукъ ва уьстюнлюклер ёрайман.

Иш сапарыны жамын чыгъара туруп, Юрий Левицкий Дагъыстанны савлукъ сакълав министрини заместители Салман Агьматовгъа ва билим беривню ва илмуну министрини заместители Назира Магьамматовагъа районда гётерилген четимликлени уьстюнде ишлемеге ва оланы чечивню ёлларын тапмагъа тапшурду.


Герейхан Гьажиев,

бизин мухбирибиз.

Суратда: Ю.Левицкий школада.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля