Юбиляр оьзю болмаса да…

Октябр айны ахырынчы гюнюнде аты дюньягъа айтылгъан алимибизни сыйламакъ учун, Яхсайдагъы бир номерли школагъа яхсайлы муаллимлерден ва охувчулардан къайры, районну юртларындан, Хасавюртдан ва Магьачкъаладан гелген къонакълар да ортакъчылыкъ этди.

Юбилей чарагъа къуршалгъан муаллимлер ва охувчу яшлар яхшы гьазирлик гёрген эди. Кюйге къарагъанда, бу школа бу къайдалы жыйынланы оьтгеривде мекенли ва бай сынав топлагъан.

Муаллимлер ва охувчу яшлар аралаш Мурат Аджини асарларындан, ону яшавундан ва яратывчулугъундан маълуматлар бере тургъандан къайры, къумукъ тарихге, Яхсайгъа байлавлу сесленивлер, шиърулар да охулду.

Чакъырылып гелген аявлу къонакъ, оьзю де бу юртлу профессор Забит Акавовну маъналы ва тындырыкълы сёйлевю янгыз Мурат Аджини гьакъында болмады,  билимни, тарбияны, яшавну гьакъында да къужурлу ва агьамиятлы лакъыр болду.

Оьз гезигинде сёз берилген темиравуллу шаир ва муаллим Зарият Умаева да маъналы сёйлеп, Мурат Аджиге багъыш­лангъан ялынлы шиърусун охуду.

Чакъырылып гелген къонакъланы гезиклиси боташюртлу муаллим Камил Моллаев де, Мурат Аджи булан 90-нчы йылларда болгъан ёлугъувларын эсгере туруп, школада оьзю дарс береген дарсларда юбилярны асарларын къоллайгъан кюйлерин айтып мисал гелтирди ва оьзге муаллимлени де шолай этме чакъырды.

Белгили муаллим ва шаир, Хасавюрт педколлежни дарс беривчюсю Мусапир Батыров буса, сёйлегенден къайры, агъач­къомуз да сокъду.  Мусапир бырынгъы къумукъ кюйню сокъма башлагъанда, Анвар Байсунгуров телефондан таба Москва булан байлавлукъ болдуруп, Мурат Аджи де сагъынчлы макъамлагъа тынглап, баракалла билдирди.

Яхсайда ерлешген яшланы яратывчулугъуну район уьюню директору Анвар Байсунгуров да Мурат Аджи булангъы байлавлугъун эсгерип, ону яшавундан ва яратывчулугъундан къужурлу маълуматлар гелтире туруп,  аты айтылгъан яхсайлыны юбилейин оьтгеривню сиптечиси болгъан Салав Алиевге юртлуларыны атындан баракалла билдирди.

Гезиги етишгенде шу макъаланы автору да чыгъып  бир нече сёз айтды.

Сагьнада бирин-бири алышдырып белгили къумукъ йыравлар гьажимажагьатюртлу Иса Багьавов, яхсайлы Рустам Агьматханов, Билал Ибрагьимов, муаллимлени хору  бир нече йырлар йырладылар.

Байрамны аслу ортакъчылары – ерли школаны охувчулары да, йырлап, бийип, шиърулар охуп, оьз пагьмуларын аян этдилер. Олар булан бирге школаны муаллимлери де Мурат Аджини китабындан ва ону биографиясындан гесеклер охуп, жыйынны маъналы ва таъсирли этдилер.

Мурат Аджини яшавуна ва яратывчулугъуна багъышлангъан стендлер, слайтлар ва видеофильм, шолай да ортакъчыланы хас гийимлери жыйынны айрыча безеп, таъсирин гючлендире эди.

Шу байрамны мекенли онгаргъан муаллим Бурлият Ибрагьимовагъа ва къужурлу юрютген Райсахан Дагьировагъа  да жыйылгъанлар баракалла билдирдилер. Лап белгили къумугъубузну юбилейин оьтгерив чаралар дагъы да узатыла.

 

 

Рашит ГЬАРУНОВ.

Авторизация
*
*
Регистрация
*
*
*
Согласны с условиями сайта?
Генерация пароля