Ёл бойларда низам болдурула

Арадан 2 ай гетип, биз Хасавюрт районну архитектура, къурулуш ва ЖКХ бёлюгюню начальниги Ризван Арсаев булан лакъыр этебиз.

 

– Ризван Эдиевич, бизин район­да кемчиликлер  кёпмю эди?

 

– Тергев янгыз Магьачкъала-Герзели ёлгъа болуп къалмады. Аштархан-Кочубей-Къызлар-Магьачкъала, Кочубей-Неф­текумск-Минеральные воды, Магьачкъала-Магьарамгент, Магьачкъала-Южно-Сухокумск ва Магьачкъала-Лаваша ёллар да тергелди. Бизин районда шо масъалада айтардай кемчиликлер арагъа чыкъмады. Аслу гьалда федерал ёллагъа ювукъда къурулгъан биналар ва башгъа тюрлю къурулушлар законсуз къурулгъаны гёрсетилди.

 

– Шо не къурулушлардыр?

 

– Гёрсетилген дазудан чыкъгъан деп, 25 ерде низамсыз къурулуш гьисапгъа  алынды. Аслу гьалда  машин ярашдырагъан мастерскойлар, кафелер, заправкалар, тюкенлер, машин жува­гъан ерлер разисизлик тувдурду. Алывчулагъа, сайки, енгиллик этебиз деп ёлгъа тийдирип тюкен этгенлер де бар эди. Бирлерини ихтияр кагъызлары да бар. Бар буса да, гьалны шолагъа да анг­латма тюшдю.

 

– Ёлдан нече метр тайып къурулуш этме ярай?

 

– Къайсы къурулуш да уллу ёлну ортасындан оьлчеп, 16,5 метр ариде болма герек.

 

– Эгер де 1-2 метр ювукъ этилинген буса?

 

– Башгъа тюгюл, шонча ери тайдырыла. Мисал этип  айтсам, бизде аслу гьалда кемчиликлер Тотурбийкъала  юртда болса тюгюл, башгъа ерлерде онча кёп тюгюл. Шонда Шамил Магьмутов деген  адамны тюкени гёрсетилген оьлчевден 4 метр алгъа чыкъгъан эди, ол да тюкенни шонча ерин гесип тайдырма борчлу болду. Шолай да, Осман Гьажиев тюкенин  тротуарны уьстюнде этген эди, суд приставлар есисин шо тюкенни де буздурма борчлу этди.

 

– Шо къурулушланы ишлейгенде неге буварыв этилмеген?

 

– Алда талаплар башгъа болгъандыр, гьали башгъа. Ким не къурулуш эте буса да, тарыкълы къуллукъчулар ихтияр бермей туруп, къурма ярамай.  Биздегилер къуруп  битип, сонг документлер этме айлана. Федерал ёлгъа мен эсгерген мезгилинден ювукъда бир зат да къурма ярамай. Шолай документге ким къол салма бола?

 

– Къурулушланы бузагъанда эришивлер болдуму?

– Болмай да къалмады. Тек гьалны  англагъанда ва къоймажакъны билгенде, есилери бузма борчлу болдулар. Артдагъы жумада чы район администрацияны башчысы оьзюню орунбасарлары да булан кёп иш этди.

Кёбюсю адамланы тюкенлери темирден этилинген эди, шоланы 3-4 метрге тебермек учун район администрация техника булан кёмек де этди. Гьали шо ерни гёрюнюшю арив болду, тюкенлени алдындагъы гётермелер де тайып, бир бойгъа салынгъан тюкенлер бек арив гёрюне.

 

– Гьали ёл бойда машинлени жувагъан ерлер кёп бар…

 

– Оланы гьакъында айрыча айтма сюемен. Гертиден де, шолай машин жувагъан ерлер бек пакарсыз этилинген. Эки плита да салып, сув акъма ер де гьазирлеп, ишлеп йиберелер. Шоланы барыны да иши токътатылгъан. Районну башчысы Жамболат Салавовну тапшурувуна гёре бизин бёлюк машин жувагъан ерлеге гьайдавчу ял алма болагъан кюйде онгайлыкълар да болдурулгъан проектлер этип битген. Тарыкъ адам район администрациягъа арза бере ва шолай машин жувагъан ерлер этме ихтияр ала.

 

– Комиссия ишин кютдю, гьали ял алма да ярар?..

 

– Комиссия энниден сонг да  ишлежек. Олар заманда бир уллу ёлланы гьалын тергежек. Шолай да, биз гьали республика ва район даражадагъы ёлланы гьалын тергеме башлайбыз. Шолай низам бары да ёлларда болма герек.

 

 

Гебек КЪОНАКЪБИЕВ,

оьз мухбирибиз.

Авторизация
*
*
Регистрация
*
*
*
Согласны с условиями сайта?
Генерация пароля