– Къураш, сен доктор касбуну оьзюнг сайладынгмы яда бирев ёл гёрсетдими?
– Мен гиччиден берли доктор касбуну ушата эдим. Бирев де магъа докторгъа охума бар деп айтмады. Оьзюм сююп охума тюшдюм. Анам Рукъуят шагьар больницада доктор болуп ишлей.
– Илму диссертацияны къайда якъладынг ва ону темасы недир?
– Москвада мен гетген йыл кандидат илму диссертациямны якъладым. Темасы да шулай эди: «Яшланы уятында болагъан аврувланы сав этегенликни натижасы».
– Бугюн сен поликлиникада яшланы хирургу болуп ишлейсен. Авруйгъан яшлар кёп бармы?
– Бир гюнню ичинде мен 30-40 яшны къабул этемен. Кёбюсю яшланы аврувлары тувмадан. Айтагъаным, яшлар аврувлары булан тувалар. Бюйреклери авруй, кёплерини сувъярав ёлларыны дынкъы бола. Оланы сав этив кёп заманны ала. Инг де авур аврувланы мен Москвагъа онгарып йиберемен. Бираз алда 8 йыллыкъ яшгъа Москвада операция этилди ва ол къолай болуп къайтып гелди.
– Сен 12 илму макъаланы да автору экенни билемен…
– Мени илму ишлерим Москвадагъы, Тажикистандагъы медицина илму журналларда печат этилген. Москвадагъы медицина академияда да дёрт ай билимлеримни камиллешдирдим.
– Яшланы доктору болуп ишлеме къыйынмы?
– Тынч да тюгюл. Къыйыны недир? Гиччи яшлар докторгъа не ери авруйгъанны айтып болмайлар. Ону учун яшлагъа мекенли тергевлю кюйде къарама тюше.
– Илмуланы доктору болма умутунг бармы?
– Доктор диссертацияны уьстюнде бир нече йыллар ишлеме тюшежекни де англайман. О тынч иш тюгюл. Къарайыкъ, заман гёрсетер.
Измулла ГЬАЖИЕВ.
Автор чыгъаргъан сурат.
