Маъналы оьмюр сюрген адам

Ол оьзюню яшаву гьакъда тёкмей-чачмай  хабарлай, бай яшав сынаву булан оьктем бола. Шогъар онча тамаша болма тюшмей, гьар кимни  яшаву оьзюне аявлу. Буссагьатгъы вакътиде ол оьзгелер, айрокъда таныш-билишлер, жагьиллер оьзюнден уьлгю алагъанына артыкъ сююне. Районну ва Янгыкъаягент юртну жамият-политика яшавунда  актив кюйде ортакъчылыкъ эте. Ол жагь хасияты булангъы, къужурлу хабарланы, янгылыкъланы балын чыгъарып айтмагъа уста адам. Шихшабек намусланы гьар тюрлю къазанында къайнап, яшавлукъ борчларына да берилип оьмюр сюре.

Ш.Шихшабеков жавангентли Агьматны ва Гьюлайматны агьлюсюнде 1938-нчи йылда Къаягент районну Къаягент юртунда тувгъан. Башлап сегиз класны битдирген, асгер борчун кютген сонг Буйнакскидеги финанс техникумгъа охума тюшген ва шону уьстюнлю кюйде тамамлагъан. Загьмат ёлун Магьачкъала шагьарда сбербанкны управлениесини контролёру болуп башлагъан ва арадан къысгъа болжал гетип, шо идараны кадрлар бёлюгюню ёлбашчысыны  къуллугъуна гёчюрюлген. Ондан таба ерлерде кадрланы къытлыгъына байлавлу болуп Къаягент сбербанкгъа баш бухгалтер этилип бакъдырылгъан. Арадан кёп заман да гетмейли, партияны Къаягент район комитетини бюросуну къарары булан ол адамланы ихтиярларын якълайгъан къурумуна бакъдырылып, Къаягент районну ич ишлер бёлюгюнде кёп йыллар ишлеген.

Не ерлерде ва не йимик къуллукъларда чалышса да, оьзюн яхшы яндан гёрсетгени учун Ш.Шихшабеков кёп керенлер ёлбашчыларыны янындан гьюрметлев грамоталар, багьалы савгъатлар ва медаллар булан савгъатлангъан. Огъар оьзге гьюрметлев белгилери булан янаша «Къуллукъда оьзюн айрыча гёрсетгени учун», «Совет милициягъа – 50 йыл» ва «Россияны МВД-сине – 200 йыл» деген медаллар да тапшурулгъан.

Ондан къайры да, ол 18 йылны узагъында жамият ишлерде де чалышгъан.  Уьягьлюсю Патимат Алипбековна булан ожакъ къуруп, бирликде яшав сюрегени 55 йыл бола. Бу татывлу агьлю эки уланны ва дёрт къызны оьсдюрген, олагъа яшавда касбу тангламагъа ва оьз ерин тапмагъа кёмек этген.

Бугюнлерде эр-къатын Шихшабек ва Патимат Шихшабековлар оьзлени яшларыны яшларын ва олардан тувгъан эки эгизни де гёрюп, сююнюп-къуванып туралар. Айрада экинчи наслуну арасындагъы яшланы билимде йимик спортда етишген уьстюнлюклери уллатаны-уллананы айрыча шат эте. Оьзлени  гиччи уланы Агьматны уланы Алипбек ва къызы Равгьаниятны уланы Рустам, яш чагъына да къарамайлы, боксдан тюрлю-тюрлю оьлчевдеги ярышларда алдынлы савгъатлы ерлени алып юрюйлер ва даим уллатаны-уллананы юреклерин оьктем этелер.

Артдагъы ёлугъувубузда Шихшабек Агьматовичге:

– Бизин къаравубуздан, сиз яхшы о­ьмюр сюргенсиз ва шо кюйде яшавугъузну давам этегенигиз де сююндюре. Сизин гьали не гьалеклендире? – деп сорайбыз.

Озокъда, гьалеклендиреген масъалалар кёп бар. Башлап савлукъ да, дюньяда  парахатлыкъ да болса, яшавда къаршылашагъан оьзге къыйынлыкъланы енгме бола. Тек бугюнлерде хоншудагъы Украинадагъы авур гьаллар – тюртюшювлер айрыча гьалеклендире. Иш-гьаллар терен гетип, дагъы бетери болмаса яхшы эди. Аллагь сакъласын.

– Оьсюп гелеген наслугъа не ёрама сюесиз?

– Яшлар яйнасын, къувнап ойнасын. Оьсюп гелеген яшёрюмлеге насипли шат яшав ёрайман. Биз гёрген къыйынлыкъланы олар гёрмесин. Биз, уллулар, гележек наслуну даим гьайын этип турма герекбиз. Неге тюгюл де, олар даим бизге умутлу кюйде къарайлар.

 

М-З.Темирбеков,

Къаягент район газетни къуллукъчусу.

Суратда: Шихшабек агьлюсю Патимат ва торайлары булан.

Авторизация
*
*
Регистрация
*
*
*
Согласны с условиями сайта?
Генерация пароля