«Мама Патимат» деген центрда болгъанлар

«Мама Патимат» деген центрда болгъанлар
    


Пятница, 30.03.2018г. - "ЁЛДАШ".


Артдагъы заманларда бизин республикагъа Россиядан белгили врачлар гелип, оьзлени сынаву булан дагъыстанлы докторланы таныш этегени ва бир-бир сийрек операцияланы да этип гетегени адатланып бара деме ярай.

Айтагъаным, алдагъы гюнлерде Санкт-Петербургдагъы пачалыкъ педиатрия медицина университетни клиникасындагъы реанимация ва интенсивный терапия бёлюкню заведующийи Александр Ли ва баш врачны оьзге медицина къуллукъчуланы ишине къарайгъан заместители Ольга Сорока Магьачкъалада болду.


 

Олар гетген йыл июн айны 1-нде ачылгъан 150 койкасы булангъы «Мама Патимат» деген республика перинатальный клиникагъа баргъанлар. Ери гелгенде эсгерме сюемен, бу перинатальный центр Россияны савлукъ сакълав министерлиги гьазир этген программагъа гёре къурулгъан эди. Шо Темиркъазыкъ-Кавказ федерал округда лап уллу идараларындан бири деп гьисаплана. Бу центрда Дагъыстанны гьар ерлеринден гелген авур акушер патологиялары булангъы къатынлар ятып, аврувуну гьайын эте.


Шо гюн перинатальный центрны къуллукъчулары къонакълагъа яшланы ва къатынланы аврувларын багъагъан клиниканы лучевой, магнит-резонанс диагностика ва оьзге бёлюклерин гёрсетгенлер, олар идараны ишин мекенли кюйде ахтарып, операция блогунда да, аврувланы къабул этеген бёлюгюнде де болуп чыкъгъанлар.


Сонг да, олар реанимация бёлюгюндеги янгы тувгъан нарысталаны савлугъу­на къарагъанлар. Санкт-Петербургдан гелген врачлар бёлюклерде аврувлагъа кёмек этилеген кююне оьр багьа бергенлер. Къонакълар Магьачкъалагъа гьалы осал сабийлеге янгы тувгъан мюгьлетинден тутуп, медицинада чинк де яхшы натижалар береген къайдаланы къоллап, оланы савлугъун беклешдирмек муратда гелгенни эсгерген. Докторлар белгилеген кюйде, шо – бугюн оланы алдына салынгъан агьамиятлы масъалаланы бири.  


Александр Ли врачланы ишин къыйматлай туруп булай деди: «Магьачкъаладагъы перинатальный центрыны докторлары къаркъарасыны авурлугъу тийишли нормалагъа етишмейген гиччипавлагъа бек гьайлы кюйде янашып къарайлар. Инг де тёбен, 500 грам авурлугъу булангъыланы да аякъ уьстге салалар. Центрны иши оьр даражада, гьалиги талаплагъа жавап береген кюйде юрюле.


Перинатальный центрны врачлары тувгъанда 450 грам гелеген бюртюк чакъы къызъяш ятгъан ерге баргъанлар. Шо бир тигим къыз бу йылны январ айыны 2-синде тувгъан. Ону шоссагьат анасыны къарнында йимик шартлар булангъы кувезге салгъан болгъанлар. Шо къызъяшны иссиликни де, бавукълукъну да даим бир кююнде къоюп сакълагъанлар.


Гиччинев къыз оьзбашына тыныш алмагъа болмайгъангъа оьпкелерине искусственный гьава бакъдырагъан аппаратны салгъанлар. Ону анасыны сютюн зонддан таба бакъдырып ичирме тюшген. Эки ай ярым битгенде, гиччинев къызны авурлугъу 2 кило 202 грамгъа чыкъгъан. Гьали ону уьюне бакъдыргъанлар.