Оьтген жуманы ичинде де район администрацияда болгъан «Буйнакск район» деген муниципал бирлешивюню янындагъы комиссияны гезикли генгешинде жинаятчылыкъ ёлдан тайып, эс табып, парахат яшавгъа къайтма сюеген ватандашлагъа шо ёлгъа тюшмек учун гьар-бир якъдан кёмек этивге багъышлангъан масъалалагъа къаралды. Генгешни ишин район администрацияны башчысыны аманлыкъ болдурувгъа къарайгъан заместители, шо комиссияны председателини заместители Н. Гьажибатыров ачды ва юрютдю.

Генгешде эки тюрлю масъалагъа къаралды. «Адамланы парахат яшавгъа къайтарывну ёллары булан таныш этив» деген масъалагъа гёре террорчулукъгъа къаршы чалышагъан комиссияны генгешлеринде къаралгъан ишлени гёзден гечирип, ватандашланы парахат яшавгъа къайтармакъ учун этилеген умпагьатлы ишлени гьакъын­дан бир нече пайдалы мисаллар гелтирди.

Экинчи масъалагъа гёре генгешде чы­гъып сёйлеген РФ-ни МВД-сини Буйнакск район бёлюгюню начальнигини жамият низамны сакълавгъа къарайгъан заместители А. Мутаев баянлыкъ берди. Ол «Адамгъа парахат яшавгъа къайтма имканлыкъ береген жинаятчылыкъны меселин токъташдырыв» деген масъалагъа байлавлу сёйледи.

– Бизин районну юртларында нечесе межитлер бар экенчин де, кёбюсю жагьиллер намаз  къылма  шагьар межитлеге юрюйгени ойлашдыра. Оланы бирлери Тюркиягъа, Сириягъа чыгъып да гетелер. Бугюнге ерли бизин райондан тыш уьлкелеге гетген адам 36 бар. Оланы 23-вю – Оьр Къазанышдан.

Генгешде Янгы Къумукъ ва Тёбен Къазаныш юрт межитлени имамлары А. Жабрайылов ва А. Аселдеров  чыгъып сёйледилер.

– Ислам гьар адамны бар кюйде къабул эте, яшав къайдагъа ва къаравлагъа бакъгъан якъда гюч булан гийирилеген низамлагъа къаршы. Ислам динни англав даражасыны оьсювю гьакълыкъгъа, рагьмулукъгъа, тазалыкъгъа ва оьзю сююп, танглап иш юрютювге асаслана. Шону учун исламны террорчулукъ булан бир аралыгъы да ёкъ деп ташдырып айтма болабыз, – деди А. Жабрайылов.

Арагъа салынып ойлашынгъан масъалалагъа гёре тийишли къарарлар къабул этилди.

 

 

 

Б. МАГЬАММАТБАШИРОВА.